फिलेमोन 1 - पहाड़ी महासुईढाल 1 हाऊं पौलुस ज़ुण यीशु मसीह री सेवा कौरणै री वज़ाह कु ज़ेला दी ऊ, तुमुलै इऐं चिट्ठी लिखाऊ। आमारै विश्वासी भाई तीमुथियुसा री तौरफा कु भी ताऊं फिलेमोना लै ढाल। तू आमारौ साथी गोश्टण ई और आमु ज़िणी मसीह री सेवा कौरा ई। 2 आमारी विश्वासी बौइण अफफिया, और आमारै विश्वासी भाई अरखिप्पुसा लै भी ज़ुण प्रभु री सेवा एक सिपाई ज़िणी कौरा ई ढाल, और तिऊं विश्वासिऊ लै भी ज़ुण फिलेमोना रै घौरा दी प्रभु री आराधना कौरना लै कौट्ठै हुआई। 3 हाऊं प्राथना कौराऊ कि आमारौ बाब परमेश्वर और प्रभु यीशु मसीह री बौड़ी दया और शान्ति तुमुलै मिलदै थाका लागी। फिलेमोना रौ प्यार और विश्वास 4 हाऊं सौदा परमेश्वरा रौ धन्यबाद कौराऊ, और आपणी प्राथना दी भी ताऊं याद कौराऊ, 5 कैलैकि हाऊं तैरै तेस प्यार और विश्वासा री बुशै शुणियौ, ज़ो सौभी पवित्र लोगु आइलै, प्रभु यीशु माथै आ। 6 हाऊं प्राथना कौराऊ कि तैरै विश्वासा दी भागीदार हुणौ, तुमारी सारी भौलाई री निशाणी दी, मसीहा कालै असरदार ई। 7 कैलैकि ओ भाई, मुलै तैरै प्यारा कु भौरी खुशी और शान्ति मिली, एथीलै कि तैरै ज़ौरिऐ पवित्र लोगु रै मन हौरै-भौरै हुई गौऐ आ। पौलुसा रौ उनेसिमुस नावां रै आदमी लै औरज़ 8 एथीलै अगर मुलै मसीहा दी बौड़ी हिम्मत ता आ, कि ज़ो बुशै ठीक आ, तेसरौ हुकम ताउंलै दैऔ। 9 तैबै भी मुलै बुड़ै पौलुसा लै ज़ो आबै मसीह यीशु री सेवा री वज़ाह कु कैदीऊ, एऊ औज़ौ भी आच़्छ़ौ ज़ाणुऔ कि प्यारा कौरी औरज़ कौरु। 10 हाऊं आपणै छ़ोहरु ज़िणै उनेसिमुसा लै ताऊं कु औरज़ कौराऊ। ज़ुण ज़ेला दी मैरै ज़ौरिऐ विश्वासा दी आशौ आ। 11 सेऊ ता पैहलै तैरै कुछ़ भी कामा रौ नाईं थौ, पर आबै तैरै और मैरै दुइआ रौ बौड़ै कामा रौ आ। 12 सेऊ ऊ मतलब-ज़ो मैरै ज़िवा रौ टुकड़ौ आ, मुंइऐ सेऊ ताऊं काऐ भेज़ी ऐरौ आ। 13 तेस हाऊं आपु काऐ छ़ाड़णौ च़हा थौ कि तेरी तौरफा कु एस कैदा दी ज़ो खुशी री खौबरी रौ कारण आ, मेरी सेवा कौरालौ। 14 पर मुंइऐ तेरी इच़्छ़ा रै बिणा कुछ़ भी कौरणौ नाईं च़ाऔ कि तेरी एज़ी दया, दबाव कु नाईं पर खुशी कौरी च़ांई हुऔ। 15 कैलैकि का पौतौ सेऊ ताऊं कु कुछ़ दिना झ़ांऊ एज़ै कारण अलग हुऔ कि सौदा ताऊं आइलै रौऊ। 16 पर इबी कु दासा रै ज़िणौ नाईं, पर दासा कु भी आच़्छ़ौ मतलब भाई ज़िणौ रौऊ, ज़ो शरीरा दी भी और खासकर प्रभु दी भी मैरौ प्यारौ औलौ। 17 एथीलै अगर तू मुं आपणौ साथी सौमझ़ा ई, ता तेस इणै कौरी ग्रहण कर ज़िणौ हाऊं कियौ ऊ। 18 और अगर तिणीऐ तैरौ कुछ़ नुकसान कियौ आ, या तेस माथै तैरौ कुछ़ आशा सा, ता मैरै खातै दी लिख। 19 हाऊं पौलुस आपणै हाथा कौरी लिखाऊ, कि हाऊं आपु ई भौराऊ, याद छ़ाड़ै कि तेरी ज़िन्दगी भी मेरी करज़दार आ। 20 ओ भाई, इऐ खुशी मुलै प्रभु दी तेरी तौरफा कु मिला मसीहा दी मैरौ मन हौरौ भौरौ कर। 21 हाऊं तैरै आज्ञाकारी हुणै रौ भरोसौ छ़ाड़ियौ, ताउंलै लिखाऊ और इणौ ज़ाणाऊ, कि ज़ो कुछ़ हाऊं बोलाऊ, तू तेसकु भी बौड़ियौ कौरा ई। 22 और एऊ भी, कि मुकालै रौइणा लै ज़ागाह तैयार छ़ाड़, मुकै आश आ, कि परमेश्वर तुमारी प्राथना रौ ज़वाब ज़रूर दिया कि हाऊं तुमु काऐ आशु। आखरी ढाल 23 इपफ्रास भी ज़ुण मसीह यीशु दी मुं आइलै कैदा दी आ। 24 और मरकुस और अरिस्तर्खुस और देमास और लुका ज़ो मैरौ साथी आ इऊं री ताऊं लै ढाल। 25 आमारै प्रभु यीशु मसीहा री बौड़ी दया तुमारी आत्मा माथै औन्दै थाका लागी। आमीन। |
This work is licensed under Creative Commons Attribution-ShareAlike 4.0 License.