UMatewu 22 - iBhayibhili Elingcwele 1978

Umfanekiso wedili lomthimba

¹ UJesu wabuya wakhuluma labo ngemifanekiso, wathi:

² Umbuso wezulu unjengomuntu oyinkosi, owenzela indodana yakhe idili lomthimba.

³ Wathuma inceku zakhe ukuba zibize abamenyiweyo emthimbeni, kodwa kabavumanga ukuza.

⁴ Wabuya wathuma ezinye inceku, wathi: Tshonini kwabamenyiweyo ukuthi: Khangelani, sengilungisile ukudla kwami; inkabi zami lokunonileyo sekuhlatshiwe, konke sekulungile; wozani emthimbeni.

⁵ Kodwa kabananzanga, bazihambela; omunye waya ensimini yakhe, omunye waya ekuthengeni kwakhe.

⁶ Abaseleyo bazibamba inceku zakhe, baziphatha kubi, bazibulala.

⁷ Inkosi yathukuthela, yathuma amabutho ayo, yabulala labobabulali, yatshisa umuzi wabo.

⁸ Yasisithi encekwini zayo: Umthimba usulungiselelwe, kodwa abamenyiweyo kabafanelanga.

⁹ Ngakhoke hambani liye ekuhlanganeni kwezindlela, libizele emthimbeni bonke elingabafumana.

¹⁰ Lezozinceku zaphuma, zaya ezindleleni, zabutha bonke ezabafumanayo, ababi labalungileyo; indlu yomthimba yagcwala abahleziyo ekudleni.

¹¹ Inkosi yangena ukukhangela abahleziyo ekudleni, yabona khona umuntu owayengayembethe ingubo yomthimba.

¹² Yathi kuye: Mngane, ungene kanjani lapha ungayambathanga ingubo yomthimba na? Kodwa yena wathula.

¹³ Ngakho inkosi yathi ezincekwini: Mbopheni inyawo lezandla, limphosele emnyameni ongaphandle; lapho kuzakuba khona ukukhala lokugedla amazinyo.

¹⁴ Ngoba banengi ababiziweyo kodwa bayingcosana abakhethiweyo.

Umthelo kaKesari

¹⁵ AbaFarisi basuka, bacebisana ngokuba bangamthiya kanjani ekukhulumeni.

¹⁶ Bathumela kuye abafundi babo kanye labakaHerodi, bathi: Mfundisi, siyazi ukuthi wena uqotho, ufundisa indlela kaNkulunkulu ngeqiniso; kawukhathali ngomuntu, ngoba kawunanzi isimo somuntu.

¹⁷ Ngakho sitshele, wena uthini? Kuvunyelwe yini ukuthela kuKesari ingabe atshi?

¹⁸ Kodwa uJesu ebazi ububi babo wathi: Bazenzisi, lingilingelani na?

¹⁹ Ngitshengisani imali yokuthela. Bamtshengisa imali.

²⁰ Wathi kibo: Ngokabani lumfanekiso lalumbhalo na?

²¹ Bathi: NgokaKesari. Wathi kibo: Ngakhoke mnikeni uKesari izinto zikaKesari, loNkulunkulu izinto zikaNkulunkulu.

²² Sebezwile lokhu bamangala, bamtshiya, bahamba.

Ukuvuka kwabafileyo

²³ Ngalolosuku kweza kuye abaSadusi abathi kakukho ukuvuka kwabafileyo, bambuza,

²⁴ bathi: Mfundisi, uMose wathi: Uba umuntu esifa engelabantwana, umfowabo kamngene umkakhe, amvusele umfowabo inzalo.

²⁵ Kwakukhona phakathi kwethu izelamani eziyisikhombisa; owokuqala wathatha umfazi, wafa; engelanzalo watshiya umkakhe kumfowabo.

²⁶ Kwaba njalo lowesibili lowesithathu, kwaze kwaba kowesikhombisa.

²⁷ Emva kwabo bonke wafa umfazi.

²⁸ Pho, ekuvukeni kwabafileyo uzakuba ngumkabani kwabayisikhombisa, lokhu bonke babelaye na?

²⁹ UJesu wabaphendula wathi: Liduhile ngoba kaliyazi imibhalo lamandla kaNkulunkulu.

³⁰ Ngoba ekuvukeni kwabafileyo kabathathani, kabendiswa, kodwa banjengezithunywa zasezulwini.

³¹ Kodwa mayelana lokuvuka kwabafileyo kalifundanga yini okwakhulunywa kini nguNkulunkulu esithi:

³² NginguNkulunkulu kaAbrahama, loNkulunkulu kaIsaka, loNkulunkulu kaJakobe na? Kasuye uNkulunkulu wabafileyo, kodwa ngowabaphilayo.

³³ Kwathi amaxuku ekuzwa lokhu, amangala ngokufundisa kwakhe.

Umlayo wokuqala

³⁴ AbaFarisi sebezwile ukuthi uJesu ubathulisile abaSadusi, babuthana.

³⁵ Omunye wabo, isazumlayo, wambuza emlinga, wathi:

³⁶ Mfundisi, yiwuphi umlayo omkhulu emilayweni na?

³⁷ UJesu wathi kuye: Wothanda iNkosi, uNkulunkulu wakho ngenhliziyo yakho yonke, langomoya wakho wonke, langengqondo yakho yonke.

³⁸ Yiwo lowo umlayo omkhulu lowokuqala.

³⁹ Owesibili ufana lawo uthi: Wothanda umakhelwane wakho njengalokhu uzithanda wena.

⁴⁰ Kuleyomilayo emibili kumisiwe umlayo wonke labaprofethi.

UKristu losendo lwakhe

⁴¹ Sebebuthene abaFarisi, uJesu wababuza,

⁴² wathi: Lithini ngoKristu na? Uyindodana kabani na? Bathi kuye: NgekaDavida.

⁴³ Wathi kibo: Pho, uDavida watsho kanjani ngoMoya ukuthi yiNkosi? esithi:

⁴⁴ INkosi yathi eNkosini yami: Hlala ngakwesokunene sami, ngize ngibeke izitha zakho ngaphansi kwenyawo zakho.

⁴⁵ Ngakhoke uba uDavida embiza ngokuthi uyiNkosi, uyindodana yakhe kanjani na?

⁴⁶ Kwakungekho owayengamphendula; emva kwalolosuku kakwabe kusaba khona umuntu olesibindi sokumbuza.