1 Goriinto 10 - Bibliyeeda Ghaydit

Reekusiinda aba sanaamu

¹ Fuga eaduupcheewi, geagasayi anala gideaba, gheambaghweanigaasa ghayi gookwa shamooghooda sean, ak ghoaghaawa sean basooda,

² amang'ata geepaatiisan sean ghoah fuga Musa aba jeeda shamooghooda ea jeeda basooda,

³ ama ng'ata ghwaak sean hamitida bea gurooroodean

⁴ ak ghwali sean beegiga bea gurooroodean. Aba gideaba ghwaleaydaawa badayda lagheaneeda was guroorooda ghayi aat geeshta, nea lagheaneedida ea Gristohi.

⁵ Nea gwanda fuga saang'a aba jeenyaawa magassa ASEETA; ama muchu gealas uhuuda aba dareapcheeda.

⁶ Asi ghamneawa ng'asheesu niiw reekusiinda aba heedeanya, ak abeeda ea meegasi ng'asheega munyas.

⁷ Nea adoowooschi fuga bada sanaamu, ak goowuurjeewi giduurji fuga mwaatkwa; gawuurji gidaghayi sing'waar bea gideaba, “Buuneeda ghayi goobiitpiit gweagiischi nea gwaleeshi, ama ng'ata ghang'eatng'eat ghwadaanghan.”

⁸ Nea adeemealuuli ak geewuurjeewi gidasiinda fuga mwaatkwa aba jeenyaawa, ak ghoabeada fih sagalamnyooji diktam ea samwagu eaweecheanjagi.

⁹ Nea adaghanyi eesina Ng'utamiida, ak geewuurjeewi gidaghayi simda fuga mwaatkwa aba jeenyaawa, ak ghwaak ichipkeega;

¹⁰ nea adoanikghti gidaghayi aniikghta fuga mwaatkwa aba jeenyaawa, ak ghwalas uhuuda habitkwajeega.

¹¹ Asi ghamneawa, ng'asheesu ghwanyas nea gawuurji reekusiinda, ak geang'waar ghoahiimu gichea eabeada, aba heeda fuga jea gweadu muudeanooda gweanyeeka.

¹² Asi siida eesha geaw gimiinaadi dang'ula geaw adiidu ghoabeada.

¹³ Manda simsimda ninyaseagwa agooga mawoosa dea gealaan aba heeda siida. ASEETA doabiiwaat, nea niny ea mayghwanung'waada eesimeegwa ea ghwanaawa uurjeengeagwa, earapeadi jea eesimeegwean gaygwasin naweeda jea ariteawana ak abeeda ghoamuuschi arjeang'da.

¹⁴ Asi fugeasu aabwariinyi, aba sareani anung'waada badita sanaamu.

¹⁵ Geabalooldaneegwa fuga mideawa fughareenga; asi ooteemsheesiina agooga ng'asheesu earguun.

¹⁶ Bayooktida bea ghawooda siipareanyi aba ghawoodean, heapi mii giibareanyeeda foojeanda Gristohi? Ama mukaateeyda sibwanajaadi mii giibareanyeeda saseeda Gristohi?

¹⁷ Aba gideaba gwanda mukaateeheanagi, nea aseasa geewooschi saang'a ak geewooschi saseanagi, aba gideaba aseasa eesa sean geanyaschi banajaneedeaba mukaateeydida asagiin.

¹⁸ Ang'ula fuga Israeli; neada ea mii fugiga ghayi ak haleanjeeda ghasmeahooda abiita heeda wagiida?

¹⁹ Asi gaydayiin? Gaydayi hamita sighadoawana sanaamu gili, ghana maloonghajeanda gili?

²⁰ Manda, gearugu gideaba haleanjeedida sisapa geadi adayda fuga mandeawana masaweega ghoadaw meangeenda nea moadawa ASEETA. Ak ea meagassi aniini gideaba gajabareanyeewana meangeenda.

²¹ Majoammuusa aleayda gikoombeeyda Ng'utamiida ea gikoombeeyda meangeenda. Ak ea majoamuusa oopareanyeena measeeda Ng'utamiida ea measeeda meangeenda.

²² Ghana sigasayi eang'udana Ng'utamiida lachng'eanyiida? Neada geandeawi uurda ea eeburdeawana niny?

²³ “Haleanjeeda sean ghwahit,” ak ea mii haleanjeeda sean gil gea jea ghaweat fih. “Haleanjeeda sean ghwahit,” ak ea mii sean gil gea jea gwadeegu.

²⁴ Siida adagagakiisa geaw haleanjeeda miyaas, ghang'wana gagasa ghwanyas giischeewoocheandaanyi gidamiy.

²⁵ Ayaaga haleanjeeda sean siikghaas aba heeda sisheahiideawa banyeega was jeeda naada nea adoonyeariidi aba gidamwachmwach fughareedeang'wa.

²⁶ Aba gideaba, “Ng'eanyiida gaba Ng'utamiida, sea haleanjeeda sean mida jeeda.”

²⁷ Asi iiguurneey siida mandeawana masaweega hamiteaba shing'ada ak gigasayi beata, aga gida wassean sigoonyi nea adinyaashti ng'asheanda wassean aba gidamwachmwach fughareeda.

²⁸ (Ama deepa gwayeeshiineey sih, “Gili geataydaawa lukghumajeega,” iidu nea mang'uleey siida ghwanyawa rukuneey, ea aba gidamwachmwach fughareeda,

²⁹ gearugu gidida mwachmwach fughareadaanyiin, mii geagwa gil, adiidu giyaagi.) Ghwasaan abeeda inyas giibaldeanyu bea geaw jea goorgweaksa fughareemba siinuut?

³⁰ Abeeda iyaagi nea geabadiischeesi ASEETA, abeeda ghwasaan inyas geeng'eawean aba gili naabwachi ASEETEAN?

³¹ Asi iyooyeagiischi ghana iyooleeshi, ghana iyoosinyi ng'asheanda wassean, asina sean aba giigheambiita ASEETA.

³² Adoanung' goodiiy fuga Yahudi ghana gea Yunani ghana ganiiseeda ASEETA,

³³ asi gawuurji gidiisa eagasiidi aniini deahoosan buuneesean aba haleanjeeda sean easinyi, ak ea meagassi gideaba gaydanyagaada nea gabwageaw, geagasayi dea buuneesean, ak abeeda geelealu.