UMatewu 25 - iBhayibhili Elingcwele 1978

Umfanekiso wezintombi ezilitshumi

¹ Ngakhoke umbuso wezulu uzakufaniswa lentombi ezilitshumi ezathatha izibane zazo, zaphuma ukuhlangabeza umyeni.

² Ezinhlanu zazo zaziyizithutha, lezinhlanu zazihlakaniphile.

³ Ngoba eziyizithutha zathatha izibane zazo, kazaze zaphatha amafutha.

⁴ Kodwa ezihlakaniphileyo zaphatha amafutha ezitsheni kanye lezibane zazo.

⁵ Kwathi umyeni esephuzile, zawozela zonke, zalala ubuthongo.

⁶ Kodwa phakathi kobusuku kwamenyezwa kwathiwa: Khangelani, nangu umyeni; phumani liyemhlangabeza!

⁷ Zasezivuka lezontombi zonke, zalungisa izibane zazo.

⁸ Eziyizithutha zathi kwezihlakaniphileyo: Sipheni amanye amafutha enu ngoba izibane zethu ziyacima.

⁹ Kodwa ezihlakaniphileyo zaphendula zathi: Atshi, funa angasaneli thina kanye lani. Kungcono ukuba lihambe liye kwabathengisayo lizithengele.

¹⁰ Kwathi zisaya ukuthenga, wafika umyeni. Ezasezilungele ukungena zangena laye emthimbeni; kwavalwa umnyango.

¹¹ Emva kwalokho zafika lezinye intombi, zathi: Nkosi, nkosi, sivulele.

¹² Kodwa yena waphendula wathi: Ngiqinisile ngithi kini: Angilazi lina.

¹³ Ngakhoke lindani, ngoba kalilwazi usuku lesikhathi.

Umfanekiso wemali

¹⁴ Ngoba kunjengomuntu owahambela kwelinye ilizwe, wabiza inceku zakhe, wazinika impahla yakhe;

¹⁵ enye wayinika amadola angamakhulu amahlanu, enye amadola angamakhulu amabili, lenye amadola alikhulu, kwaba yileyo laleyo njengamandla ayo; wasukake wahamba.

¹⁶ Leyo eyayamukele amadola angamakhulu amahlanu yasuka masinyane yasebenza ngawo, yazuza amanye amadola angamakhulu amahlanu.

¹⁷ Ngokunjalo eyayamukele amadola angamakhulu amabili yazuza amanye amakhulu amabili.

¹⁸ Kodwa leyo eyayamukele amadola alikhulu yasuka, yemba emhlabathini, yayifihla imali yenkosi yayo.

¹⁹ Emva kwesikhathi eside inkosi yalezonceku yafika ukuba ziyilandisele.

²⁰ Kweza eyayamukele amadola angamakhulu amahlanu, yaletha amanye amakhulu amahlanu, yathi: Nkosi, wanginika amadola angamakhulu amahlanu. Khangela, ngizuzile amanye amakhulu amahlanu.

²¹ Inkosi yayo yathi kiyo: Kuhle, nceku elungileyo lethembekileyo; uthembekile ezintweni eziyingcosana; ngizakukubeka phezu kwezinengi; ngena ekuthokozeni kwenkosi yakho.

²² Kweza layo eyayamukele amadola angamakhulu amabili, yathi: Nkosi, wanginika amadola angamakhulu amabili. Khangela, ngizuzile amanye amakhulu amabili.

²³ Inkosi yayo yathi kiyo: Kuhle, nceku elungileyo lethembekileyo; uthembekile ezintweni eziyingcosana; ngizakukubeka phezu kwezinengi; ngena ekuthokozeni kwenkosi yakho.

²⁴ Kodwa kweza leyo eyayamukele amadola alikhulu, yathi: Nkosi, bengisazi ukuthi ungumuntu olukhuni; uvuna lapho ungahlanyelanga khona, ubutha lapho ungahlakazanga khona;

²⁵ ngesaba, ngasuka ngayifihla imali yakho emhlabathini. Khangela, nanku okwakho.

²⁶ Kodwa inkosi yayo yaphendula yathi kiyo: Nceku embi lelivila; ubusazi ukuthi ngivuna lapho ngingahlanyelanga khona, ngibutha lapho ngingahlakazanga khona na?

²⁷ Ngakho ngabe ubekile imali yami ebhanga, ukuze ekufikeni kwami ngamukele okwami kanye lenzalo yakho.

²⁸ Mamukeni imali, liyinike yena olamakhulu alitshumi.

²⁹ Ngoba ilowo lalowo olakho uzakuphiwa, kwande; kodwa ongelakho uzakwamukwa lalokho alakho.

³⁰ Leyonceku engasizi lutho iphoseleni emnyameni ongaphandle; kuzakuba khona lapho ukukhala lokugedla amazinyo.

Ukuthonisisa kweNdodana yomuntu

³¹ Nxa isifikile iNdodana yomuntu ngobukhosi bayo kanye lezithunywa zonke, kung’khona izakuhlala esihlalweni sayo sobukhosi;

³² kuzakubuthelwa phambi kwayo izizwe zonke; izakubahlukanisa abanye kwabanye, njengomalusi esahlukanisa izimvu lembuzi,

³³ ibeke izimvu ngakwesokunene sayo lembuzi ngakwesokhohlo sayo.

³⁴ Kung’khonake iNkosi izakuthi kibo abangakwesokunene sayo: Wozani lina elibusisiweyo nguBaba, lidle ilifa lombuso eliwulungiselweyo kusukela ekudatshulweni komhlaba.

³⁵ Ngoba ngangilambile, langinika ukudla; ngangomile, langinathisa; ngangingowemzini, langingenisa endlini;

³⁶ ngangihambaze, langambathisa; ngangigula, leza ukungibona; ngangisentolongweni, leza kimi.

³⁷ Ngakho abalungileyo bazayiphendula besithi: Nkosi, sakubona nini ulambile sakunika ukudla, ingabe womile sakunathisa, na?

³⁸ Sakubona nini ungowemzini sakungenisa endlini, ingabe uhambaze sakwambathisa, na?

³⁹ Sakubona nini ugula, loba usentolongweni, seza kuwe, na?

⁴⁰ INkosi izakuphendula ithi kibo: Ngiqinisile ngithi kini: Njengokuba likwenzile komunye walaba abafowethu abancinyane, likwenzile lakimi.

⁴¹ Izakuthi kibo abangakwesokhohlo: Sukani kimi lina eliqalekisiweyo, liye emlilweni ongapheliyo olungiselwe uSathane lezithunywa zakhe.

⁴² Ngoba ngangilambile, kalinginikanga ukudla; ngangomile, kalinginathisanga;

⁴³ ngangingowemzini, kalingingenisanga endlini; ngangihambaze, kalingambathisanga; ngangigula, ngangisentolongweni, kalizanga ukungibona.

⁴⁴ Ngakho labo bazakuphendula besithi: Nkosi, sakubona nini ulambile, loba womile, loba ungowemzini, loba ugula, loba usentolongweni, kasakusiza, na?

⁴⁵ Izakuphendula ithi kibo: Ngiqinisile ngithi kini: Njengokuba lingakwenzanga komunye walaba abancinyane, kalikwenzanga lakimi.

⁴⁶ Laba bazakusiwa ekutshayweni okungapheliyo, kodwa abalungileyo bazangena ekuphileni okungapheliyo.