UMatewu 6 - iBhayibhili Elingcwele 1978

Intshumayelo yasentabeni isaqhubeka. Ukwenza ukulunga lokukhuleka lokuzila ukudla

¹ Qaphelani ukuba lingazikhukhumezi phambi kwabantu ngezenzo zenu ezilungileyo lisenzela ukubonwa yibo, funa lingabi lamvuzo kuYihlo osezulwini.

² Ngakho nxa unika isiphiwo, ungakhalisi uphondo phambi kwakho, njengokwenziwa ngabazenzisi emasinagogeni lasezindleleni ukuba badunyiswe ngabantu. Ngiqinisile ngithi kini: Sebewamukele umvuzo wabo.

³ Kodwa wena, nxa unika isiphiwo, isandla sakho sekhohlo kasingakwazi esikwenzayo esokunene sakho

⁴ ukuze isiphiwo sakho sibe sekusithekeni, loYihlo obona ekusithekeni uzakukuvuza.

⁵ Lalapho likhuleka, lingabi njengabazenzisi, ngoba bona bathanda ukukhuleka bemi emasinagogeni lasekuhlanganeni kwendlela ukuze babonwe ngabantu. Ngiqinisile ngithi kini: Sebewamukele umvuzo wabo.

⁶ Kodwa wena, nxa ukhuleka, ngena endlini yakho, uvale umnyango wakho, ukhuleke kuYihlo osensitha; loYihlo obonayo ensitha uzakukuvuza.

⁷ Ekukhulekeni kwenu lingatemelezi njengabezizwe, ngoba bathi bazakuzwiwa ngokukhuluma kwabo okunengi.

⁸ Ngakhoke lingafanani labo; ngoba uYihlo uyakwazi elikuswelayo lingakaceli kuye.

UJesu ufundisa ngokukhuleka

⁹ Ngakhoke kalibokhuleka ngokunje lithi: Baba wethu osezulwini, kalidunyiswe ibizo lakho,

¹⁰ umbuso wakho kawuze, intando yakho kayenziwe, emhlabeni njengasezulwini.

¹¹ Siphe lamhla ukudla kwethu kwensuku ngensuku.

¹² Usithethelele izono zethu, njengalokhu lathi sibathethelela abasonayo.

¹³ Ungasingenisi ekulingweni, kodwa usikhulule ebubini. [Ngoba umbuso ungowakho, lamandla, lobukhosi, kuze kube nini lanini. Ameni.]

¹⁴ Ngoba uba lithethelela abantu izono zabo, loYihlo osezulwini uzakulithethelela lani.

¹⁵ Kodwa uba lingathetheleli abantu izono zabo, loYihlo kayikulithethelela izono zenu.

Ukuzila ukudla

¹⁶ Futhi nxa lizila ukudla linganyukumali njengabazenzisi; ngoba bona bacomba ubuso babo ukuba babonakale ebantwini ukuthi bazilile. Ngiqinisile ngithi kini: Sebewamukele umvuzo wabo.

¹⁷ Kodwa wena, nxa uzila ukudla, gcoba ikhanda lakho, ugeze ubuso bakho,

¹⁸ ukuze ungabonakali ebantwini ukuthi uzilile kodwa kuYihlo osekusithekeni; loYihlo obona ekusithekeni uzakukuvuza.

Inotho eqotho lokukhanya okuqotho

¹⁹ Lingazibekeli inotho emhlabeni lapho kona khona inondo lokuthomba, lalapho amasela efohlela khona ebe.

²⁰ Kodwa zibekeleni inotho ezulwini lapho kungoni inondo lokuthomba khona, lalapho amasela angafohleli khona ebe.

²¹ Ngoba lapho kukhona inotho yakho, lenhliziyo yakho izakuba khona lapho.

²² Ilihlo liyisibane somzimba. Uba ilihlo lakho liphilile, umzimba wakho wonke uzakuba lokukhanya.

²³ Kodwa uba ilihlo lakho lilibi, umzimba wakho wonke uzakuba lomnyama. Ngakho uba ukukhanya okuphakathi kwakho kungumnyama, umnyama mkhulu kangakanani.

²⁴ Kakho ongakhonza amakhosi amabili. Ngoba uzakuzonda enye athande enye, ingabe uzakubambelela kwenye adelele enye. Lingekhonze uNkulunkulu lenotho.

Ukukhathazeka, lokuthemba kuNkulunkulu

²⁵ Ngakhoke ngithi kini: Lingaphisekeli ukusila kwenu ukuba lizakudlani lokuba lizakunathani, lomzimba wenu ukuba lizakwambathani. Ukusila kakudluli yini ukudla, lomzimba kawudluli izambatho na?

²⁶ Khangelani inyoni zaphezulu ukuba kazihlanyeli, kazivuni, kazibutheli eziphaleni; kanti uYihlo osezulwini uyazondla. Lina kalizidluli kakhulu na?

²⁷ Nguwuphi kini ongathi ngokuphisekela engezelele ingalo ibenye ebudeni bakhe na?

²⁸ Langezambatho liphisekelani na? Qaphelisani imiduze yeganga ukuthi ikhula kanjani; kayiphothi kayaluki;

²⁹ kodwa ngithi kini: LoSolomoni ebucwazicwazini bakhe bonke wayengambathiswanga njengomunye wayo.

³⁰ Uba uNkulunkulu esambathisa ngokunjalo utshani beganga, obukhona lamuhla, kusasa buphoswa eziko, kayikulambathisa kakhulu yini lina elilokukholwa okuncinyane na?

³¹ Ngakhoke lingaphisekeli lutho lisithi: Sizakudlani? ingabe: Sizakunathani? loba: Sizakwambathani na?

³² Ngoba konke lokhu abezizwe bayakufuna; kodwa uYihlo osezulwini uyazi ukuthi liyakuswela konke lokhu.

³³ Kodwa funani kuqala umbuso wakhe lokulunga kwakhe; ng’khona lezizinto zonke zizakwengezelelwa kini.

³⁴ Ngakho lingaphisekeli ikusasa, ngoba ikusasa izakuziphisekela yona. Inkathazo yosuku yanele lona.