UMatewu 28 - iBhayibhili Elingcwele 1978

Ukuvuka lokuzibonakalisa kukaJesu

¹ Kwathi ekupheleni kweSabatha, ekudabukeni kokusa ngosuku lokuqala lweviki, kwafika uMariya Magadalena lomunye uMariya ukuzabona iliba.

² Khangela, kwaba khona ukuzamazama komhlaba okukhulu, ngoba isithunywa seNkosi sehla sivela ezulwini, sagiqa ilitshe, sahlala phezu kwalo.

³ Ukubonakala kwaso kwakunjengombane, lesambatho saso sasimhlophe njengongqoqwane.

⁴ Abalindi bathuthumela ngokusesaba, baba njengabafileyo.

⁵ Kodwa isithunywa sathi kwabesifazana: Lingesabi lina; ngoba ngiyazi ukuthi lidinga uJesu obebethelwe;

⁶ kakho lapha, ngoba uvukile njengokutsho kwakhe; wozani libone indawo lapho abelele khona.

⁷ Hambani masinyane, litshele abafundi bakhe ukuthi uvukile kwabafileyo; uzakulandulela ukuya eGalili, lizakumbona khona. Khangelani, sengilitshelile.

⁸ Basuka elibeni ngokuphangisa belokwesaba lokuthokoza okukhulu, bagijima baya ukubikela abafundi bakhe.

⁹ Khangela, uJesu wabahlangabeza, wathi: Okuhle! Basondela babamba inyawo zakhe, bamkhonza.

¹⁰ UJesu wasesithi kibo: Lingesabi; hambani, libikele abafowethu ukuba basuke baye eGalili; bazakungibona khona.

¹¹ Kwathi besahamba, abanye kubalindi baya emzini, babikela abapristi abakhulu konke okwenzekileyo.

¹² Sebebuthene labadala, benza icebo, banika abebutho imali enengi,

¹³ bathi: Kalibokuthi abafundi bakhe beza ebusuku, bameba silele thina.

¹⁴ Uba lokhu kuzwakala kumbusi, sizakumncenga thina ukuze lina lingangeni enkathazweni.

¹⁵ Basebethatha imali, benza njengokufundiswa kwabo. Lelilizwi landa phakathi kwabaJuda kuze kube lamuhla.

Ukulayeza kokucina kukaJesu

¹⁶ Abafundi abalitshumi lanye baya eGalili entabeni uJesu ayebalayele yona;

¹⁷ sebembonile bamkhonza, kodwa abanye bathandabuza.

¹⁸ UJesu wasondela, wakhuluma labo esithi: Aphiwe mina amandla wonke ezulwini lasemhlabeni;

¹⁹ ngakho hambani lenze izizwe zonke zibe ngabafundi, libabhaphathize ebizweni likaYise, leleNdodana, lelikaMoya oNgcwele,

²⁰ libafundise ukugcina konke engililaye ngakho; khangelani, mina ngilani insuku zonke kuze kube sekupheleni kwesikhathi.