रोमियो 1 - पहाड़ी महासुईढाल 1 हाऊं पौलुस इऐं चिट्ठी लिखाऊ, ज़ुण यीशु मसीह रौ सेवक आ, परमेश्वरै हाऊं प्रेरित हुणा लै ऊ च़ुनौ औन्दौ, और परमेश्वरा री तिऐं खुशी री खौबरी रौ परचार कौरना लै अलग कौरी ऐरौ ऊ। 2 ज़ास खुशी री खौबरी लै तिणीऐ पैहला कु आपणै भविष्यवक्ता रै ज़ौरिऐ पवित्रशास्त्रा दी, 3 आपणै छ़ोहरु आमारै प्रभु यीशु मसीह रै बारै दी वायदौ किऔ थौ। ज़ो शरीरा कु ता दाऊद राज़ै रै वशां कु पैदौ हुऔ। 4 और पवित्र आत्मा री शक्ति कौरी सेऊ मौरै औन्दै मांझ़िऐ कु ज़िउंदै हुऔ। इणै कौरीऐ साबित हुऔ की सेऊ परमेश्वरा रौ छ़ोहरु आ। सेऊ यीशु मसीह आमारौ प्रभु आ। 5 मसीह रै ज़ौरिऐ आमुकै बौड़ी दया और प्रेरितु री सेवकाई मिली, कि तेसरै नाऊं री वज़ाह कु सारी ज़ाती रै लोग मसीह माथै विश्वास कौरीयौ तेसरी माना, 6 ज़ास मांझ़िऐ कु तुमै भी यीशु मसीह रै हुणा लै औटाऐ औन्दै ई। 7 इऐ चिट्ठी रोम इलाकै रै तिऊं सौभी रै नावां दी आ ज़ुण परमेश्वरा रै गौरतै ई, और तेसरै पवित्र लोग हुणा लै औटाऐ औन्दै ई। आमारै बाब परमेश्वर और प्रभु यीशु मसीह री तौरफा कु तुमुलै बौड़ी दया और शान्ति थाका मिलदै लागी। धन्यबादा री प्राथना 8 पैहलै हाऊं तुमु सारेऊ लै यीशु मसीह रै ज़ौरिऐ आपणै परमेश्वरा रौ धन्यबाद कौराऊ कि तुमारै विश्वासा री बुशै सारी धौतरी रै लोगु मांझ़िऐ ई औन्दै लागी ऐन्दी। 9 परमेश्वर ज़ासरी सेवा हाऊं आपणै पुरै ज़िवा कौरीऐ तेसरै छ़ोहरु री खुशी-खौबरी रै बारै दी कौराऊ, सेऊ ई मैरौ शाजत आ, की हाऊं आपणी प्राथना दी तुमु लगातार याद कौरदै थाकाऊ लागी, 10 और रोज़ आपणी प्राथना दी औरज़ कौराऊ कि परमेश्वरा री मौरज़ी रै मुताबिक तुमु कु मिलदै आशु। 11 कैलैकि हाऊं तुमु कु मिलणै री आश कौराऊ। ताकी हाऊं तुमुलै विश्वासा दी मज़बूत कौरना लै केज़ी आत्मिक आशीष देऊ ज़ेथ कौरी तुमै पाक्कै हुआ। 12 मैरौ मतलब इणौ आ कि हाऊं तुमु मांझ़िऐ दी हुइयौ, तुमु आइलै तेस विश्वासा रै ज़ौरिऐ ज़ो मुंदी, और तेस विश्वासा रै ज़ौरिऐ ज़ो तुमु दी आ, एकी दुजेऊ विश्वासा दी मज़बूत कौरदै रौआ। 13 और ओ प्यारै साथी विश्वासिउओ हाऊं नाईं च़ाहांदौ कि तुमै एज़ी बुशा कु अणज़ाण रौऔ कि मुंइऐ घौड़ी-घौड़ीऐ तुमु काऐ आशणौ च़ाऔ, कि ज़िणौ मुंइऐ दुजी ज़ातीऊ मांझ़िऐ च़ेलै चाणै ई तिणी ई तुमु मांझ़िऐ भी चाणु, पर इबी झ़ांऊ एथदी रुकावट थाकी पौड़दै लागी। 14 हाऊं युनानिऊ और दुजी बोली बोलणै वाल़ेऊ रौ, और बुद्धी वाल़ेऊ और ज़ासकै बुद्धी नाईं आसती तिऊं लोगु कै खुश-खौबरी शुणाउणै रौ करज़दार ऊ। 15 और हाऊं तुमुलै भी ज़ो रोमा इलाकै दी रौआ ई, खुशी री खौबर शुणाउणा लै बिलकुल तैयार ऊ। खुशी री खौबरी री तागत 16 कैलैकि हाऊं यीशु मसीह री खुश-खौबरी माथै पुरौ विश्वास कौराऊ, परमेश्वर आपणी शक्ति कौरीऐ तिऊं सौभीऊ बौच़ावा ज़ुण खुश-खौबरी माथै विश्वास कौरा ई, पैहलै यहुदी तेथ बासिऐ तिऊं ज़ुण यहुदी नाईं ई। 17 कैलैकि तिऐं खुश-खौबरी दी परमेश्वरा री धार्मिकता विश्वासा कु और विश्वासा लै पौगड़ी हुआ आ ज़िणौ पवित्रशास्त्रा दी आ लिखौ औन्दौ, “विश्वासा कौरीऐ धौर्मी लोग ज़िउंदै रौआ ई।” आदमी री ज़ाती रौ पाप 18 परमेश्वरा रै रोश ता तिऊं लोगु री सारी बुराई और अधर्मा दी सौरगा कु पौगड़ौ हुआ, ज़ुण आपणै बुरै काम कौरणै रै ज़ौरिऐ लोगु परमेश्वरा री सौच़्च़ाई ज़ाणना लै रोका ई। 19 एज़ी ताइंऐ कि परमेश्वरा रै बारै दी ज्ञान तिंउरै मौना दी पौगड़ौ आ कैलैकि परमेश्वरै आपु ऊ तिऊं माथै पौगड़ौ किऔ आ। 20 परमेश्वरा री सौदा री तागत और गुण नाईं देखिंदै। पर परमेश्वरा रै धौतरी चाणनै रै बौगता कु तिणीऐ इणौ देखा ई गौ कि इऐ कास ज़िणै ई। एथीलै तिऊं लोगु कै एज़ी बुशा लै केज़ौ बाहनौ नाईं आसतौ कि, “आमै परमेश्वर नाईं ज़ाणदै।” 21 इदरा झ़ाऊं कि तिंउऐ परमेश्वर ज़ाणियौ भी तेसरौ इज़्ज़तमान और धन्यबाद नाईं कियौ ज़ेथरै सेऊ लायक आ, पर गलत बिच़ार कौरदै लागै, इदरा झ़ांऊ कि तिंउऐ तिणौ नाईं सुंच़ौ ज़िणौ तिऊं सुंच़णौ च़ांई थौ। 22 सै आपुलै बुद्धिमान बोलीयौ मुर्ख बौणी गौऐ। 23 और तिंउऐ सौदा ज़िउंदै रौउणै वाल़ै और महिमा वाल़ै परमेश्वरा री भौक्ती पोरु छ़ाड़ियौ, नाश हुणै वाल़ै आदमी, और च़ौड़कु और धौण, और लौअराणै वाल़ै जन्तु री मुर्तिऊ री भौक्ती कौरी। 24 एज़ी वज़ाह कु परमेश्वरै सै तिंउरै मौना री इच़्छ़ा रै मुताबिक गान्दै कामा लै छ़ाड़ी गौऐ, कि सै आपु मांझ़िऐ आपणै शरीरा रै गांदै कामा कौरीयौ आपणी बेइज़्ज़ती कौरा। 25 कैलैकि तिंउऐ परमेश्वरा री सौच़्च़ाई बौदल़ियौ झ़ूठ चाणी गोई, और धौतरी री आराधना और सेवा की, ना कि तेस धौतरी चाणनै वाल़ै री ज़ो सौदा बौड़ाई रै लायक आ। आमीन। 26 एथीलै परमेश्वरै सै बुरै बिच़ारा रै वशा दी छ़ाड़ी गौऐ। इदरा झ़ांऊ की तिउंरी छ़ेउड़ी भी ज़ाइज़ रिश्तै छ़ाड़ियौ नाज़ाइज़ रिश्तै छ़ाड़दै लागी। 27 तिणी ई मौरद भी छ़ेउड़ी आइलै ज़ाइज़ रिश्तै छ़ाड़ियौ आपु मांझ़िऐ गान्दै काम कौरीयौ बरबाद औन्दै लागै, और मौरदुऐ-मौरदु आइलै गान्दै काम कौरीयौ आपणी गौलती री ठीक सौज़ा पाई। 28 ज़ेबी तिंउऐ परमेश्वर नाईं पराणनौ च़ाऔ, ता परमेश्वरै भी सै तिउंरै निकामै मौना रै वशा दी छ़ाड़ी गौऐ कि सै गान्दै काम कौरा। 29 एथीलै सै सारै रौंगा रै अधर्मी, बुराई, और लोभ, और कूड़-कौपटा कु भौरुइऔ। और चिड़नौ, और लोऊ, और झ़ौगड़ै, और छल-कपट, और मीशा कु भौरुइऔ, और चुगली वाल़ै, 30 बदनाम कौरणै वाल़ै, परमेश्वरा कु नफरत कौरणै वाल़ै, दुजेऊ री इज़्ज़त नाईं कौरणै वाल़ै, घमण्डी, शेखी मारनै वाल़ै, बुरी-बुरी बुशेऊ मानणै वाल़ै, मां बाबा री हुकम नाईं मानणै वाल़ै, 31 बिण औकली वाल़ै, विश्वासा दी धोखौ दैणै वाल़ै, आच़्छ़ै प्यारा रै बिणा काठै बौणी गौऐ ई। 32 सै ता परमेश्वरा री इऐं विधी ज़ाणाई, कि इणै-इणै काम कौरणै वाल़ै मौरणा री सौज़ा रै लायक ई, तैबै भी ना सिरफ आपु ई एज़ै काम कौरदै, पर इणै काम कौरणै वाल़ेऊ कु खुश भी हुआई। |
This work is licensed under Creative Commons Attribution-ShareAlike 4.0 License.