UNahume 3 - iBhayibhili Elingcwele 1978

Ukuchithwa kweNineve

¹ Maye kumuzi ogcwele igazi, wonke ugcwele amanga lempango! Ukuphanga kakupheli kiwo.

² Zwanini ukukhala kwesiswepu lomsindo wokugedlezela kwamavili, lowamabhiza amathayo, lowenqola zokulwa ezigijimayo.

³ Abagadi bamabhiza bayasukela; kubonakala ukuphazima komhedla, lokucwazimula komkhonto; banengi ababuleweyo; kukhona inqwaba zezidumbu, izidumbu ezinengi ezingelakuphela; abantu bayakhubeka phezu kwazo.

⁴ Konke lokhu kungenxa yokuphinga okunengi kwesiphingi esibukekayo langenxa yamalumbo aso abulalayo, esithengisa izizwe ngokuphinga kwaso labantu ngamalumbo aso.

⁵ Khangela, ngimelene lawe, kutsho iNkosi yamabandla; ngizakwambula izidwaba zakho, ngitshengise izizwe ubunqunu bakho, lemibuso ihlazo lakho.

⁶ Ngizaphosela amanyala phezu kwakho, ngikuthele ihlazo, ngikwenze ube yinto yokubukelwa.

⁷ Bonke abakubonayo bazakukubalekela, bathi: INineve lichithekile. Ngubani ozalililela na? Ngizakulidingela ngaphi abaduduzi na?

⁸ Wena Nineve, ungcono yini kulomuzi waseThebesi owawungasemfuleni uNile, uzingelezelwe ngamanzi, omthangala wawo wawululwandle, lamanzi engumduli wawo na?

⁹ IEtiyopiya leGibithe kwakungamandla alo angelakuphela; iPuti leLibiya kwakungabasizi balo.

¹⁰ Kanti lathunjwa laya ekuthunjweni, lezingane zalo zachotshozwa engonsini zazo zonke indlela; kwenziwa inkatho ngezikhulu zalo, labo bonke abakhulu balo babotshwa ngamaketane.

¹¹ Laweke uzadakwa, uyendezele; udinge isiphephelo sokubalekela izitha.

¹² Inqaba zakho zonke zinjengezihlahla zemikhiwa ezilezithelo ezivuthiweyo, uba zinyikinywa, izithelo ziwela emlonyeni wodlayo.

¹³ Amabutho akho anjengabesifazana nje. Amasango elizwe lakho avulekele izitha zakho; umlilo uyiqedile imigoqo yawo.

¹⁴ Zikhelela amanzi ulungisele ukuvinjezelwa, uqinise inqaba zakho; ngena odakeni, uxove ibumba, ulungise ibhokisi lokubumba izitina.

¹⁵ Lalapho umlilo uzakukuqeda, lempi ikubulale. Zandise njengesikhongwane, uzandise njengezintethe.

¹⁶ Wandise abathengisi bakho baze badlule inkanyezi zezulu. Kodwa kabasekho njengesikhongwane eselula impiko zaso, siphaphe, sihambe.

¹⁷ Izikhulu zakho zinjengezintethe, lababhali bakho banjengomhlambi wesikhongwane esihlala othangweni ngosuku oluqandayo; lapho ilanga seliphumile, siyasuka siphaphe, singabe sizaziwa ukuba singaphi.

¹⁸ Abelusi bakho balele, nkosi yaseAsiriya, lezikhulu zakho ziyawozela. Abantu bakho bahlakazekile ezintabeni, kakho obabuthayo.

¹⁹ Kakukho okukupholisa ukulimala kwakho, inxeba lakho libi; bonke abezwa umbiko ngawe batshaya izandla. Ngoba ngubani obungafinyelelanga kuye ububi bakho na?