1 यहुन्ना 1 - पहाड़ी महासुईज़िन्दगी रौ वचन 1 हाऊं, यहुन्ना तुमुलै एकी आदमी रै बारै दी लिखाऊ, ज़ो ज़िन्दगी रौ वचन आ। सेऊ पैहला ओउलै थौ, सेऊ आमुऐ शुणौ, आपणी आखी कौरी देखौ और हाथा कौरी छ़ुऔं आ। 2 सेऊ ज़ुण ज़िन्दगी दिया, धौतरी माथै पौगड़ौ हुऔ और आमुऐ सेऊ देखौ, और तेथरी गवाही देई ई, और तुमुलै सौदा री ज़िन्दगी री खौबर देई ई ज़ो बाबा आइलै थौ और आमु माथै पौगड़ौ हुऔ आ 3 ज़ो कुछ़ आमुऐ देखौ और शुणौ आ तेसरी खौबर तुमुकै भी बोली ई, ताकी तुमै भी आमु आइलै शामिल हुआई। और आमारौ एऊ साथ बाबा आइलै और तेसरै छ़ोहरु प्रभु यीशु मसीह आइलै आ। 4 और इऐ बुशै आमै एथीलै लिखी ताकी आमारी खुशी पुरी औआ। प्याशै ई आण्डणौ 5 ज़ो खौबर आमुऐ यीशु कु शुणी आ और तुमुकै शुणाई, सै इऐ आ कि परमेश्वर प्याशौ आ, और तेथदी कोई भी न्यारौ नाईं आ। 6 अगर आमै बोलु लै कि आमै तेसरै साथा दी ई और आपु हाण्डा लै न्यारै दी, ता आमै झ़ुठे ई और सौच़्च़ाई माथै नाईं च़ालदै। 7 पर ज़िणौ परमेश्वर प्याशै दी आ तिणी ई आमै भी प्याशै दी ज़िऊ लै, ता एकी दुजै आइलै साथ दी ई, और परमेश्वरा रै छ़ोहरु प्रभु यीशु रौ लोऊ आमु सारै पापा कु शुद्ध कौरा आ। 8 अगर आमै बोलु लै कि आमुदी कोई भी पाप नाईं आ, ता आपुलै धोखौ देई, और आमुदी सौच़्च़ाई नाईं आ। 9 अगर आमै आपणै पाप मानु लै, ता सेऊ आमारै पाप माफ कौरना लै और आमु सारी बुराई कु शुद्ध कौरना लै विश्वास वाल़ौ और धौर्मी आ। 10 अगर आमै बोलु लै कि आमुऐ पाप नाईं कियौ ता परमेश्वर झ़ुठौ चाणी और इबी झ़ाऊं आमुऐ परमेश्वरा रै वचन नाईं अपणाऐ। |
This work is licensed under Creative Commons Attribution-ShareAlike 4.0 License.