1 Goriinto 6 - Bibliyeeda Ghaydit

Giiheakteayda fuga Gristo

¹ Iideepa gwanda jeedeang'wa siida giisan aba badayda orjeeda ghaamwat, ghwadoabiiw gideaba gaygabadaksa gawa ghoahaakta aba madeeda fuga mii doobiiweadi nea ghwanung'waada fuga ghaydidi?

² Moanali gideaba fuga ghaydidi gaygoorgweaksa ng'eanyiida? Ama abeeda ng'eanyiida iijea oorgweaksiina agooga, abeeda ea moahiidi iyoorgweaksi ng'asheega manang'i?

³ Moanali gideaba galanya gajeergweaksiina malaykajeega? Asi abeeda ea may ghwaraanya, ng'asheesu bea ghamneawean!

⁴ Asi iyoondeawi girgweaguutka sunu, ghwasaan inyas ghoayiinyi madeeda fuga meawala gheanyanga aba jeeda ganiisa?

⁵ Gearugu ng'asheesu nea geagasayi daabwaspwaseagwa. Heapi gwasin gideaba aba jeedeang'wa manda siida eara siyagi was weaghoocheanda ammu ghwalach girgweageeda fuga gheanyaawa,

⁶ iissa gawa siida ghoahaakta orjeeda ghaamwat, ea biissa aba madeeda fuga mandeawana masaweega?

⁷ Hean gooheakiidi geat agooga ak ghoah joorda aba heedeang'wa. Neada ea mang'wana goosawani aba giidiinyeanji? Neada ea mang'wana geereanyi haleanjeadaang'u?

⁸ Iidu eara agooga iissa gootinyi nea gooreedayi haleanjeeda, nea iissa ghoareachi eara fuga ooduupcheewi.

⁹ Ghana moanali gideaba fuga mii doobiiweadi maygwahearan sugoocheanduumeeda ASEETA? Adeereenganeegwa; fuga munyas searooji gil, ghanea fuga bada haleanjeeda sanaamu, ghanea fuga mealuuli, ghanea fuga ashiigi suurja,

¹⁰ ghana mareanghooga, ghana fuga geawi gheanyan, ghana leeyda, ghana fuga giing'weaka, ghana fuga areedi fih haleanjeeda jea gwahearan sugoocheanduumeeda ASEETA.

¹¹ Nea aba jeedeang'wa ghayi goowooschi fuga sina ng'asheesu. Iidu ea siihuuneegwa, ak ea siimiineegwa, ak geegooneegwa doobiiwnata aba gheawunga Ng'utamiida was Yesu Gristo, ea aba Guroorooda ASEETEANYA.

Agadiyeata sasanuukeagwa aba giigheambiita ASEETA

¹² “Haleanjeeda sean aba heedeanyu ghwahit,” ak ea mii sean gil gea doabiiw. “Haleanjeeda sean ghwadoabiiw aba heedeanyu,” ak aniini ea meagassi gideaba gayghoah soomjeanda gida wassean.

¹³ “Hamita gaba jeeda, nea jeeda gaba hamita”, ak gaygwanyarja ASEETA duwaawi. Amaduuku saseeda ea maba mealuuleega, gaba Ng'utamiida, nea Ng'utamiida gaba saseeda.

¹⁴ Nea ASEETA ghayi gooduudu Ng'utamiida ak gaygooduuneasa aseasa aba uurdaanyi.

¹⁵ Heapi nea ea moanali gideaba sasanuukeagwa damealga Gristohi? Asi gay dageanu damealga Gristo ak ghaanung' ghoah damealga giiweakshoocheanda? Manda!

¹⁶ Ghana moanali gideaba siida guuyi sea giiweakshoocheanda niiw saseanagi sea niny? Aba gideaba geang'waar, “Fiisu asiyeenyean gay ghoah saseanagi.”

¹⁷ Nea siidida guuyi sea Ng'utamiidean gaguuyi gurooroanagi sea niny.

¹⁸ Asalda anung'wana heeda mealuuleega. Gilinyoo ea riing'eeda gil sin siida gwanda badayda saseeda; amaduuku siida mealuul gwasin riing'eeda aba saseadaanyi nea gabwageaw.

¹⁹ Moanali gideaba sasanuukeagwa gheeda sibata ASEETA gil bea Guroorooda Ghaydit mida jeedeang'wa, ghayi gooneegwa ASEETA? Nea sasanuukeagwa ea mii geagwa gil.

²⁰ Agooga geashaaheagwa. Asi, oakghaambiida ASEETA aba sasanuukeagwa.