UMatewu 7 - iBhayibhili Elingcwele 1978

Ukwahlulela abanye

¹ Lingahluleli ukuba lingahlulelwa.

² Ngoba ngokwahlulela elahlulela ngakho lizakwahlulelwa ngakho lani, langesilinganiso elilinganisa ngaso lizakulinganiselwa ngaso lani.

³ Ukhangelelani ucezwana oluselihlweni lomfowenu, kodwa ungaluboni ugodo olukwelakho ilihlo na?

⁴ Ungatsho kanjani kumfowenu ukuthi: Kahle ngikhuphe ucezwana oluselihlweni lakho; kanti ugodo lukwelakho ilihlo, na?

⁵ Mzenzisi, qala ukhuphe ugodo olukwelakho ilihlo, kung’khonake uzakubonisisa ukukhupha ucezwana oluselihlweni lomfowenu.

⁶ Linganiki izinja okungcwele, lingaphoseli impahla zenu eziligugu phambi kwengulube, funa zizinyathele ngenyawo zazo, ziphenduke ziliklebhule.

Ukucela kuNkulunkulu; ukuphathana

⁷ Celani, lizakuphiwa; funani, lizakufumana; qoqodani, lizakuvulelwa.

⁸ Ngoba ilowo lalowo ocelayo uyamukela, lofunayo uyafumana, loqoqodayo uyavulelwa.

⁹ Nguwuphi kini ongathi, uba indodana yakhe icela isinkwa, ayinike ilitshe na?

¹⁰ Uba icela inhlanzi, ayinike inyoka na?

¹¹ Ngakho uba lina elingababi likwazi ukubapha abantwana benu izipho ezinhle, uYihlo osezulwini kayikubapha kakhulu izinto ezinhle abacela kuye na?

¹² Ngakhoke konke elithanda ukuba abantu bakwenze kini, kwenzeni lani ngokunjalo kibo; ngoba lokhu kungumlayo labaprofethi.

Lokho okuqinisekileyo lalokho okungaqinisekanga

¹³ Ngenani ngesango elincinyane; ngoba isango likhulu lendlela ibanzi esayo ekubhujisweni; banengi abahamba ngayo.

¹⁴ Kodwa isango lincinyane lendlela ilukhonjwana esayo ekuphileni; bayingcosana abayifumanayo.

¹⁵ Xwayani abaprofethi bamanga abeza kini bembathise okwezimvu, kodwa ngaphakathi bazimpisi eziphangayo.

¹⁶ Lizakubazi ngezithelo zabo. Abantu bayazikha yini izithelo zevini emeveni ingabe amakhiwa evikaneni na?

¹⁷ Ngokunjalo ileso laleso isihlahla esihle siyathela isithelo esihle, kodwa isihlahla esibi siyathela isithelo esibi.

¹⁸ Isihlahla esihle singethele isithelo esibi, lesihlahla esibi singethele isithelo esihle.

¹⁹ Ileso laleso isihlahla esingatheli isithelo esihle siyaganyulwa siphoselwe emlilweni.

²⁰ Ngokunjalo lizakubazi ngezithelo zabo.

²¹ Kakusibo bonke abatshoyo kimi ukuthi: Nkosi, Nkosi; abazakungena embusweni wezulu, kodwa kuphela owenza intando kaBaba osezulwini.

²² Abanengi bazakuthi kimi ngalolosuku: Nkosi, Nkosi, kasitshumayelanga yini ngebizo lakho, sakhupha omoya ababi ngebizo lakho, senza imisebenzi emikhulu eminengi ngebizo lakho, na?

²³ Kubeng’khonake ngizakuthi kibo: Angizanga ngilazi; sukani kimi lina benzi bokubi.

Umfanekiso wezindlu ezimbili

²⁴ Ngakho ilowo lalowo owezwayo lamazwi ami, awenze, ngizakumfanisa lendoda ehlakaniphileyo eyakha indlu yayo phezu kwedwala.

²⁵ Lana izulu, kwafika impophoma, kwavunguza imimoya, yayitshaya leyondlu; kodwa kayiwanga, ngoba yayisekelwe lidwala.

²⁶ Kodwa lowo owezwayo lamazwi ami, angawenzi, uzakufaniswa lendoda eyisithutha, eyakha indlu yayo phezu kwesihlabathi.

²⁷ Lana izulu, kwafika impophoma, kwavunguza imimoya, yayitshaya leyondlu, yawa, kwaba kukhulu ukuwa kwayo.

²⁸ Kwathi uJesu eseqedile lawomazwi, amaxuku amangala ngokufundisa kwakhe;

²⁹ ngoba wabafundisa njengolamandla kungenjengababhali babo.