UmTshumayeli 6 - iBhayibhili Elingcwele 1978

¹ Kukhona ububi esengibubonile ngaphansi kwelanga ukuthi bunzima ebantwini.

² Ngibonile umuntu uNkulunkulu amnike inotho lempahla lodumo ukuze angasweli lutho kukho konke akufisayo, kodwa uNkulunkulu angamniki amandla ukuba azithokozise ngakho, kodwa kudliwe ngowemzini; lokhu kulize, kuyinto ebuhlungu.

³ Uba umuntu ezuza abantwana abalikhulu, aphile iminyaka eminengi ukuze insuku zakhe zibe zinengi, kodwa angathokoziswa yizinto ezinhle zokuphila, futhi angabi lakungcwatshwa, ngithi isisu esiphumileyo singcono kulaye.

⁴ Ukuphuma kwakho kulize kuye emnyameni, lebizo lakho licatshe emnyameni;

⁵ futhi kakulibonanga ilanga, kakwazanga lutho; kanti kuyazuza ukuphumula kulaye.

⁶ Uba omunye ehlala iminyaka eyinkulungwane, ayiphinde kabili, angaphumeleli, kabayi ndawonye bobabili na?

⁷ Umuntu usebenzela ukudla ekutshikatshikeni kwakhe konke, kodwa ukukhanuka kwakhe kakwaneliswa.

⁸ Ohlakaniphileyo usedlula ngani isithutha na? Ukwazi ukuziphatha kuhle kumsizani umuntu ongumyanga na?

⁹ Kungcono ukwaneliswa ngokubonayo kulokuhugwa zinkanuko. Lokho lakho kulize lamaya.

¹⁰ Osekukhona sekuke kwabizwa ngebizo; umuntu uyaziwa ukuba uyini lokuba kalamandla okuphikisana lolamandla kulaye.

¹¹ Ngokwanda kwamazwi, lobuze bakho konke buyanda; umuntu uzuzani ngakho na?

¹² Ngoba ngubani okwaziyo okumfaneleyo umuntu esahlezi insuku eziyingcosana zokuphila kwakhe okulize okudlula njengesithunzi na? Ngubani ongatshela umuntu lokho okuzakuba khona ngemva kwakhe ngaphansi kwelanga na?