1 Goriinto 11 - Bibliyeeda Ghaydit

¹ Awuurjeewanean aniini, gawuurji gideabeaheati Gristo.

Dukuteayda uhuuda damanda badita ASEETA

² Asi ghaaghwarjeegwa aba gideaba noapkaachaan aba haleanjeeda sean ea gideaba noang'waanyi searoojigiga ghayi eagoonyeegwean.

³ Ak geagasayi anala gideaba giliwas gatmooda ea ng'eedeeda Gristo gil, nea uhuuda gatmooda ea siyeadaanyi, nea uhuuda Gristo ea ASEETA.

⁴ Ng'eedeeda wassean moora ASEETA, ghana gwaramoorani ng'asheega nea gwadukuta uhuudaanyi, ghoabwaaspwaas uhuudaanyi,

⁵ nea gatmooda wassean mwaash ASEETA ghana gwaramoorani ng'asheega nea madukuta uhuudaanyi masisiina uhuudaanyi mureeda, abeeda gawuurji gili uhuudaanyi sireakghu.

⁶ Aba gideaba gatmooda ii madukuta uhuudaanyi, ghang'wana ghwareakghu buudeagaaschi; amadeepa gaba baspaseega gideaba gayghwalach gatmooda buudeagaaschi ghana eareakghu abeeda ghang'wana gwadukuta uhuudaanyi.

⁷ Aba gideaba ng'eedeeda mamiisiina gideaba gaygwadukuta uhuudaanyi, aba gideaba niny geegala sea giigheambiita ASEETA; nea gatmooda ea giigheambiita ng'eedeeda gil.

⁸ (Aba gideaba ng'eedeeda maleapna heeda gatmooda, gwaleabu gatmooda heeda ng'eedeeda.

⁹ Nea ng'eedeeda ea meesina aba badayda gatmooda, nea gatmooda geesin aba badayda ng'eedeeda.)

¹⁰ Nih gidasibaysiina gil gideaba gatmooda gagasa gwandeawa gichea gwadukuteawa uhuudaanyi, aba badahuuka malaykajeega.

¹¹ (Eara gwasa, aba heeda Ng'utamiida asi gatmooda mii gili, ii manda ng'eedeeda nea ng'eedeeda ea mii gili ii manda gatmooda,

¹² aba gideaba gatmooda ghayi gwarina heeda ng'eedeeda gwasunu eara ng'eedeeda ghamneawa gwajiilu gatmooda. Nea haleanjeeda sean gwaleabu heeda ASEETA.)

¹³ Asi asikteawana nea goobwaageat; ghwadoabiiwi gideaba ghamwaash gatmooda ASEETA nea madukuta uhuuda?

¹⁴ neada gealaan ea moanaaleagwa gideaba ng'eedeeda ii mideawa buudeega geawi ghoabwaaspwaas geaw,

¹⁵ Iidu gatmooda ii mideawa buudeega geawi gahaguuwsa? Aba gideaba geataw buudeega geawi gwadukuta saseeda.

¹⁶ Amadeepa gwanda siida gasa ghang'ut foolayda, ghanyea meanali seareeda nuut ghana eara ganiisajeega ASEETA.

Hamita Ng'utamiida

¹⁷ Asi aba gooniidi eagoonyeegwa ng'asheesu bea gichea eebeadaan, mwaaghwareegwa, aba gideaba iyoabwachi geat, moobateeni geat alooheeda, goobati geat munyinda.

¹⁸ Aba gideaba gidamadeeda, iyooroonyi nea goowooschi ganiisa, ea naayiinyi gideaba gwanda jeedeang'wa dardeayda; ak hich ghaamwaschi,

¹⁹ aba gideaba jeedeang'wa ghaaghanyi gwanda foolayda ak abeeda fuga simwas aba heedeang'wean abeeda geanal.

²⁰ Asi iyoabwachi geat, ea mwahida gideaba gajayaaga hamita Ng'utamiida.

²¹ Aba agiischooda, iissa gaba siisi geanda hamitaanyi, nea siyagi gabearji jalooda nea niirja ea boogideat.

²² Naaha! Neada ea moondeawani gealga jea ayeagiischeewana nea gooleeshi? Ghana oofooli ganiiseeda ASEETA nea ghoanung' ghabeal fuga mandeawana gil? Gaydayeeshiineegwaan? Gaydagwarseegwa aba ng'asheanji? Manda! Maydagwarseegwa.

²³ Aba gideaba ghaanyaschi aba heeda Ng'utamiida gidida ghamneawa eagoonyeegwa agoogean, nea Ng'utamiida was Yesuun eaweeda jea ealaabwa bwadawiin gageanu mukaate,

²⁴ hean, iing'ata badiischeesiinda, ghabwanach, ak gwayi, “Nih saseedeanyu gil ghayi sibeagu aba badahuukeagwa, asindunu aba giipkeateanyu.”

²⁵ Gwasunu iing'ata agiischoodeaba shing'ada gageanu gikoombe ak gwayi, “Bayoogi neajeedeesh gil aba foojeandeanyu. Asindunu, iinyo aleesheena, aba giipkeateanyu.”

²⁶ Aba gideaba iyoayaaji mukaateeheeni nea ghoaleaydi bayoogi, goorukwiidi miyeeda Ng'utamiida ea ghwahita eaweeda jea ghwahina.

²⁷ Nea siida wassean, ak mukaate ghana ghwaleayda gikoombeeyda Ng'utamiida aba naweeda mwadoabiiwa, abeeda gaygwanyaksa geaw giidiinyeanda ak ghang'uda saseeda ririnnyeanda ea foojeanda Ng'utamiida.

²⁸ Nea siida ea dasikteawana geaw, ak ghwaak mukaate ak ghwaleayda gikoombe.

²⁹ Aba gideaba siida wassean ak nea ghwali nea masikteawana ghwaak nea ghwali ghoorjooda saseadaanyi.

³⁰ Nih gidaghamneawa nung' gang'arng'ariidi fuga saang'a aba jeedeang'wa gil nea gamnyeani, nea mwaatkwa ea nimeewa.

³¹ Ama inyeeda ghwanyawa geergweaksi geat huumwa, ghwanyawa ea majeergweakseasa.

³² Nea iyargweakseasa Ng'utamiida, geanung' eanyasa mureeda ak abeeda ea meergweakseasa sea fuga muunda ng'eanyiida.

³³ Asi fuga eaduupcheewi, iyoabwachi geat nea googasayi ayeagiischeena, oomuukuuni geat–

³⁴ siida iibearji jalooda, ea deagiischi aba gheanyi, adiidu gweadu nyeascheedeang'wa girgweaksiinda. Nea ng'asheega suurja iyaawunyi gaydarukuneegwa.