UMatewu 4 - iBhayibhili Elingcwele 1978

Ukulingwa kukaJesu

¹ UJesu waseholelwa nguMoya enkangala ukuba alingwe nguSathane.

² Esezilile ukudla insuku ezingamatshumi amane lobusuku obungamatshumi amane, ekucineni walamba.

³ Kweza umlingi, wathi kuye: Uba uyiNdodana kaNkulunkulu, tshono ukuba lamatshe abe yizinkwa.

⁴ Kodwa yena waphendula wathi: Kulotshiwe ukuthi: Umuntu kayikuphila ngesinkwa sodwa, kodwa ngalelo lalelolizwi eliphuma emlonyeni kaNkulunkulu.

⁵ USathane wasemthatha wamusa emzini ongcwele; wammisa engqongeni yethempeli,

⁶ wathi kuye: Uba uyiNdodana kaNkulunkulu, ziwisele phansi; ngoba kulotshiwe ukuthi: Uzakulaya izithunywa zakhe ngawe, zikuthwale ngezandla zazo, funa ukhubeke elitsheni ngonyawo lwakho.

⁷ UJesu wathi kuye: Kulotshiwe futhi ukuthi: Ungayilingi iNkosi uNkulunkulu wakho.

⁸ USathane wabuya wamusa entabeni ende kakhulu, wamtshengisa imibuso yonke yomhlaba lobukhulu bayo;

⁹ wathi kuye: Lezizinto zonke ngizakukunika zona, uba uziwisela phansi, ungikhonze.

¹⁰ UJesu wasesithi kuye: Suka, Sathane! ngoba kulotshiwe ukuthi: Wokhuleka eNkosini uNkulunkulu wakho, umkhonze yena yedwa.

¹¹ Kwang’khona uSathane amyekelayo. Kwasekufika izithunywa, zamkhonza.

UJesu uqala ukusebenza eGalili

¹² Kwathi esezwile ukuthi uJohane ubotshiwe, wasuka waya eGalili.

¹³ Wakhuphuka eNazaretha, weza wahlala eKapenawume elingasolwandle emikhawulweni yakoZebuluni leyakoNafitali,

¹⁴ ukuba kugcwaliseke okwakhulunywa ngumprofethi uIsaya ukuthi:

¹⁵ Ilizwe lakoZebuluni lelizwe lakoNafitali, ngasolwandle ngaphetsheya kweJordani, iGalili labezizwe,

¹⁶ abantu ababehlezi emnyameni babonile ukukhanya okukhulu, lababehlezi elizweni lasethunzini lokufa ukukhanya kuphumele kibo.

UJesu uqala ukutshumayela

¹⁷ Kusukela kulesosikhathi uJesu waqala ukutshumayela esithi: Phendukani, ngoba umbuso wezulu ususondele.

Ukubizwa kukaPetro lababelaye

¹⁸ Kwathi uJesu ehamba ngasolwandle lwaseGalili wabona izelamani ezimbili, uSimoni othiwa nguPetro loAndreya umfowabo, bephosela imbule olwandle, ngoba babengabagoli benhlanzi.

¹⁹ Wasesithi kubo: Ngilandelani; ngizakulenza libe ngabagoli babantu.

²⁰ Basebetshiya amambule, bamlandela.

²¹ Esedlulele phambili wabona ezinye izelamani ezimbili, uJakobe kaZebediya, loJohane umfowabo, besemkolweni kanye loZebediya uyise, belungisa amambule abo; wababiza.

²² Basebetshiya masinyane umkolo loyise, bamlandela.

UJesu usebenza elizweni laseGalili

²³ UJesu wahambahamba elizweni lonke laseGalili efundisa emasinagogeni abo, etshumayela ivangeli lombuso, esilisa abantu ezifweni zonke lasebuthakathakeni bonke.

²⁴ Udumo lwakhe lwaphumela elizweni lonke laseSiriya; baletha kuye bonke abagulayo, ababephethwe yizifo ngezifo lobuhlungu, lababengenwe ngomoya ababi, lababelesithuthwane, lezilima; wabasilisa.

²⁵ Amaxuku amakhulu amlandela evela eGalili laseDikapolisi, laseJerusalema, laseJudiya, langaphetsheya kweJordani.