UThithu 1 - iBhayibhili Elingcwele 1978

Isibingelelo

¹ Mina Pawuli, inceku kaNkulunkulu lomphostoli kaJesu Kristu wokwakha ukukholwa kwabakhethiweyo bakaNkulunkulu lowokwandisa ukwazi iqiniso elimayelana lokukhonza uNkulunkulu,

² ngilethemba lokuphila okungapheliyo, uNkulunkulu ongaqambi manga akuthembisa ekuqaleni kwesikhathi.

³ Ngesikhathi esifaneleyo wabonakalisa ilizwi lakhe ngentshumayelo engayiphathiswa ngokulaya kukaNkulunkulu uMsilisi wethu.

⁴ Ngithi kuTitosi umntanami impela ngokukholwa esikuhlanganyele sonke: Kakube kuwe umusa lokuthula okuvela kuNkulunkulu uBaba lakuKristu Jesu uMsilisi wethu.

Ukubekwa kwabadala bebandla. Abafundisi bamanga

⁵ Ngakutshiya eKrete ukuba ulungise lokho okwasilela ukulungiswa, ubeke abadala bebandla emizini yonke, njengoba ngakulaya,

⁶ uba kukhona ongasolekiyo, indoda elomfazi munye, elabantwana abakholwayo abangasolwa ngokuganga loba ngokungalaleli.

⁷ Ngoba umalusi webandla uyinceku kaNkulunkulu, kumele abe ngongasolekiyo longaziqakisiyo, longathukutheli masinyane, longesiso isidakwa, longathandi ukulwa, longafisi inzuzo.

⁸ Kodwa kabe ngophatha kuhle izihambi, lothanda okuhle, loziphathayo, loqondileyo, longcwele, lozithintayo.

⁹ Kabambelele elizwini elithembekileyo ngokwesifundiso esiqotho ukuze abe lamandla okweluleka ngokusifundisa okuqotho lokwehlula labo abaphikisayo.

¹⁰ Ngoba banengi abangalaleliyo, abakhuluma ize labakhohlisayo, ikakhulu bona abokusoka,

¹¹ okumele ukuba bathuliswe, lokhu bechitha imizi ngokufundisa okungafanelanga befuna inzuzo.

¹² Omunye kibo umprofethi wabo wathi: AbaseKrete bangabaqambi bamanga, izilo ezimbi, iziminzi ezivilaphayo.

¹³ Lobubufakazi buqinisile. Ngakhoke ubalayisise ukuze baqine ekukholweni,

¹⁴ bangalaleli inganekwane zabaJuda lemithetho yabantu abadela iqiniso.

¹⁵ Kwabahlambulukileyo konke kuhlanzekile, kodwa kwababi labangakholwayo kakukho lutho oluhlanzekileyo, ngoba zonakele ingqondo zabo lezazela zabo.

¹⁶ Bathi bayamazi uNkulunkulu, kodwa bemphika ngezenzo zabo; bangabenyanyekayo, labangalaleliyo, lasemisebenzini yonke emihle kabasizi lutho.