1 Goriinto 2 - Bibliyeeda Ghaydit

Giijasta badayda Yesuheeda ghayi singoor

¹ Hean iyaawunyi heedeang'wa, fuga eaduupcheewi, mwaawuni darukuneegwa muuwuunooda ASEETA aba ghwarjeeda ghana aba weaghuumeeda.

² Aba gideaba aniini meagassi danal ng'asheanda wassean aba jeedeang'wa geaghus Yesu Gristo, dea ghayi singoor.

³ Nea aniini ghayi geendeayi nea geawooschi ng'arng'ar ea muuwda sea hirbabandeeda;

⁴ nea girgweageedeanyu ea giijasteanyu ghanyea maba ng'asheega gurguriischooda bea weaghuumeeda, gagadiiy Guroorooda aba uurda,

⁵ ak abeeda masaweegeagwa ea mabeachi weaghuumeeda buuneeda, gagasa gwaleabu uurda ASEETA.

Weaghuumeeda ASEETA

⁶ Nea jeeda fuga nihitiisa heeda aba masaweega giinaali weaghuumeeda, earapeadi mii weaghuumeedeaba damani ghana dea fuga ambaliischi aba damani, was gea jea gamuudean gil.

⁷ Ak geerugu makcheameedida ea weaghuumeedida funyaat bea ASEETEAN, ghayi nung' ASEETA ghoah diigheanda aba mwadi aba giigheambiiteanyean.

⁸ Ea manda aba jeeda fuga ambaliischi aba damani dea nal ng'asheanji; aba gideaba inyeeda heeta ghwanal, abeeda ea maygoongoor Ng'utamiida ghaambiidaat.

⁹ Gawuurji gissing'oarda, “Haleanjeeda manda gheang'da nidaah, ghana iita niyiiy, ghana ghoapkaat guroorooda siida, haleanjeeda nigeawiit gwasisin ASEETA aba badahuuka fuga bwariiy niny.”

¹⁰ ASEETA niihiimneasa aseasa aba naweeda Guroorooda. Aba gideaba Guroorooda iissa ghwanal haleanjeeda sean, eara haleanjeeda mida jeeda ASEETA.

¹¹ Nih gajea ana sih jea ghwanal fughareemba sih nuut iimeakghusa gurooroodida mida jeesiidean? Gwasunu manda siida ammu ghwanal fughareeda ASEETA geaghus Guroorooda ASEETA.

¹² Aseasa meanyasi guroorooda ng'eanyiida, geanyaschi guroorooda leabu heeda ASEETA, ak abeeda geenali gidagooneasa ASEETA aba inyeanda jeeda.

¹³ Ak geerukwiidi gili aba ng'asheega maleapna weaghuumeeda anaal fih siida geaghus dea anaal fih Guroorooda, ak gwaroobu huumeanda guroorooda aba heeda fuga mideawa Guroorooda.

¹⁴ Siida maba guroorooda mayghwanyas gida jea ghoadaw Guroorooda ASEETA, aba gideaba aba headaanyi leendeeda gil, ak ea mayghwanal aba gideaba geaghus eanal aba jeeda guroorooda.

¹⁵ Siida guroorooda iissa goorgweaksa haleanjeeda sean, nea niny ghanyea manda siida jea goorgweaksa.

¹⁶ “Aba gideaba, siida nal fughareeda Ng'utamiida ng'eaha, ak abeeda ghoanaal?” Duuku aseasa geandeawi fughareeda Gristo.