Izililo 5 - IBhayibhili Elingcwele LesiNdebele

¹ Oh Thixo, khumbula okusehleleyo khangela ubone ukuyangeka kwethu.

² Ilifa lethu seliphiwe abezizweni, imizi yethu yathathwa ngabemzini.

³ Sesizintandane ezingelaboyise, omama sebenjengabafelokazi.

⁴ Amanzi okunatha siyawathenga; inkuni zethu zikhutshelwa imali.

⁵ Labo abasixotshayo basihlezi ezithende; sikhathele asilakuphumula.

⁶ Sazinikela kwabeGibhithe labe-Asiriya ukuze sizuze isinkwa.

⁷ Okhokho benza isono kodwa kabasekho, thina yithi esesijeziswa.

⁸ Sibuswa yizigqili, kakho osikhululayo ezandleni zazo.

⁹ Isinkwa sisithola ngendlela eyingozi ngenxa yenkemba ekhona enkangala.

¹⁰ Isikhumba sethu sitshisa njengeziko, silomkhuhlane wendlala.

¹¹ Abesifazane bayahlukuluzwa eZiyoni kanye lezintombi ezigcweleyo emadolobheni akoJuda.

¹² Amakhosi alengisiwe ngezandla zawo; abadala abasahlonitshwa.

¹³ Izinsizwa ziyahoqiswa ematsheni okuchola; abafana babhensiswa yimithwalo yenkuni.

¹⁴ Abadala sebesukile esangweni lomuzi; izinsizwa sezithule ukuhlabelela.

¹⁵ Ukuthokoza akusekho ezinhliziyweni zethu; ukugida kwethu sekuphenduke ukukhala.

¹⁶ Umqhele usuwile ekhanda lethu. Maye thina, ngoba sonile!

¹⁷ Ngenxa yalokhu inhliziyo zethu zibuthakathaka; ngenxa yalezizinto amehlo ethu ayafiphala,

¹⁸ ngoba intaba iZiyoni silugwadule, sekucathama amakhanka kuyo.

¹⁹ Wena, Oh Thixo, busa nini lanini; ubukhosi bakho buhlezi kuzozonke izizukulwane.

²⁰ Kungani uhlezi usikhohlwa? Usifulathelelani isikhathi eside kangaka na?

²¹ Sibuyisele kuwe, Oh Thixo, ukuze siphenduke; buyisa kabutsha insuku zethu njengezakudala,

²² ngaphandle kokuba nxa ususilahle kokuphela wasizondela ngokungalinganisekiyo.