UNehemiya 6 - iBhayibhili Elingcwele 1978

Amacebo ezitha zikaNehemiya

¹ Kwathi lapho bebikelwa oSanibalati loTobiya loGeshema umArabiya lazo zonke izitha zethu ukuthi sengiwakhile umduli lokuthi kakulasikhala kuwo, lanxa ngalesosikhathi ngangingakafaki izivalo emasangweni,

² oSanibalati loGeshema bathumela ilizwi kimi besithi: Woza sihlangane komunye wemizi esemagcekeni aseOno. Kodwa babeqonde ukungilimaza.

³ Ngathumela izithunywa kubo ngathi: Ngenza umsebenzi omkhulu, ngingeke ngize. Ngizamiselani umsebenzi ukuba ngize kini na?

⁴ Bathuma ilizwi kimi kwaze kwaba kane ngaleyondlela, lami ngabaphendula ngokunjalo.

⁵ Ngokunjalo futhi uSanibalati ngokwesihlanu wathumela kimi inceku yakhe iphethe incwadi evulekileyo,

⁶ elotshwe ukuthi: Kuzwakele ezizweni, loGeshema uyakuvuma, ukuthi wena labaJuda lifuna ukuhlamuka; yikhonje lisakha umduli; kuthiwa wena ufuna ukuba yinkosi yabo.

⁷ Futhi umisile abaprofethi ukuba bamemezele ngawe eJerusalema, bathi: Kukhona inkosi koJuda. Inkosi izakukuzwa lokhu. Wozake wena, sikhulumisane.

⁸ Ngasengithumela ilizwi kuye ngisithi: Kazikho lezizinto ozitshoyo, uyazicabangela nje.

⁹ Ngoba bonke babefuna ukusethusa, bethemba ukuthi sizayekela umsebenzi, ungabe usenziwa. Lokho kwangikhuthaza, ngaphikelela.

¹⁰ Kwathi sengingenile endlini kaShemaya indodana kaDelaya kaMehetabeli owayezivalele endlini yakhe, yena wathi: Asihlangane ethempelini, sivale iminyango yalo, ngoba bayeza ukukubulala, bayeza ebusuku.

¹¹ Kodwa mina ngathi: Kambe umuntu onjengami angabaleka na? Nguwuphi umuntu onjengami ongangena ethempelini abuye aphile na? Kangiyikuyangena.

¹² Ngasengibona ukuba uNkulunkulu wayengamthumanga, kodwa wakhuluma lokho ngami ngoba oTobiya loSanibalati babemthengile.

¹³ Babemthengele ukungethusa ukuba ngivume ngenze isono, besebenginika ibizo elibi, bangigcone.

¹⁴ Ngakhuleka ngathi: Nkulunkulu wami, bakhumbule oTobiya loSanibalati ngalezizinto abazenzileyo, kanye lomprofethikazi uNowadiya labaprofethi bonke ababefuna ukungethusa.

¹⁵ Kwaphelake ukwakhiwa komduli ngosuku lwamatshumi amabili lanhlanu lwenyanga kaEluli ngemva kwensuku ezingamatshumi amahlanu lambili.

¹⁶ Kwathi lapho zonke izitha zethu zisizwa ngakho, lazo zonke izizwe ezisizingelezeleyo zikubona, zathi kungumsebenzi omangalisayo; zakubona ukuba lumsebenzi wenziwe ngamandla kaNkulunkulu wethu.

¹⁷ Ngaso sonke lesosikhathi izikhulu zakoJuda zazilokhu zithumela incwadi ezinengi kuTobiya, laye eziphendula.

¹⁸ Ngoba abanengi koJuda babehlomulelana laye ngoba wayengumkhwenyana kaShekaniya indodana kaAra, lendodana yakhe uJehohanani wayethethe indodakazi kaMeshulamu indodana kaBerekiya.

¹⁹ Babehlala bembabaza phambi kwami, bemtshela lezinto engangizitsho. UTobiya laye wayengilobela incwadi zokungethusa.