UNahume 2 - iBhayibhili Elingcwele 1978

¹ Umchithi ukufikele, wena Nineve, gcina inqaba zakho, ulinde indlela, ume isibindi, uqinise amandla akho.

² — Ngoba iNkosi ibuyisa ubukhosi bukaJakobe bube njengobukhosi bukaIsrayeli; ngoba abahlaselayo balikhwexule ivini, baqeda ingatsha zalo —

³ Izihlangu zamaqhawe akhe zibomvu, amabutho akhe agqoke okuyibubende, lenqola zakhe zokulwa ziphazima njengamalangabi lapho sezilungiselwa ukulwa; amabhiza ayagidagida.

⁴ Inqola zokulwa ziyatheleka emigwaqweni, ziphoseka le lale ezigcawini, zikhanye njengezibane, ziphazime njengemibane.

⁵ Kubizwe izinduna, zikhubeke ekuhambeni kwazo, zigijimele emithangaleni, zimise izivikelo.

⁶ Kuvulwe amasango asemfuleni, kube yisiyaluyalu esigodlweni.

⁷ Inkosikazi ithunjwe, incekukazi zayo zikhale njengamajuba, zitshaye izifuba zazo ngenxa yosizi.

⁸ INineve injengechibi elilamanzi afohlayo. Bamemeza besithi: Manini! manini! kodwa kakho ophendukayo.

⁹ Phangani isiliva, phangani igolide. Inotho yalo lezinto zalo ezinhle kazilakuphela.

¹⁰ Seliseleze, kaliselalutho, lichithekile; inhliziyo ziphele amandla, amadolo ayatshayana, bonke batshaywa luvalo, banyukumele.

¹¹ Singaphi isikhundla sesilwane lezimbalu zezilwane lapho isilwane sasiletha khona esikubambileyo, lalapho imidlwane yaso yayihlala khona ingethuki lutho na?

¹² Isilwane sabamba okwanele imidlwane yaso, sabambela lezilwanekazi zaso; sagcwalisa izimbalu ngesikubambileyo lezikhundla zaso ngenyama.

¹³ Khangela, ngimelene lawe, kutsho iNkosi yamabandla; ngizatshisa ngomlilo inqola zakho zokulwa, lomkhonto uzaqeda imidlwane yakho; ngizaqeda emhlabeni konke okubambayo, lelizwi lezithunywa zakho kalisayikuzwakala.