UThithu 3 - iBhayibhili Elingcwele 1978

¹ Bakhumbuze ukuba bazehlisele ngaphansi kwababusi leziphathamandla, balalele, balungele imisebenzi yonke emihle,

² bangahlebi muntu, bangabi yizilwi, babe mnene, bahloniphe bonke abantu.

³ Ngoba lathi kade sasiyiziphukuphuku, singalaleli, sikhohliswa, sifuywe yizinkanuko lokuzithokozisa okunenginengi, sihlezi ebubini langomhawu, sizondeka ebantwini bonke, sizondana.

⁴ Kodwa lapho sekufikile ukulunga lesihawu sikaNkulunkulu uMsilisi wethu

⁵ wasisilisa, kungesikho ngezenzo zokulunga esazenzayo thina kodwa ngokwesihawu sakhe, ngokugeziswa kokuzalwa kutsha lokuvuselelwa ngoMoya oNgcwele.

⁶ Ngoba wamthela kakhulu phezu kwethu ngoJesu Kristu uMsilisi wethu,

⁷ ukuze silungisiswe ngomusa wakhe, sibe yizindlalifa zokuphila okungapheliyo ngokuthemba.

⁸ Liqinisile lelilizwi. Ngithanda ukuba uqinise impela ngalezizinto, ukuze abakholwa kuNkulunkulu bakhuthalele ukwenza imisebenzi emihle. Lezizinto zinhle zilosizo ebantwini.

⁹ Kodwa imibuzo yobuthutha uyixwaye, lendaba zosendo olokuzalana, lombango, lokuphikisana ngomlayo; ngoba lokho kakusizi, kuyize.

¹⁰ Umuntu olesifundiso esiduhisayo, eselulekwe kanye lakabili, mdele,

¹¹ wazi ukuthi onjalo mubi, uyona, uyazilahla yena.

Isicino

¹² Nxa sengithume uArtema loba uTikiko kuwe, uphangise uze kimi eNikapoli, ngoba ngizimisele ukuhlala khona ebusika.

¹³ UZena ummeli loApolo ubakhuthaze ekuhambeni kwabo, ubone ukuba kabasweli lutho.

¹⁴ Abakithi kabafunde ukukhuthalela imisebenzi emihle, ukuze bakwazi ukusiza abaswelayo, bangabi ngabangelazithelo.

¹⁵ Bonke abalami bayakubingelela. Bingelela abasithandayo ekukholweni. Umusa kawube lani lonke.