1 Goriinto 5 - Bibliyeeda Ghaydit

Fuga munyas searooji aba jeeda ganiisa

¹ Gwanda iita huumwa nighayda bea gideaba jeedeang'wa gwanda fuga mideawa searoojiga munyas, ak gabiissa ea muy ea manda eara aba jeeda Eemoojiga; bea gideaba iissa siida gwaluudayi gatmooda ghwaan.

² Ak ghoaghwarji geat! Gwachi mang'wana googiisanyi? Siida nisin ng'asheanji oang'aamwana jeedeang'wa.

³ Nea earapeadi meandani aba saseeda geandi aba guroorooda, ama uurji gileandi, abeeda ea neargu girgweaksiinda

⁴ aba gheawunga Ng'utamiida was Yesu naang'aati girgweaksiinda siida sin ng'asheanda muy sunuun. Hean nea ghoabwachi geat, abeeda eara gurooroodeanyu gaygwanda hiji, sea uurda Ng'utamiideanya was Yesu,

⁵ ak geataw Shataani siisi ak ghwanyas saseadaanyi lasooda, ak abeeda geelealu gurooroadaanyi aba eaweeda Ng'utamiida was Yesu.

⁶ Ghwaroodeang'wa bwaageat miimiy. Moanali gideaba gidamwanang' mwataw ghoamu ghoamwatawiit murmurjeanda seani?

⁷ Asi ageanda matawandeaba garayi ak abeeda ghoahuuyi murmurjeanda eesh, ak ea huumwa gil miyeemwatawiideegwa. Aba gideaba Gristo, was dayeenda gisilleanda bea Basaaka, ning'ata giidaydeayda.

⁸ Asi eesina ghweelmeeda, nea mii dea matawanda ghayi bea garayi was matawanda bwada geawunda gheang'da ea munyinda, gagasa gaba mukaateeyda meamwatawiida, nih weeshinda jeeda gil ea huumwa.

⁹ Geang'oorneegwa aba barawajeanji iteanyuun, gideaba adooguuyeewi fuga mealuuli;

¹⁰ meayeeshiineegwa earahay gideaba adooguuyeewi fuga munyas bea jeedeaba ng'eanyiini, ghana fuga geawi gheanyan, ea fuga areedi buuneeda haleanjeeda, ghana fuga bada sanaamu, abeeda gwachi gajea gideaba gagasa ang'amwana jeeda ng'eanyiida gil.

¹¹ Ak geang'oorneegwa gideaba adoobareanyeewi siida was orjeeda siguura dea giyeang'wa, iyaadiiy ghana gwaseaja haleanjeeda, ghana ea siida bada sanaamu, ghana ea siida ang'eawi buuneeda gil, ghanea siida boogidi, ghana ea siida areedi buuneeda haleanjeeda, siissunu adoamwaschi eara gideaba gajoombucheewana.

¹² Abeeda gaygwarachi naaha iyeargweaksi fuga jarooda? Nea ea mii fugiga mida jeeda ganiisaan gil gea jea argweaksiina.

¹³ ASEETA gaygoorgweaksa fuga mida jarooda. “Ak ghahoan fuga munyas aba jeedeang'wa.”