UMatewu 21 - iBhayibhili Elingcwele 1978UJesu ungena eJerusalema ( Mark 11:1–11 ; Luka 19:28–40 ; Joha 12:12–19 ) 1 Kwathi ukuba basondele eJerusalema, sebefikile eBetfage, ngasentabeni ethiwa iOliveti, uJesu wathuma abafundi ababili, 2 wathi kubo: Hambani liye emzini okhangelene lani, lizahle libone ubabhemi ekhulekiwe lethole lilaye; libakhulule, libalethe kimi. 3 Uba umuntu esitsho ulutho kini, lizakuthi: INkosi iyabafuna. Izakubabuyisa masinyane. 4 Lokhu kwenzeka ukuba kugcwaliseke okwakhulunywa ngumprofethi ukuthi: 5 Tshonini kuZiyone ukuthi: Khangela, iNkosi yakho iyeza kuwe, imnene, ikhwele ubabhemi lethole, inkonyane kababhemi. 6 Abafundi bahamba, benza njengalokhu uJesu wayebalayile; 7 baletha ubabhemi lethole, babeka ingubo zabo phezu kwabo, wakhwela. 8 Inengi lexuku lendlala ingubo zalo endleleni, labanye bagamula ingatsha zezihlahla, bazandlala endleleni. 9 Amaxuku ayehamba ngaphambili lababelandela bamemeza bathi: Hosana kuyo iNdodana kaDavida! Ubusisiwe ozayo ebizweni leNkosi. Hosana kweliphezulu! 10 Esengenile eJerusalema, umuzi wonke wanyakazela, wathi: Ngubani lo? 11 Amaxuku athi: Lo nguJesu umprofethi waseNazaretha elaseGalili. Ukuhlanjululwa kwethempeli ( Mark 11:15–19 ; Luka 19:45–48 ; Joha 2:12–22 ) 12 UJesu wasengena ethempelini, wabaxotsha bonke ababethengisa lababethenga ethempelini, wagenqula amatafula ababentshintshelana imali lezihlalo zalabo ababethengisa inkwilimba. 13 Wathi kubo: Kulotshiwe ukuthi: Indlu yami izakubizwa ngokuthi yindlu yokukhuleka. Kodwa lina seliyenza ubhalu lwabaphangi. 14 Kwafika kuye iziphofu leziqhuli ethempelini, wazisilisa. 15 Kodwa abapristi lababhali sebebonile izimangaliso azenzayo, labantwana bememeza ethempelini besithi: Hosana kuyo iNdodana kaDavida! bathukuthela, 16 bathi kuye: Uyakuzwa lokhu abakutshoyo laba na? UJesu wathi kubo: Yebo, kalifundanga yini ukuthi: Emlonyeni wezingane lowabamunyayo uvezile ukudumisa okupheleleyo? 17 Wabatshiya, waphuma emzini waya eBethani, walala khona. Ukuthukwa komkhiwa ( Mark 11:12–14 , 20–26 ) 18 Kwathi esabuyela emzini ekuseni walamba. 19 Ebona umkhiwa ngasendleleni wasondela kuwo; kafumananga lutho kuwo kodwa amahlamvu wodwa. Wathi kuwo: Kakungabe kusavela isithelo kuwe lanini. Umkhiwa wabuna khona lapho. 20 Kwathi sebekubonile lokhu abafundi bakhe bamangala, bathi: Umkhiwa ubune kanjani masinyane na? 21 UJesu wabaphendula wathi: Ngiqinisile ngithi kini: Uba lilokukholwa, lingathandabuzi, kaliyikwenza lokhu okomkhiwa kuphela, kodwa loba lithi kulintaba: Quphuka, uphoseke olwandle; kuzakwenzeka. 22 Ngakho konke elikucela ngokukhuleka, likholwa, lizakukwamukeliswa. Amandla kaJesu ( Mark 11:27–33 ; Luka 20:1–8 ) 23 Kwathi esengenile ethempelini, abapristi abakhulu labadala besizwe basondela kuye esafundisa, bathi: Izinto lezi uzenza ngawaphi amandla? Ngubani okunike lamandla na? 24 UJesu wabaphendula wathi: Lami ngizakulibuza umbuzo ube munye. Uba lingitshela lokhu, lami ngizakulitshela ukuthi ngenza lezizinto ngawaphi amandla. 25 Ubhaphathizo lukaJohane lwavela ngaphi, ezulwini ingabe ebantwini na? Bakhulumisana besithi: Uba sisithi ezulwini, uzakuthi kithi: Pho, kalikholwanga kuye ngani na? 26 Kodwa uba sisithi ebantwini, siyesaba ixuku; ngoba bonke bathi uJohane ungumprofethi. 27 Basebemphendula uJesu bathi: Kasazi. Wathi kubo: Lami kangilitsheli ukuthi ngenza lezizinto ngawaphi amandla. Umfanekiso wamadodana amabili 28 Lithini na? Umuntu wayelamadodana amabili; waya kweyokuqala, wathi: Mntanami, hamba uyesebenza lamuhla esivinini. 29 Yaphendula yathi: Angithandi. Kodwa emva kwalokho yaphenduka, yahamba. 30 Waya kweyesibili, watsho njalo. Yona yaphendula yathi: Ngiyahamba, nkosi. Kodwa kayiyanga. 31 Yiyiphi kulawo amabili eyenza intando kayise na? Bathi kuye: Eyokuqala. UJesu wathi kubo: Ngiqinisile ngithi kini: Abathelisi lezifebe bayangena embusweni kaNkulunkulu phambi kwenu. 32 Ngoba uJohane wafika kini ngendlela yokulunga, kalikholwanga kuye; kodwa abathelisi lezifebe bakholwa kuye; kodwa lina lanxa selikubonile, kaliphendukanga emva kwalokho, ukuba likholwe kuye. Umfanekiso wabalimi besivini ( Mark 12:1–12 ; Luka 20:9–19 ) 33 Zwanini omunye umfanekiso. Kwakukhona umnumzana owahlanyela isivini, wasibiyela ngothango, wemba isikhamelo, wakha idumba, wasiqatshisa kubalimi, waya kwelinye ilizwe. 34 Kwathi sekusondele isikhathi sezithelo, wathuma inceku zakhe kubalimi ukuze zamukele izithelo zakhe. 35 Abalimi bazibamba inceku zakhe, enye bayitshaya, enye bayibulala, enye bayikhanda ngamatshe. 36 Wabuya wathuma ezinye inceku, ezinengi kulezokuqala; benze njalo lakulezo. 37 Ekucineni wathumela indodana yakhe kibo esithi: Bazakuyihlonipha indodana yami. 38 Kodwa abalimi sebeyibonile indodana, bakhulumisana bathi: Le yindlalifa; wozani siyibulale, ilifa libe ngelethu. 39 Bayibamba, bayiphosela ngaphandle kwesivini, bayibulala. 40 Phoke, mhla kufika umninisivini uzabenza njani abalimi labo na? 41 Bathi kuye: Uzakubabulala kubi labo ababi, lesivini sakhe sinikwe abanye abalimi abazakumnika izithelo ngezikhathi zazo. 42 UJesu wathi kibo: Kalifundanga yini emibhalweni ukuthi: Ilitshe elaliwayo ngabakhi yilo eseliyinhloko yengonsi; lokhu kwenziwe yiNkosi; kuyamangalisa emehlweni ethu? 43 Ngakhoke ngithi kini: Lizakwamukwa umbuso kaNkulunkulu, unikwe isizwe esizakuthela izithelo zawo. [ 44 Lowo owela phezu kwalelilitshe uzakuphahlazeka; kodwa ilowo lalowo eliwela phezu kwakhe lizakumchoboza.] 45 Kwathi abapristi abakhulu labaFarisi sebezwile imifanekiso yakhe, bazi ukuthi ubekhuluma ngabo. 46 Basebefuna ukumbamba; kodwa besaba amaxuku, ngoba ayesithi ungumprofethi. |
Bible Society of Zimbabwe 1978
Bible Society of Zimbabwe