1 Goriinto 4 - Bibliyeeda Ghaydit

Giijasoodiga Gristo

¹ Nih gidagasa ghwadaaktaneasa siida gil, gideaba geewooschi soomjooga Gristo ea fuga siiteaga gadiyeeda funyaat bea ASEETA.

² Nea gissigasa aba heeda fuga siiteaga gadiyeeda doobiiwnata gil.

³ Nea aba heedeanyu nih ea ng'asheanda mwanang' gil gideaba goorgweaksean agooga ghana girgweageeda wassean bea buuneeda. Ak aniini ea mii deargweaksa geaw.

⁴ Aba gideaba aniini mwaanali gida wasean aba badaydeanyu, ak ghanyea meesiksean. Ng'utamiida dea jea goorgweaksean.

⁵ Asi iissa ea adoorgweaksi ng'asheanda nea miighwahita damanda nea miighwahidu Ng'utamiida. Jea ghoabwaay haleanjeeda funyaat mida jeeda misaneeda, ak ghoadahaach ng'asheega mida jeeda guroorooda. Abeeda giliwas sih gay ghwanyas gwarsiinda aba heeda ASEETA.

⁶ Ak geamuschi haleanjeeni seaniin sea Apolo ak abeeda ghoanyagaadi, fuga eaduupcheewi, ak abeeda ghoanaalaneasa ea moanaawani gidida ghayi sing'waariin, ak abeeda ea maghwara geaw sih aba jeedeang'wa aba giiduuksiindeaba geaw bea siinuut.

⁷ Ghwadaa ng'eaha gida wasean sajaadawaat aba jeedeang'wa? Ak goondeawi naaha ghayi moanyasi? Ama ghayi oanyaschi, ghwasaan inyas ghoaghwarji geat ea gawuurji gili meegooneegwa?

⁸ Asi nihit noolang'uuchi! Asi nihit noobaruurji! Nea iimeendani ea noahuuyi sugoodiga! Nea aba badaydeaba nih ea noombaliischi, ak abeeda geeguuyi gheambalmeeda sea agooga!

⁹ Aba gideaba naapkaachi gideaba ASEETA ghayi gwasineasa aseasa giijasoodiga eahuuwa fuga huuydeana sean, eewuurjeewana fuga sirgweaksiina miyeeda; aba gideaba sihuuyi meagheang'da aba ng'eanyiida, ea aba heeda malaykajeega ea heeda buuneeda.

¹⁰ Aseasa geewooschi dasheahi aba badayda Gristo, amadu agooga goondeawi weaghuumeeda aba badayda Gristo. Aseasa geewooschi ng'arng'ar, nea agooga goondeawi uurda. Agooga geesineegwa mureeda, nea aseasa ghanyea meesineasa mureeda.

¹¹ Aba damani bea ghamneawean geebearjeewi jalooda ea muwooshta, ak ea meekwealsheeni muuchi, geabwareasa, ak ea meendeawani gealga,

¹² geebiissi eedeawiida nea geesinyi gadiyeeda aba geatingaasa. Iisiing'eaweasa geebadiischeesi, iisibwareasa gearjeang'di.

¹³ Iisibeasheagwa googasayi duupcheeda; sinung' eahuuwa haleanjeeda mwadaagha aba jeeda ng'eanyiida, nea geewooschi haleanjeeda mwadaagha aba haleanjeeda sean.

¹⁴ Ng'asheesu mwaang'waari nea geegasayi dabwaspwaseegwa, geabaysiini miinda gheang'deang'wa nea geahindaneegwa diibiga aabwariinyi.

¹⁵ Aba gideaba earapeadi oondeawi giinealshoodiga manda mooneeda aba jeeda Gristo, ea moondeawani ghweaniga saang'a. Aba gideaba aniini naahuuyi ghweandeang'wa aba jeeda Gristo Yesu aba naweeda giijasta miy.

¹⁶ Asi geamuscheegwa, ayeani geeshteanyu.

¹⁷ Hean ghoah gideajeakni Dimoteo heedeang'wa, was jeepteanyu aabwariinyi, biissa ea doabiiwaat aba jeeda Ng'utamiida, jea goopkeaneegwa naweadingeasu aba jeeda Gristo, ak gawuurji gideanealshacheati aba ng'eanyiisean aba jeesinga ganiisajeega sean.

¹⁸ Asi buuneeda mwaatkwa ning'ut ghwarjeeda nea ghaghay gil maydoan heedeang'wa.

¹⁹ Nea gaydabay doan heedeang'wa iimwas Ng'utamiida, ak ea mwajeaghu gideaba gaydasikteawa ng'asheega fuga ghwarjeeda gaydasikteawa eara uurjeenga nyaawa.

²⁰ Aba gideaba sugoocheanduumeeda ASEETA manda jeeda baloolda, gwanda jeeda uurda.

²¹ Ghoabwariinyi aneeda? Gaydoan heedeang'wa nea geayeadu bileangida, ghana jea doana bariinyeega ea guroorooda garbabu?