1 तीमु 1 - पहाड़ी महासुईढाल 1 हाऊं पौलुस तुमुलै इऐं चिट्ठी लिखाऊ। ज़ुण आमारै छ़ुटकारै दैणै वाल़ै परमेश्वर और यीशु मसीह ज़ास माथै आमै आश छ़ाड़ी, तिउंरै हक्का कौरीऐ हाऊं यीशु मसीह रौ प्रेरित ऊ। 2 तीमुथियुसा रै नावां ई, ज़ुण विश्वासा ई मैरौ सौच़्च़ौ मांऊ आ, बाब परमेश्वर और आमारै प्रभु यीशु मसीह री तौरफा कु तुमुलै बौड़ी दया, कृपा और शान्ति मिलदै थाकाली लागी। गलत शिक्षा देणै वाल़ै रै बारै दी खौबरदार कौरणै 3 ज़िणौ मुंइऐ मकिदुनीया लै डेउंदी बारै तू सौमझ़ाऔ थौ, कि इफिसुसा ई रौइऔ कुछ़ लोगु खौबरदार कर कि सै बहकाउणै वाल़ी शिक्षा ना दिया, 4 तुमै तिऊं बणाउटी और बुज़ुर्गा री काअणिऊ माथै ज़िऊ ना लाएऊ, ज़ेथ कौरी झ़ौगड़ै हुआई, इणै झ़ौगड़ै कासी भी परमेश्वरा रै कामा कौरना लै मज़द नाईं कौरदै। इणौ काम तैबै हुई सौका सा अगर कुण परमेश्वरा माथै विश्वास कौरालै। हाऊं तुमुलै तौंइऐ सेज़ी बूश बोलाऊ ज़ेथरी मुइंऐ तुमु कु औरज़ कौरी थी। 5 एस हुकम दैणै रौ मैरौ मकसद एऊ आ कि तुमै एकी दुजेऊ आइलै साफ ज़िऊ और आच़्छ़ै मन और बिणा कौपट वाल़ै विश्वासा कौरी प्यार कौरा। 6 कुछ़ लोग इणै ई ज़ुणिऐ इऐ सौच़्च़ाई री बुशै छ़ाड़ी गोई और बेकार बुशु भिलै फिरी गौऐ। 7 सै मुसा रै नियमा रै ज्ञानी ता बौणनै च़ाहा ई पर सै नाईं ज़ाणदै कि सै का ई लागै औन्दै बोलदै तैबै भी सै बौड़ै विश्वासा कौरी बोलाई। 8 आमै ज़ाणी आ कि अगर कुण नियम ठीक रीती कौरी कामा दी आणाई ता इऐ भौली आ। 9 आमै इणौ भी ज़ाणी ई कि नियम धौर्मी लोगु लै नाईं पर तिउंलै ई ज़ुण परमेश्वरा रै नियम नाईं मानदै, भौक्ती नाईं कौरदै, पापी, अपवित्र और अशुद्ध आदमी, मां-बाबा रौ खून कौरणै वाल़ै, खुनी, 10 गान्दै काम, आदमी रै आदमी आइलै गान्दै काम कौरणै वाल़ै, लोगु बेच़णै वाल़ै, झ़ूठ बोलणै वाल़ै, और झ़ुठी कसम खाणै वाल़ै, और इऊं छ़ाड़ियौ आच़्छ़ी शिक्षा रै सारै बिरोधिऊ लै आ चाणी ऐन्दी। 11 इऐ ठीक शिक्षा आमारै बौड़ाई रै लायक परमेश्वरा री महिमा तिऐं खुश-खौबरी रै मुताबिक आ ज़ो मुकै आ सांबी ऐन्दी। बौड़ी दया लै धन्यबाद 12 हाऊं आमारै प्रभु यीशु मसीह रौ धन्यबाद दियाऊ, ज़ुणिऐ मुलै तागत देई आ, कि तिणीऐ हाऊं विश्वास वाल़ौ सौमझ़ियौ आपणी सेवा कौरना लै च़ुनौ ऊ। 13 हालांकी हाऊं ता पैहलै मसीह री बुराई कौरणै वाल़ौ, विश्वासिऊ सताउणै वाल़ौ और निरदई आदमी थौ। तैबै भी मसीहीऐ मुं माथै दया कौरी, कैलैकि मुंइऐ बिणा ज़ाणी-बुज़ियौ और अविश्वासा री वज़ाह कु इऐ काम कियै थै। 14 और आमारै प्रभु यीशु री बौड़ी दया मुं माथै तेस विश्वास और प्यारा आइलै ज़ो मसीह यीशु दी आ, बौड़ी-च़ौड़ीऔ हुई। 15 इऐ बूश सौच़्च़ी और सारी तौरफा कु मानणै रै लायक आ कि मसीह यीशु पापीऊ लै छ़ुटकारौ दैंदै धौतरी दी आशौ ज़ास मांझ़िऐ हाऊं सौभी कु बौड़ौ पापीऊ। 16 पर मुं माथै एथलै दया हुई कि मुं सौभी कु बौड़ै पापी दी यीशु मसीह आपणी सारी सहनशीलता देखाल़ा, कि ज़ो लोग तेस माथै सौदा री ज़िन्दगी लै विश्वास कौरालै, तिउंलै हाऊं एक औनैणौ बौणु। 17 आबै सौदा रौ राज़ौ, केबी ना खातम हुणै वाल़ौ, अणदेखौ, सिरफ परमेश्वरा री इज़्ज़त और महिमा जुगै-जुगै झ़ाऊं थाका औन्दै लागी। आमीन। 18 ओ मैरौ छ़ोहरु तीमुथियुस, तिऊं भविष्यवाणीऊ रै मुताबिक ज़ो पैहलै तैरै बारै दी कौरी थी, हाऊं ताउंलै एज़ौ हुकम दिआऊ ताकी तू तिंउरै मुताबिक खुश-खौबरी लै आच़्छ़ी लड़ाई लौड़ी सौका, 19 और ताऐं मसीह माथै सौदा विश्वास कौरणौ च़ांई और तू तेसी कर ज़ास तू ज़ाणाई कि ठीक आ। कुछ़ लोगुऐ एथ माथै ध्यान नाईं दैऔ ज़ेथरौ नौतिज़ौ इयौ कि तिंउऐ आबै मसीह माथै विश्वास कौरणौ पोरु छ़ाड़ी गौ आ। 20 मुइंऐ तिऊं मांझिया कु हुमिनयुस और सिकन्दर नावां रै आदमी कलिसिया कु पोरु गाड़ी गौऐ ई, और शैताना रै हाथा दी सांबी गौऐ ताकी सै शिखा कि परमेश्वरा री बुराई नाईं च़ांई कौरणी। |
This work is licensed under Creative Commons Attribution-ShareAlike 4.0 License.