UMatewu 18 - iBhayibhili Elingcwele 1978

UJesu ufundisa ngokuthobeka langezikhubekiso

¹ Ngalesosikhathi abafundi basondela kuJesu bathi: Ngubani omkhulu embusweni wezulu na?

² Wabiza umntwana, wammisa phakathi kwabo,

³ wathi: Ngiqinisile ngithi kini: Uba lingaphenduki, libe njengabantwana, kalisoze lingene embusweni wezulu.

⁴ Ngakho lowo ozakuzithoba njengalumntwana, nguye omkhulu embusweni wezulu.

⁵ Lowo owamukela abe munye umntwana onje ebizweni lami wamukela mina.

⁶ Kodwa lowo okhubekisa omunye walaba abancinyane abakholwa kimi, kungakuhle kuye ukuba ilitshe lokuchola elikhulu lilengiswe entanyeni yakhe, atshoniswe enzikini yolwandle.

⁷ Maye kuwo umhlaba ngenxa yezikhubekiso! Ngoba izikhubekiso zimele ukufika, kodwa maye kulowomuntu esifika ngaye isikhubekiso!

⁸ Uba isandla sakho sikukhubekisa, ingabe unyawo lwakho, kuqume, ukulahle; kungcono kuwe ukungena ekuphileni uyingini ingabe uyisiqhwala kulokuba uphoselwe emlilweni ongapheliyo ulezandla ezimbili ingabe inyawo ezimbili.

⁹ Uba ilihlo lakho likukhubekisa, likhuphe; kungcono kuwe ukungena ekuphileni ulelihlo lilinye kulokuba uphoselwe esihogweni ulamehlo amabili.

¹⁰ Khangelani lingadeleli omunye walaba abancinyane ngoba ngithi kini: Ezulwini izithunywa zabo zihlala zibona ubuso bukaBaba osezulwini. [

¹¹ Ngoba iNdodana yomuntu ize ukusilisa okulahlekileyo.]

Imvu elahlekileyo

¹² Lithini na? Uba umuntu elezimvu ezilikhulu, kulahleke enye kuzo, kazitshiyi yini ezingamatshumi aficamunwemunye lezificamunwemunye ezintabeni, ahambe ukuyadinga elahlekileyo na?

¹³ Uba eyifumana, ngiqinisile ngithi kini: Uthokoza ngayo kakhulu kulangazo ezingamatshumi aficamunwemunye lezificamunwemunye ezingalahlekanga.

¹⁴ Kunjalo kasiyo intando kaYihlo osezulwini ukuba kubhubhe abe munye walaba abancinyane.

Ukuphathwa kwabenza okubi

¹⁵ Alubana umfowenu ekona, hamba umsole lilodwa. Uba ekuzwa, umzuzile umfowenu.

¹⁶ Kodwa uba engakuzwa, thatha abe munye ingabe babe babili bahambe lawe ukuba wonke amazwi aqiniswe ngemilomo yabofakazi ababili ingabe abathathu.

¹⁷ Alubana esala ukubezwa bona, tshela ibandla; uba esala ukuzwa lalo ibandla, kabe njengowezizwe lomthelisi kuwe.

¹⁸ Ngiqinisile ngithi kini: Lokho elizakukubopha emhlabeni kuzakuba kubotshiwe lasezulwini, lalokho elizakukukhulula emhlabeni kuzakuba kukhululwe lasezulwini.

Ukukhuleka kwabahlanganyelayo

¹⁹ Futhi ngiqinisile ngithi kini: Uba ababili benu bevumelana emhlabeni loba ngaluphi ulutho abalucelayo, bazakulwenzelwa nguBaba osezulwini.

²⁰ Ngoba lapho ababili ingabe abathathu babuthene khona ebizweni lami, ngikhona lapho phakathi kwabo.

Umfanekiso wenceku engelasihawu

²¹ UPetro wasesondela wathi kuye: Nkosi, umfowethu uzakungona kangaki, ngimthethelela na? Kuze kube kasikhombisa na?

²² UJesu wathi kuye: Kangitsho kuwe ukuthi kuze kube kasikhombisa, kodwa ngithi kuze kube kamatshumi ayisikhombisa ephindwe kasikhombisa.

²³ Ngakhoke umbuso wezulu unjengomuntu oyinkosi owayethanda ukuba inceku zakhe zimlandisele ngemali yakhe.

²⁴ Kwathi eseqalile ukubala, kwalethwa kuye enye elomlandu wamadola azinkulungwane ezinengi.

²⁵ Kodwa njengoba yayingelalutho lokuhlawula, inkosi yalaya ukuba ithengiswe lomkayo, labantwana bayo, lakho konke elakho, kuhlawulwe.

²⁶ Ngakho leyonceku yawa phansi, yayincenga, yathi: Ake ungibekezelele, ngizakukuhlawula konke.

²⁷ Inkosi yaleyonceku yayihawukela, yayikhulula, yayiyekela umlandu.

²⁸ Kodwa isaphuma leyonceku yafumana omunye wabayizinceku kanye layo olomlandu kuyo wamadola amalutshwana, yambamba, yamkhama, yathi: Hlawula umlandu wakho.

²⁹ Inceku leyo yawa phansi, yayincenga yathi: Ake ungibekezelele, ngizakukuhlawula.

³⁰ Kodwa yona yala, yasuka yayifaka entolongweni ize iwuhlawule lowomlandu.

³¹ Ngakhoke abayizinceku kanye layo bekubona okwenzekileyo, badabuka kakhulu, baya babikela inkosi yabo konke okwenzekileyo.

³² Ngakho inkosi yayo yayibiza, yathi kiyo: Wena nceku embi, wonke lowomlandu ngakuyekela ngoba wangincenga;

³³ ngabe kawumhawukelanga yini omunye wabayizinceku kanye lawe, njengokuba lami ngakuhawukela wena na?

³⁴ Inkosi yayo yathukuthela, yayinikela kubaphathi bentolongo, ize ihlawule wonke umlandu wayo.

³⁵ Uzakwenza njalo kini laye uBaba osezulwini uba lingathetheleli lowo lalowo umfowenu ngenhliziyo zenu.