1 Goriinto 8 - Bibliyeeda Ghaydit

Iita hamichoojiga siitaw sanaamu

¹ Asi ghamneawa aba iita hamichoojiga siitaw ASEETA; geanali gideaba “Aseasa eesa sean geandeawi fughareeda.” “Fughareeda” iissa ghaghwar geaw, nea bariinyeega iissa gwadeegu.

² Siida iighay gili nal ng'asheanda, siisi mwanala eara gil eara ghamneawa, mwanalda gidagwachi haguuw ghwanalda.

³ Nea siida iibwariiy ASEETA, abeeda siisi ghwanal ASEETA.

⁴ Hean aba iita agita hamita siitaw sanaamu, geanali gideaba, “sanaamu mayghwashng'u,” ea gideaba “manda ASEETA nuut geaghus akaleala.”

⁵ Earapeadi mida fuga siguura aseecheeka, aba humng'eeda ghana ng'eanyiida, aba huumwa gwanda “aseecheeka” saang'a ea “ng'utamoojiga” saang'a–

⁶ iidu aba heedeanya aseasa ASEETA akaleala, was Ghweanda, was deaghayi leabu haleanjeeda sean, ak geepiideewi badaydaanyi ak gabiissa gwanda Ng'utamiinagi, was Yesu Gristo, ghayi rinna haleanjeeda sean badaydeaba niny, nea eara aseasa geepiideewi niny.

⁷ Eara gwasa, mii sean gil gea mideawa fughareani. Geaghus suh ng'ay, aba gideaba nineaji sanaamu, nea fughareenga nyaawa, ng'arng'ari, ea sing'uda ririnnyeanda.

⁸ Nea hamita ghanyea maygagwarseasa aba heeda ASEETA. Iisinung'waadi agita ea mwasuunyeawaneasa gil, ama siyaaji ea maygooheadeeseasa gil.

⁹ Asi ashageada giibali iteang'wa bea geadiin adiidu gwaruusa fugiga ng'arng'ariin.

¹⁰ Aba gideaba siida iidaanyi, ang'iing'eeda mideawa fughareeda, nea giipteadi ak giyeagiischi aba jeeda gheeda sibata sanaamu, neada ea majiidu gwayeesa jihi, iing'arng'ar fughareadaanyi, ak ghwaak hamita siitaw maloonghajeega?

¹¹ Nea aba fughareadaang'u geenuus siida ng'arng'ar, was orjeeda giyeang'wa ghayi meah Gristo aba badaydaanyi.

¹² Asi iyoonung' gwasin fuga ooduupcheewi riing'eeda nea gookachi fugheerga nyaawa nea ng'arng'ari, abeeda ea nootiiysi Gristo.

¹³ Asi, hamita iijea ghoah gichea ghabwaay orjeediyya, abeeda ea may gutaak banyeega, ak abeeda ea mwaabwaanyi orjeediyya.