UMatewu 19 - iBhayibhili Elingcwele 1978

Ukuhlalisana kwabathetheneyo

¹ Kwathi uJesu eseqedile lawomazwi wasuka eGalili, waya elizweni laseJudiya ngaphetsheya kweJordani.

² Amaxuku amakhulu amlandela, wawasilisa khona.

³ Beza kuye abaFarisi, bamlinga besithi: Kuvunyelwe yini ukuba indoda ilahle umkayo loba ngaliphi icala na?

⁴ Wabaphendula wathi: Kalibalanga yini ukuthi yena owabadabula ekuqaleni wabenza owesilisa lowesifazana na?

⁵ Wathi: Ngcnxa yalokhu umuntu uzakutshiya uyise lonina, anamathele kumkakhe; labo ababili bazakuba nyamanye.

⁶ Ngakho kabasebabili, kodwa sebenyamanye. Ngakhoke lokho uNkulunkulu akuhlanganisileyo kakungahlukaniswa ngumuntu.

⁷ Bathi kuye: Pho, uMose walayelani ukuba kunikwe incwadi yesahlukaniso, alahlwe na?

⁸ Wathi kibo: Ngenxa yobulukhuni benhliziyo yenu uMose walivumela ukwahlukana labo omkenu, kodwa kusukela ekuqaleni kwakungenjalo.

⁹ Ngithi kini: Lowo olahla umkakhe, kungesikho ngenxa yokufeba, athathe omunye, uyafeba.

¹⁰ Abafundi bathi kuye: Uba kunjalo ngomuntu lomkakhe kakukuhle ukuthathana.

¹¹ Kodwa wathi kibo: Kakusibo bonke abangalamukela lelilizwi, kuphela bona abakunikiweyo.

¹² Ngoba kukhona abathenwa abazalwa benjalo, kusukela eziswini zabonina; kukhona abanye abathenwa ngokuthenwa ngabantu; kukhona futhi abathenwa abazithenileyo ngenxa yombuso wezulu. Lowo ongakwamukela lokho kakwamukele.

Ukubusiswa kwabantwana

¹³ Kwalethwa kuye abantwana ukuba abeke izandla zakhe phezu kwabo, akhuleke; kodwa abafundi babakhalimela.

¹⁴ Kodwa uJesu wathi: Vumelani abantwana beze kimi, lingabanqabeli, ngoba umbuso wezulu ungowabanje.

¹⁵ Wabeka izandla zakhe phezu kwabo; wasuka lapho.

Insizwa enothileyo

¹⁶ Kwasekufika kuye omunye, wathi: Mfundisi, ngizakwenza ulutho bani olulungileyo ukuba ngibe lokuphila okungapheliyo na?

¹⁷ Wathi kuye: Ungibuzelani ngokulungileyo na? Munye kuphela olungileyo. Kodwa uba uthanda ukungena ekuphileni, gcina imilayo.

¹⁸ Wathi kuye: Yiphi na? UJesu wathi: Ungabulali, ungafebi, ungebi, ungafakazi amanga;

¹⁹ hlonipha uyihlo lonyoko; njalo wothanda umakhelwane wakho njengalokhu uzithanda wena.

²⁰ Insizwa yathi kuye: Konke lokhu ngikugcinile; ngisaswelani?

²¹ UJesu wathi kuyo: Uba uthanda ukuphelela, hamba uthengise impahla yakho, ubaphe abayanga, ng’khona uzakuba lenotho ezulwini; uze ungilandele.

²² Kodwa isizwile lelilizwi insizwa yasuka idanile, ngoba yayilenotho enengi.

²³ UJesu wasesithi kubafundi bakhe: Ngiqinisile ngithi kini: Onothileyo uzakungena ngokulukhuni embusweni wezulu.

²⁴ Futhi ngithi kini: Kulula ukuba ikamela lingene ngentunja yosungulo kulokuba umuntu onothileyo angene embusweni wezulu.

²⁵ Sebezwile lokho abafundi bakhe bamangala kakhulu, bathi: Pho, kungasiliswa bani na?

²⁶ Kodwa uJesu wabakhangela wathi: Kubantu kakulakwenzeka, kodwa kuNkulunkulu zonke izinto zingenzeka.

Umvuzo wokuzidela

²⁷ UPetro wasekhuluma esithi kuye: Khangela, thina sitshiye konke, sakulandela. Pho, sizakuzuzani na?

²⁸ UJesu wathi kubo: Ngiqinisile ngithi kini: Lina elingilandeleyo, elizweni elizayo lapho iNdodana yomuntu isihlezi esihlalweni sobukhosi bayo, lani lizakuhlala ezihlalweni zobukhosi ezilitshumi lambili lithonisise izizwe ezilitshumi lambili zakoIsrayeli.

²⁹ Lalowo otshiye izindlu, labafowabo, lodadewabo, loyise, lonina, labantwana ingabe amasimu ngenxa yebizo lami, uzakwamukeliswa ngekhulu, adle ilifa lokuphila okungapheliyo.

³⁰ Kodwa abanengi abokuqala bazakuba ngabokucina, labokucina babe ngabokuqala.