1 Goriinto 3 - Bibliyeeda Ghaydit

Soomjooga ASEETA

¹ Nea aniini fuga eaduupcheewi mwammuusi deabalooldaneegwa fuga mideawa guroorooda, geaghus awuurjeewana fuga saseeda, nea goowuurjeewi diibiga Gristo.

² Aniini ghaabiyeagwa eanooga, meagooneegwa hamita hang'waay; aba gideaba agooga miyoamuusa; asi eara ghamneawa miyoamuusa,

³ aba gideaba agooga gudabeaha saseeda. Nea iimida jeedeang'wa lachng'eanyiida ea ng'alealeeda, abeeda moowoosi fuga saseeda, nea ghoabeadi fuga gealaani?

⁴ Aba gideaba iyayi siyagi, “Aniini geabeayi Bawlo,” nea gwayi nuut, “Aniini geabeayi Apolo,” abeeda agooga ea moowoosi buuneeda?

⁵ Asi Apolo ng'eaha? Ama Bawlo ng'eaha? Soomjooga ghayi nung' amwasa gil, gawuurji gidadawda Ng'utamiida giliwas sih gwasin.

⁶ Aniini ghayi geahisti, ak ghwayiin Apolo beega, nea dea aruudu ea ASEETA.

⁷ Siida hista mii gili ghana siida iin beega geaghus ASEETA aruudu.

⁸ Siida hista ea dea iin beega gooyang'deay, amadu gay gaba siisi nyas giimeardaanyi gawuurji gidaghayi sinda gadiyeeda.

⁹ Aba gideaba aseasa geewooschi fuga sin gadiyeeda ASEETA; agooga goowooschi madamnyeanda ASEETA, nea goowooschi gheeda ASEETA.

¹⁰ Aba giteena dagheerjeanduumeeda goonan ASEETA, ak geawuurjeewi siida geariir haweewa fuga deekshi geasinyi sindeeta, ak gwadeeksheewa siinuut uhuuda. Ak ea daba siisi ng'ula giteeksheata aba uhuudeaba sindeedi.

¹¹ Aba gideaba manda siinuut jea gwasin sindeeta nuut, geaghus diita ghayi nigeawiit eesiniin, nea Yesu Gristohi.

¹² Iidu nea gwadeeksheewa siinuut uhuudeaba sindeedi, iideakta dahaabu, ghana lapiya, ghana lagheanga haw sheayeat, ghana geediga, ghana seenga, ghana nyeega–

¹³ abeeda gajeataajiit gadiyeemba giliwas sih; aba gideaba gayghoahiimu Eaweedida, aba gideaba gajeataajiida beasta, ak abeeda gwasin beasta gadiyeeda ghayi sisin giduurji.

¹⁴ Nea gadiyeeda sin siida wassean nea gwadeeksa uhuudeaba sindeetida gayghaghu abeeda gayghwanyas giimearda.

¹⁵ Nea siida datasa gadiyeadaanyi, gay ghwaak lugooda, amaduuku niny gajeelealu, gay gawuurji gili mwanmwandaawa jeeda beasta.

¹⁶ Moanali gideaba agooga goowooschi gheeda sibata ASEETA bea ASEETA, ea gideaba Guroorooda ASEETA gwanda jeedeang'wa?

¹⁷ Siida iinuus gheeda sibata ASEETA, gay gwanuus ASEETA siisi. Aba gideaba gheeda ASEETA ea ghaydit, nea agooga gil.

¹⁸ Siida adagwareengani geaw. Siida iidaah geaw, gideaba gwandeawa weaghuumeeda aba jeedeang'wa aba gweanyeeksu ea dadashaahiida ak abeeda ghwanyas weaghuumeeda.

¹⁹ Aba gideaba weaghuumeedeaba ng'eanyiini leendeeda gil aba heeda ASEETA. Aba gideaba geang'waar, “Siida ang'oonyi siida weaghoot aba jeeda milmilanda nyaawa,”

²⁰ nuut gicha, “Ng'utamiida ghwanal fughareenga fuga weaghoodi gideaba marachi gil.”

²¹ Asi siida wassean adagagwarsa geaw buuneeda. Aba gideaba haleanjeeda sean geagwa gil,

²² ea Bawlohi, ghanea Apolohi, ghanea Gefahi, ghanea ng'eanyiida, ghanea eaweega, ghanea miyeeda, ghanea haleanjeeda ghamneawa mida, ghanea gea jea ghwahidu gil, suh geagwa sean;

²³ nea agooga goowooschi fuga Gristo; nea Gristo gaba ASEETA.