UmTshumayeli 7 - iBhayibhili Elingcwele 1978

Ukuhlakanipha kuhle ukwedlula konke

¹ Ibizo elihle lingcono kulamafutha amahle; losuku lokufa lungcono kulosuku lokuzalwa.

² Kungcono ukuya endlini yokulila kulendlini yedili; ngoba lokhu kuzakwehlela abantu bonke, abaphilayo kabakukhumbule lokhu.

³ Usizi lungcono kulokuhleka, ngoba ngokudana kobuso umuntu angasizakala.

⁴ Inhliziyo yomuntu ohlakaniphileyo isendlini yokulila, kodwa inhliziyo yesithutha isendlini yokuthokoza.

⁵ Kungcono ukuzwa ukukhuza komuntu ohlakaniphileyo kulokuzwa ukuhlabela kwezithutha.

⁶ Ngoba njengokuchachamba kwameva ngaphansi kwembiza kunjalo ukuhleka kwesithutha. Lokhu lakho kulize.

⁷ Ngoba ukucindezela kwenza ohlakaniphileyo abe yisithutha, lokuthengwa ngesipho kuyona inhliziyo.

⁸ Kungcono ukuphela kolutho kulokuqala kwalo; ukubekezela kungcono kulokuzigqaja.

⁹ Ungaphangisi ukuthukuthela, ngoba ukuthukuthela ngokwezithutha.

¹⁰ Ungatsho ukuthi: Kwenziwa yini ukuba insuku zakuqala zibe ngcono kulalezi na? Ngoba kuyibuthutha ukubuza lokhu.

¹¹ Ukuhlakanipha kuhle njengelifa, kuyabasiza bonke abaphilayo.

¹² Ukuvikelwa yikuhlakanipha kuyafanana lokuvikelwa yimali; ukuhlakanipha kuyabasiza abantu abalakho ngokubanika ukuphila.

¹³ Nakana ngomsebenzi kaNkulunkulu; ngubani ongelula lokho uNkulunkulu akugobisileyo na?

¹⁴ Thokoza ngosuku lokuphumelela, ngosuku olubi ukhumbule ukuthi uNkulunkulu uzenzile zonke ukuze umuntu angakuboni okuzakwenzeka ngensuku ezizayo.

¹⁵ Konke ngikubonile ekuphileni kwami okulize; ngibonile umuntu olungileyo esifa ekulungeni kwakhe, lomuntu omubi ehlala insuku ezinengi ekwenzeni kwakhe okubi.

¹⁶ Ungabi ngolungileyo ngokudlulisayo, futhi ungahlakaniphi kakhulu; uzibulalelani na?

¹⁷ Ungabi ngomubi ngokudlulisayo, futhi ungabi yisithutha; uzakufelani isikhathi sakho singakafiki na?

¹⁸ Kuhle ukuba ubambelele kokunye, ungakuyekeli lokunye; ngoba umuntu omesabayo uNkulunkulu uzaphepha kukho kokubili.

¹⁹ Ukuhlakanipha kuyamqinisa ohlakaniphileyo ukwedlula ababusi abalitshumi abaphakathi komuzi.

²⁰ Isibili kakulamuntu olungileyo emhlabeni owenza okuhle kokuphela engoni.

²¹ Ungazilaleli zonke izinto ezikhulunywa ngabantu, funa uzwe ukukuthuka kwenceku yakho;

²² ngoba uyazi ukuthi ngezikhathi ezinengi wena uqobo ubathukile abanye.

²³ Konke lokhu ngikuhlolile ngokuhlakanipha, ngathi: Ngizakuhlakanipha; kodwa kwaba khatshana lami.

²⁴ Uqobo lwezinto lukhatshana, luzikile lwatshona kakhulu ukwedlula ukuqedisisa komuntu.

²⁵ Ngaqala ukucabanga, ngamisela ingqondo yami ukudinga lokufuna ukuhlakanipha lokwazi isimo sezinto; ngafumanisa kuphela ukuthi kuyibuthutha ukuba ngomubi, lokuthi kuyikuhlanya ukwenza njengesithutha.

²⁶ Ngafumanisa ukuthi okubuhlungu kulokufa ngowesifazana ongumjibila, onhliziyo yakhe ilimbule, lengalo zakhe zingamaketane; umuntu othokozisa uNkulunkulu uyaphunyuka kuye, kodwa isoni uyasibamba.

²⁷ Umtshumayeli uthi: Khangela, yikho lokhu engikufumeneyo ekuhloleni kwami izinto nganye ukuba ngibone isimo sazo

²⁸ emva kokuhlola kwami okunengi okungelampumelelo. Ngafumanisa indoda eqotho eyodwa phakathi kwenkulungwane; kodwa kangifumanisanga loyeda owesifazana oqotho phakathi kwabo bonke.

²⁹ Yilokhu kuphela engikufumanisayo ukuthi uNkulunkulu wamenza umuntu waqonda; kodwa abantu bazenzela amacebo amanengi.