UMatewu 9 - iBhayibhili Elingcwele 1978

UJesu usilisa umuntu oyisilima

¹ Wasengena emkolweni, wawela, wafika emzini wakubo.

² Baletha kuye umuntu oyisilima elele ethaleni. UJesu ebona ukukholwa kwabo wathi koyisilima: Mana isibindi, mntanami; izono zakho zithethelelwe.

³ Abanye bababhali bakhulumisana bathi: Lumuntu uyahlambaza.

⁴ UJesu esazi imicabango yabo wathi: Linakanelani okubi enhliziyweni zenu na?

⁵ Ngoba yikuphi okulula ukuthi: Izono zakho zithethelelwe; ingabe ukuthi: Sukuma uhambe, na?

⁶ Kodwa ukuze lazi ukuthi iNdodana yomuntu ilamandla okuthethelela izono emhlabeni — wathi koyisilima: Sukuma, uthathe ithala lakho, uye endlini yakho.

⁷ Wasukuma, waya endlini yakhe.

⁸ Kwathi amaxuku ebonile lokhu amangala, amdumisa uNkulunkulu onike abantu amandla anje.

Ukubizwa kukaMathewu

⁹ Esedlula lapho uJesu wabona umuntu othiwa nguMathewu ehlezi endaweni yokuthelisela; wathi kuye: Ngilandela. Wasukuma, wamlandela.

¹⁰ Kwathi esekudleni endlini, kwafika abathelisi abanengi lezoni, bahlala ekudleni loJesu labafundi bakhe.

¹¹ AbaFarisi sebekubonile lokhu bathi kubafundi bakhe: Kungani umfundisi wenu esidla labathelisi lezoni na?

¹² Ekuzwa lokhu uJesu wasesithi kibo: Abaphilileyo kabadingi inyanga kodwa abagulayo.

¹³ Hambani lifunde ukuba lokhu kutshoni ukuthi: Ngifuna isihawu kulomhlatshelo. Ngoba angizanga ukubiza abalungileyo kodwa izoni.

Ukuzila ukudla

¹⁴ Kwafika kuye abafundi bakaJohane, bathi: Kungani ukuba thina labaFarisi sizile ukudla, kodwa abafundi bakho bengazili na?

¹⁵ UJesu wathi kubo: Abakwabo kamyeni bangalila yini, umyeni eselabo na? Kodwa zizakufika insuku lapho umyeni ezakususwa kubo; kubeng’khonake bezakuzila.

¹⁶ Kakho obekela isichibi selembu elingakafinyeli engutsheni endala, ngoba lokho okubekelwe kuyo kuzadabuka kuyo, siqhele isikhala.

¹⁷ Njalo iwayini elitsha kalithelwa emigodleni emidala, funa imigodla idabuke, lewayini lichitheke, lemigodla yonakale. Kodwa iwayini elitsha balithela emigodleni emitsha, kulondolozeke kokubili.

Indodakazi kaJayirosi ivuswa ekufeni. Owesifazana owayelomopho uyasiliswa

¹⁸ Kwathi esakhuluma lezizinto kubo, kwafika umphathi, waguqa phambi kwakhe, wathi: Indodakazi yami isand’ukufa; kodwa akuze, ubeke isandla sakho phezu kwayo, izakusila.

¹⁹ Wasukuma uJesu, wamlandela kanye labafundi bakhe.

²⁰ Owesifazana owayelomopho iminyaka elitshumi lambili wasondela ngemva kwakhe, wathinta umphetho wengubo yakhe.

²¹ Ngoba wathi enhliziyweni yakhe: Aluba ngithinta nje ingubo yakhe, ngizakusiliswa.

²² UJesu waphenduka, embona wathi: Mana isibindi, dade; ukukholwa kwakho kukusilisile. Owesifazana wasila kusukela kulesosikhathi.

²³ UJesu wafika endlini yomphathi, wabona abakhalisa imihlanga lexuku liphithizela,

²⁴ wathi: Gwedlani, ngoba intombazana kayifanga, kodwa ilele. Bamhleka ulunya.

²⁵ Ixuku selikhutshiwe, wangena, wabamba isandla sayo; intombazana yavuka.

²⁶ Udumo lwalokho lwaphumela kulelolizwe lonke.

UJesu uhawukela iziphofu lesimungulu labakhathazekileyo

²⁷ Wathi uJesu esedlula lapho, iziphofu ezimbili zamlandela, zimemeza zisithi: Sihawukele, Ndodana kaDavida!

²⁸ Esengenile endlini, iziphofu zeza kuye. UJesu wathi kuzo: Liyakholwa ukuthi ngingakwenza lokhu na? Zathi kuye: Yebo, Nkosi.

²⁹ Wasethinta amehlo azo, wathi: Akwenzeke kini njengokukholwa kwenu.

³⁰ Asevuleka amehlo azo. UJesu wazilayisisa, wathi: Qaphelani ukuba kungaziwa muntu.

³¹ Kodwa zaphuma, zalwandisa udumo lwakhe kulo lonke lelolizwe.

³² Ekuphumeni kwazo, kwalethwa kuye isimungulu esilomoya omubi.

³³ Umoya omubi usukhutshiwe, isimungulu sakhuluma. Amaxuku amangala, athi: Kakuzanga kubonwe okunje koIsrayeli.

³⁴ Kodwa abaFarisi bathi: Ukhupha omoya ababi ngenkosi yomoya ababi.

³⁵ UJesu wahambahamba emizini yonke lemizaneni efundisa emasinagogeni abo, etshumayela ivangeli lombuso, esilisa izifo zonke lemikhuhlane yonke.

³⁶ Esebonile amaxuku, wawahawukela, ngoba ayekhathazekile, ehlakazekile njengezimvu ezingelamalusi.

³⁷ Wasesithi kubafundi bakhe: Ukuvuna kukhulu, kodwa izisebenzi ziyingcosana.

³⁸ Ngakhoke celani eNkosini yokuvuna ukuba ithumele izisebenzi ekuvuneni kwayo.