UMatewu 26 - iBhayibhili Elingcwele 1978

Icebo lokumbulala uJesu

¹ Kwathi uJesu eseqedile wonke lamazwi, wathi kubafundi bakhe:

² Liyazi ukuthi emva kwensuku ezimbili kuzakuba liPhasika; iNdodana yomuntu izakunikelwa ukuba ibethelwe.

³ Kwasekubuthana abapristi abakhulu labadala besizwe egumeni lompristi omkhulu othiwa nguKayafasi.

⁴ Bacebisana ukuba bambambe uJesu ngobuqili, bambulale.

⁵ Kodwa bathi: Kakungabi ngesikhathi somkhosi, funa kube khona isiphithiphithi ebantwini.

UJesu ugcotshwa eBethani

⁶ Kwathi uJesu eseBethani endlini kaSimoni owayelobulephero,

⁷ kwafika kuye owesifazana ephethe umfuma wamagcobo abiza imali enengi, wawathela ekhanda lakhe ehlezi ekudleni.

⁸ Kodwa abafundi bebona lokhu bathukuthela, bathi: Achithelwani lamagcobo na?

⁹ Ngoba ngabe athengisiwe ngemali enengi, kwanikwa abayanga.

¹⁰ Kodwa uJesu ekwazi lokhu wathi kibo: Limhluphelani owesifazana na? Ngoba wenzile umsebenzi omuhle kimi;

¹¹ ngoba abayanga lihlala lilabo, kodwa mina kalihlali lilami.

¹² Ngoba ngokuthela amagcobo emzimbeni wami, wenzela ukungilungisela ukumbelwa.

¹³ Ngiqinisile ngithi kini: Loba ngaphi emhlabeni wonke lapho okuzatshunyayelwa khona ivangeli, lokho akwenzileyo kuzakukhulunywa ngakho, kube yisikhumbuzo ngaye.

Umvuzo wokumnikela uJesu

¹⁴ Omunye wabalitshumi lambili othiwa nguJudasi Iskariyothi waya kubapristi abakhulu,

¹⁵ wathi: Lizakunginikani aluba ngimnikela kini na? Basebemnika inhlamvu zesiliva ezingamatshumi amathathu.

¹⁶ Kusukela ngalesosikhathi wafuna ithuba lokumnikela.

Ukumiswa kwesidlo esingcwele

¹⁷ Ngosuku lokuqala lomkhosi wesinkwa esingelamvubelo abafundi beza kuJesu bathi: Uthanda ukuba sikulungisele ngaphi ukuba udle iPhasika na?

¹⁸ Wathi: Hambani liye emzini kumuntu othile, lithi kuye: UMfundisi uthi: Isikhathi sami sesiseduze; ngizakwenza iPhasika kwakho kanye labafundi bami.

¹⁹ Benzake abafundi njengokuba uJesu ebalayile; balungisa iPhasika.

²⁰ Kwathi sekuhlwile, wayehlezi ekudleni labafundi abalitshumi lambili.

²¹ Besadla, wathi: Ngiqinisile ngithi kini: Omunye wenu uzakunginikela.

²² Badabuka kakhulu, bathi kuye ngamunye: Kungaba yimi, Nkosi na?

²³ Waphendula wathi: Otshebe kanye lami emganwini nguye ozakunginikela.

²⁴ INdodana yomuntu ihamba njengokulotshiweyo ngayo, kodwa maye kulowomuntu enikelwa nguye iNdodana yomuntu! Bekungangcono aluba wayengazalwanga lowomuntu.

²⁵ Wasephendula uJudasi owamnikelayo, wathi: Impela kungebe yimi, Mfundisi? Wathi kuye: Kutsho wena.

²⁶ Besadla uJesu wathatha isinkwa, wabonga, wasihlephula, wabanika abafundi bakhe wathi: Thathani lidle; lokhu kungumzimba wami.

²⁷ Wathatha inkezo, wabonga, wabanika, wathi: Nathani lonke kuyo;

²⁸ ngoba lokhu kuligazi lami lesivumelwano elichithelwa abanengi ukuthethelelwa kwezono.

²⁹ Ngithi kini: Kusukela khathesi kangiyikunatha lesisithelo sevini kuze kufike lolosuku lapho ngizakusinatha lani sisitsha embusweni kaBaba.

³⁰ Kwathi sebehlabele ingoma baphuma baya entabeni ethiwa iOliveti.

Ukuxwayiswa kukaPetro

³¹ UJesu wasesithi kibo: Lina lonke lizakukhubeka ngami ngalobubusuku, ngoba kulotshiwe ukuthi: Ngizakutshaya umalusi, izimvu zomhlambi zichitheke.

³² Kodwa ngemva kokuvuswa kwami ngizakulandulela ukuya eGalili.

³³ UPetro wathi kuye: Lanxa bezakhubeka bonke ngawe, mina angisoze ngikhubeke.

³⁴ UJesu wathi kuye: Ngiqinisile ngithi kuwe: Ngalobubusuku, lingakakhali iqhude, wena uzakungilandula kathathu.

³⁵ UPetro wathi kuye: Loba ngingaze ngife lawe, kangiyikukulandula. Batsho njalo bonke abafundi.

EGetsemane

³⁶ UJesu wasefika labo endaweni ethiwa yiGetsemane; wathi kubafundi: Hlalani lapha, ngisayakhuleka laphaya.

³⁷ Wathatha uPetro lamadodana amabili kaZebediya, waqala ukudabuka lokukhathazeka kakhulu.

³⁸ Wasesithi kibo: Umoya wami udabukile kakhulu kungathi ngingaze ngife; hlalani lapha, lilinde lami.

³⁹ Waqhubeka ingcosana, wawa phansi ngobuso bakhe, wakhuleka wathi: Baba, uba kungenzeka, kakudlule kimi linkezo; kodwa kungabi njengokuba ngithanda mina, kodwa njengokuba uthanda wena.

⁴⁰ Weza kubafundi, wabafumana belele; wathi kuPetro: Kanti belingelinde lami iawa ibenye na?

⁴¹ Lindani, likhuleke ukuze lingangeni ekulingweni; umoya uyavuma, kodwa inyama ibuthakathaka.

⁴² Wabuya wasuka ngokwesibili, wakhuleka wathi: Baba, uba inkezo le ingedlule kimi ngingayinathanga, kayenziwe intando yakho.

⁴³ Wabuya futhi, wabafumana belele, ngoba amehlo abo ayenzima.

⁴⁴ Wabuya wabatshiya, wahamba, wakhuleka ngokwesithathu esitsho wona lawomazwi.

⁴⁵ Weza kubafundi, wathi kibo: Lisalele liphumula na? Khangelani, isikhathi sesisondele, iNdodana yomuntu iyanikelwa ezandleni zezoni.

⁴⁶ Sukumani sihambe. Khangelani, onginikelayo useseduze.

Ukubotshwa kukaJesu lokuthethwa kwecala lakhe

⁴⁷ Kwathi esakhuluma, kwafika uJudasi, omunye wabalitshumi lambili, elexuku elikhulu liphethe imihedla lezinduku, livela kubapristi abakhulu labadala besizwe.

⁴⁸ Omnikelayo wayebanike isiboniso sokuthi: Lowo engizakumanga, nguye, limbambe.

⁴⁹ Wasondela kuJesu masinyane wathi: Okuhle, Mfundisi! Wamanga.

⁵⁰ UJesu wathi kuye: Mngane, yenza lokho oze ukukwenza. Basebesondela, bamdumela uJesu, bambamba.

⁵¹ Khangela, omunye walabo ababeloJesu welula isandla, wakhokha umhedla wakhe, wageca inceku yompristi omkhulu, wayiquma indlebe.

⁵² UJesu wasesithi kuye: Buyisela umhedla wakho endaweni yawo, ngoba bonke abaphatha umhedla bazakubhubha ngomhedla.

⁵³ Kambe uthi ngingencenge uBaba ukuba angithumele masinyane izimpi zezithunywa ezidlula itshumi lambili na?

⁵⁴ Pho, ingagcwaliseka kanjani imibhalo ethi kumele ukuba kube njalo na?

⁵⁵ Ngalesosikhathi uJesu wathi emaxukwini: Liphume lemihedla lezinduku ukuzangibamba kungathi ngingumphangi na? Bengihlezi insuku ngensuku ethempelini ngifundisa, kodwa kalingibambanga.

⁵⁶ Kodwa konke lokhu kwenzakele ukuba kugcwaliseke imibhalo yabaprofethi. Basebemtshiya bonke abafundi, babaleka.

UJesu uphambi kompristi omkhulu

⁵⁷ Ababembambile uJesu bamqhuba bamusa kuKayafasi umpristi omkhulu lapho babebuthene khona ababhali labadala.

⁵⁸ Kodwa uPetro wamlandela ekhatshana, kwaze kwaba segumeni lompristi omkhulu; wangena phakathi, wahlala phansi lezinceku ukuba abone isicino.

⁵⁹ Abapristi abakhulu lomphakathi wonke bafuna ubufakazi bamanga ngoJesu ukuze bambulale;

⁶⁰ kodwa kababufumananga, lanxa kwavela ofakazi abanengi bamanga. Emva kwalokho kwavela ababili,

⁶¹ bathi: Lumuntu wathi: Ngilamandla okudiliza ithempeli likaNkulunkulu, ngibuye ngilakhe ngensuku ezintathu.

⁶² Kwasekusukuma umpristi omkhulu, wathi: Kawuphenduli lutho na? Kuyini lokhu abakufakaza ngawe laba na?

⁶³ Kodwa uJesu wathula. Umpristi omkhulu wathi kuye: Ngikufungisa uNkulunkulu ophilayo ukuba usitshele uba unguKristu, iNdodana kaNkulunkulu.

⁶⁴ UJesu wathi kuye: Kutsho wena. Kodwa ngithi kini: Kusukela khathesi lizakubona iNdodana yomuntu ihlezi ngakwesokunene saMandla, isiza ngamayezi aphezulu.

⁶⁵ Umpristi omkhulu wasedabula ingubo zakhe, wathi: Usehlambazile. Sisafunelani ofakazi na? Khangelani, seliyizwile inhlamba.

⁶⁶ Lithini na? Baphendula bathi: Ufanele ukufa.

⁶⁷ Basebemkhafulela ngamathe ebusweni, bamdutshuza, labanye bammakala,

⁶⁸ bathi: Sitshele Kristu! Ngubani okutshayileyo na?

UPetro ulandula uJesu

⁶⁹ UPetro wayehlezi ngaphandle egumeni; kweza kuye intombazana, yathi: Lawe ubuloJesu waseGalili.

⁷⁰ Kodwa walandula phambi kwabo bonke, wathi: Kangikwazi lokho okutshoyo.

⁷¹ Kwathi esephumele esangweni, enye intombazana yambona, yathi kwababemi khona: Lumuntu ubeloJesu waseNazaretha.

⁷² Wabuya walandula wafunga esithi: Kangimazi lumuntu.

⁷³ Emva kwesikhatshana labo ababemi khona basondela, bathi kuPetro: Impela ungomunye wabo, ngoba ukukhuluma kwakho kuyakuceba.

⁷⁴ Waseqala ukuthuka lokufunga, wathi: Kangimazi lumuntu. Lahle lakhala iqhude.

⁷⁵ UPetro wasekhumbula ilizwi likaJesu lokuthi: Lingakakhali iqhude, uzakungilandula kathathu. Waphumela ngaphandle, wakhala ngokudabuka okukhulu.