Isambulo 15 - IBhayibhili Elingcwele LesiNdebele

Izingilosi Eziyisikhombisa Lezifo Eziyisikhombisa

¹ Ezulwini ngabona esinye isibonakaliso esikhulu lesimangalisayo: Izingilosi eziyisikhombisa zilezifo zokucina eziyisikhombisa, ezokucina ngoba ngazo ulaka lukaNkulunkulu luyapheleliswa.

² Ngabuya ngabona okwakungathi lulwandle lwamangilazi axutshaniswe lomlilo njalo eceleni kolwandle kwakumi labo ababesinqobile isilo lomfanekiso waso kanye lenombolo yebizo laso. Babephethe amachacho ababewaphiwe nguNkulunkulu

³ behlabela ingoma kaMosi inceku kaNkulunkulu kanye lengoma yeWundlu besithi: “Mikhulu iyamangalisa imisebenzi yakho Nkosi Nkulunkulu Somandla. Zilungile njalo ziqotho izindlela zakho, Nkosi yezikhathi zonke.

⁴ Ngubani ongayikukwesaba wena Nkosi, adumise ibizo lakho na? Ngoba nguwe kuphela ongcwele. Zonke izizwe zizakuza zikhonze phambi kwakho, ngoba imisebenzi yakho elungileyo isibonakalisiwe.”

⁵ Emva kwalokhu ngakhangela ngabona ezulwini ithempeli, okulithabanikeli lobufakazi livuliwe.

⁶ Ethempelini kwaphuma izingilosi eziyisikhombisa zilezifo eziyisikhombisa. Zazigqoke ilembu elihlanzekileyo, elicazimulayo njalo zibophe izifuba zazo ngamabhanti egolide.

⁷ Esinye sezidalwa ezine eziphilayo sanika izingilosi eziyisikhombisa imiganu yegolide eyisikhombisa igcwele ulaka lukaNkulunkulu ophila kuze kube nininini.

⁸ Ithempeli lagcwala intuthu evela enkazimulweni kaNkulunkulu lasemandleni akhe, njalo kakho owayengangena ethempelini izifo eziyisikhombisa zezingilosi eziyisikhombisa zingakapheli.