UThithu 2 - iBhayibhili Elingcwele 1978

Ukuhamba okuqotho

¹ Kodwa wena, fundisa lokho okufanele isifundiso esiqotho.

² Weluleke amadoda amadala ukuba abe ngazithintayo, abe qotho, abe ngaqondileyo, aqine ekukholweni, lasothandweni, lasekubekezeleni.

³ Ngokunjalo weluleke labesifazana abadala ukuba baziphathe ngokufaneleyo, bangabi ngabahlebayo, bangafuywa yikunatha; kababe ngabafundisi bokuhle,

⁴ ukuze bafundise abesifazana abatsha ukuthanda omkabo labantwana babo,

⁵ babe ngabaqondileyo, abaziphatha kuhle, abaphatha kuhle amakhaya abo, abalomusa, abazehlisela ngaphansi kwabomkabo, ukuze ilizwi likaNkulunkulu lingadunyazwa.

⁶ Ngokunjalo ubalaye abesilisa abatsha ukuba bazithinte.

⁷ Kukho konke wena ube yisibonelo ngezenzo ezinhle, lasekufundiseni kwakho ubonakalise ubuqotho lokuqonda,

⁸ ukhulume okuqondileyo okungasolekiyo, ukuze omelana lathi abe lenhloni, aswele ulutho olubi angalukhuluma ngathi.

⁹ Luleka izigqili ukuba zizehlisele ngaphansi kwamakhosi azo, zikholeke ezintweni zonke, zingabi lankani,

¹⁰ zingantshontshi, zithembeke ezintweni zonke, ukuze zicecise isifundiso sikaNkulunkulu kukho konke.

¹¹ Ngoba umusa kaNkulunkulu usufikile uletha ukusiliswa ebantwini bonke,

¹² usifundisa ukuba sidele ububi lenkanuko zomhlaba, sihambe ngokuqonda langokulunga langobuqotho kulumhlaba,

¹³ silindele ithemba elibusisiweyo lokubonakala kwenkazimulo kaNkulunkulu wethu omkhulu loMsilisi wethu uJesu Kristu.

¹⁴ Yena wazinikela ngenxa yethu ukuze asihlenge ebubini bonke, lokuzihlambululela abantu abangabakhe abatshisekela izenzo ezinhle.

¹⁵ Tshumayela lezizinto, ulaye, ukhuze ngamandla wonke. Ungadelelwa muntu.