UMatewu 24 - iBhayibhili Elingcwele 1978

UJesu ukhuluma ngokuchithwa kweJerusalema langokuphela kwesikhathi

¹ Kwathi uJesu ephuma ethempelini, esehamba, kwasondela abafundi bakhe ukumtshengisa izakhiwo zethempeli.

² Wabaphendula wathi: Liyazibona zonke lezizinto na? Ngiqinisile ngithi kini: Kakuyikusala lapha ilitshe elilodwa phezu kwelinye elingayikudilizelwa phansi.

³ Kwathi esehlezi entabeni ethiwa iOliveti abafundi beza kuye bebodwa, bathi: Sitshele ukuthi lokhu kuzakuba njalo nini? Isibonakaliso sokuza kwakho lesokuphela kwesikhathi sizakuba yini?

⁴ UJesu wabaphendula wathi: Qaphelani lingaduhiswa muntu.

⁵ Ngoba abanengi bazakuza ngebizo lami besithi: Mina nginguKristu; baduhise abanengi.

⁶ Lizakuzwa ngezimpi lamahungahunga ezimpi. Khangelani lingethuki, ngoba lokhu kufanele kwenzeke, kodwa ukuphela kuzabe kungakafiki.

⁷ Ngoba isizwe sizakuvukela isizwe, lombuso uvukele umbuso; kube khona indlala lokuzamazama komhlaba indawo ngendawo.

⁸ Zonke lezizinto ziyikuqala komhelo wesikhathi esizayo.

⁹ Laphoke bazakulinikela ekuhluphekeni, balibulale; lizakuzondwa yizizwe zonke ngenxa yebizo lami.

¹⁰ Abanengi bazakukhubeka, banikelane, bazondane.

¹¹ Kuzakuvela abaprofethi bamanga abanengi, baduhise abanengi.

¹² Ngenxa yokwanda kokubi kuzakuphola uthando lwabanengi.

¹³ Kodwa ophikelelayo kuze kube sekupheleni nguye ozakusiliswa.

¹⁴ Lelivangeli lombuso lizakutshunyayelwa emhlabeni wonke kube yibufakazi ezizweni zonke, andubana kufike ukuphela.

¹⁵ Ngakho nxa libona amanyala encithakalo, akhulunywa nguDaniyeli umprofethi, emi endaweni engcwele — ofundayo kaqedisise —

¹⁶ labo abaseJudiya kababalekele ezintabeni;

¹⁷ ophezu kwendlu angehli ukuthatha izinto ezisendlini yakhe;

¹⁸ losemasimini angabuyeli emuva ukuyathatha ingubo yakhe.

¹⁹ Maye kwabakhulelweyo labamunyisayo ngalezonsuku!

²⁰ Khulekani ukuba ukubaleka kwenu kungabi sebusika loba ngeSabatha.

²¹ Ngoba ngalesosikhathi kuzakuba khona ukuhlupheka okukhulu okungazanga kube khona kusukela ekuqaleni komhlaba kuze kube khathesi lokungasayikuba khona.

²² Uba lezonsuku bezingafinyezwanga, bekungesiliswe muntu; kodwa lezonsuku zizakufinyezwa ngenxa yabakhethiweyo.

²³ Ngakhoke nxa umuntu esithi kini: Khangelani, nangu uKristu; loba esithi: Nanguya; lingakholwa.

²⁴ Ngoba kuzakuvela okristu bamanga labaprofethi bamanga, benze izibonakaliso ezinkulu lezimangaliso, ukuze kuthi nxa kungenzeka baduhise labakhethiweyo.

²⁵ Khangelani, sengilitshelile ngaphambili.

²⁶ Ngakhoke uba besithi kini: Khangelani, usenkangala; lingaphumi. Loba besithi: Khangelani, usendlini; lingakholwa.

²⁷ Ngoba njengalokhu umbane ubaneka empumalanga, ukhanye uze ubonakale entshonalanga, kuzakuba njalo ukufika kweNdodana yomuntu.

²⁸ Loba kungaphi lapho kukhona isidumbu, kulapho amanqe azakubuthana khona.

²⁹ Masinyane emva kokuhlupheka kwalezonsuku ilanga lizakufiphala, lenyanga kayiyikukhanya, lenkanyezi zizakuwa ezulwini, lamandla ezulu azakuzanyazanyiswa.

³⁰ Kung’khonake kuzakubonakala ezulwini isibonakaliso seNdodana yomuntu, zikhale zonke izizwe zomhlaba, zibone iNdodana yomuntu isiza emayezini ezulu, ilamandla lenkazimulo enkulu.

³¹ Izakuthuma izithunywa zayo ngokukhala okukhulu kophondo, ziqoqe abakhethiweyo bayo emimoyeni emine, kusukela emkhawulweni omunye wezulu kuze kube komunye.

³² Fundani umfanekiso emkhiweni; nxa ugatsha lwawo selubuthakathaka, luhlume amahlamvu, liyazi ukuba ihlobo seliseduze.

³³ Kunjalo lani, nxa libona lezizinto zonke, yazini ukuba sekuseduze sekusemnyango.

³⁴ Ngiqinisile ngithi kini: Lesisizukulwana kasiyikudlula zingakenzeki izinto zonke lezi.

³⁵ Izulu lomhlaba kuzakudlula, kodwa amazwi ami kawayikudlula.

³⁶ Kodwa lolosuku lalesosikhathi kakho muntu owaziyo ngaso, kanye lezithunywa zasezulwini, leNdodana, ngaphandle kukaBaba kuphela.

³⁷ Ngoba njengasensukwini zikaNowa, kuzakuba njalo ukufika kweNdodana yomuntu.

³⁸ Ngoba ngalezonsuku ezazingaphambili kukazamcolo babesidla, benatha, bethatha, besendiswa, kwaze kwafika usuku uNowa angena ngalo emkolweni,

³⁹ babengazi kwaze kwafika uzamcolo wabakhukhula bonke; kuzakuba njalo ukufika kweNdodana yomuntu.

⁴⁰ Ngalesosikhathi kuzakuba khona ababili ensimini; omunye uzasuswa; omunye atshiywe;

⁴¹ kuzakuthi abesifazana ababili bechola elitsheni, omunye asuswe, omunye atshiywe.

⁴² Ngakho lindani, ngoba kalazi ukuthi iNkosi yenu izakufika ngaluphi usuku.

⁴³ Kodwa yazini lokhu kokuthi, uba umnumzana ebesazi isikhathi isela elizafika ngaso, ubezakulinda, angavumi ukuba indlu yakhe ifohlelwe.

⁴⁴ Ngakhoke lanike hlalani lilungile, ngoba iNdodana yomuntu izakuza ngesikhathi elingasilindelanga.

Umfanekiso wenceku ethembekileyo lowengathembekanga

⁴⁵ Pho, ngubani umphathi wezinceku othembekileyo lohlakaniphileyo, inkosi yakhe embeke phezu kwabendlu yayo ukuba abanike ukudla ngesikhathi esifaneleyo na?

⁴⁶ Ibusisiwe leyonceku okuzakuthi inkosi yayo nxa ifika iyifumane isenza njalo.

⁴⁷ Ngiqinisile ngithi kini: Izakuyibeka phezu kwakho konke elakho.

⁴⁸ Kodwa nxa leyonceku embi icabanga isithi: Inkosi yami ilibele;

⁴⁹ ibisiqala ukuhlupha abayizinceku kanye layo, idle, inathe lezidakwa;

⁵⁰ inkosi yaleyonceku izakufika ngosuku engayilindele ngalo langesikhathi engasaziyo;

⁵¹ izakuyiqumaquma, iyabele labazenzisi; kuzakuba khona lapho ukukhala lokugedla amazinyo.