UMatewu 16 - iBhayibhili Elingcwele 1978Abafuna izibonakaliso ( Mark 8:11–13 ; Luka 12:49–56 ; 11:29 ) 1 AbaFarisi labaSadusi beza bacela kuye ukuba abatshengise isibonakaliso esivela ezulwini, bemlinga. 2 Wabaphendula wathi: Kusihlwa lithi: Lizakusa ngoba umkhathi ubomvu; 3 kuthi ekuseni lithi: Lizakuna lamhla ngoba umkhathi ubomvu, lithwele. Liyakwazi ukuchasisa ukuma komkhathi kodwa kalikwazi ukuchasisa izibonakaliso zezikhathi. 4 Isizukulwana esibi lesifebayo sifuna isibonakaliso, kodwa kasiyikunikwa sibonakaliso kuphela isibonakaliso sikaJona. Wabatshiya wahamba. UJesu ukhuza abafundi ngokungaqedisisi kwabo ( Mark 8:14–21 ) 5 Sebefikile ngaphetsheya abafundi babekhohliwe ukuphatha ukudla. 6 UJesu wasesithi kibo: Qaphelani, lixwaye imvubelo yabaFarisi labaSadusi. 7 Bakhulumisana bodwa besithi: Kungoba singaphathanga ukudla. 8 UJesu ekwazi lokhu wathi: Lina elilokukholwa okuncinyane, kungani likhulumisana ngokuthi kalilakudla na? 9 Kalikaqedisisi yini, futhi kalikhumbuli izinkwa ezinhlanu zezinkulungwane ezinhlanu, lokuthi labutha izitsha ezingaki na? 10 Lezinkwa zezinkulungwane ezine, lokuthi labutha izitsha ezingaki na? 11 Kaliqedisisi ngani ukuthi bengingakhulumi lani ngesinkwa na? Kodwa xwayani imvubelo yabaFarisi labaSadusi. 12 Basebebona ukuthi katshongo ukuba baxwaye imvubelo yezinkwa kodwa ukufundisa kwabaFarisi labaSadusi. Isivumo sokukholwa sikaPetro ( Mark 8:27–30 ; Luka 9:18–21 ) 13 Kwathi uJesu esefikile endaweni yaseKesariya Filiphi wababuza abafundi bakhe, wathi: Abantu bathi iNdodana yomuntu ingubani na? 14 Bathi: Abanye bathi nguJohane uMbhaphathizi; labanye bathi nguElija; labanye bathi nguJeremiya ingabe omunye wabaprofethi. 15 Wathi kubo: Linake lithi ngingubani na? 16 USimoni Petro waphendula wathi: UnguKristu, iNdodana kaNkulunkulu ophilayo. 17 UJesu wamphendula wathi kuye: Ubusisiwe wena Simoni kaJona, ngoba inyama legazi kakukwambulelanga lokhu kodwa uBaba osezulwini. 18 Lamike ngithi kuwe: Wena unguPetro okuyikuthi Dwala; phezu kwalelidwala ngizakulakha ibandla lami; amasango endawo yabafileyo kawayikulahlula. 19 Ngizakukunika amakhiye ombuso wezulu. Lokho ozakukubopha emhlabeni kuzakuba kubotshiwe lasezulwini; lalokho ozakukuthukulula emhlabeni kuzakuba kuthukululwe lasezulwini. 20 Wasebalayisisa abafundi ukuba bangatsheli muntu ukuthi nguye onguKristu. UJesu ukhuluma ngokuhlupheka kwakhe ( Mark 8:31–33 ; Luka 9:22 ) 21 Kusukela kulesosikhathi uJesu waqala ukubatshengisa abafundi bakhe ukuba umele ukuya eJerusalema, ahlutshwe kakhulu ngabadala labapristi abakhulu lababhali, abulawe, avuswe ngosuku lwesithathu. 22 UPetro wamthatha, waqala ukumkhalimela esithi: Kakungabi kuwe, Nkosi, lokhu kakusoze kwenziwa kuwe. 23 Yena waphendula, wathi kuPetro: Buyela emva kwami, Sathane; uyisikhubekiso kimi, ngoba kawucabangi ngezinto zikaNkulunkulu kodwa ngezabantu. Ukuhlutshwa kukaJesu lokwabamlandelayo ( Mark 8:34—9:1 ; Luka 9:23–27 ) 24 UJesu wasesithi kubafundi bakhe: Uba umuntu ethanda ukungilandela, kazidele, athathe isiphambano sakhe, angilandele. 25 Ngoba ilowo lalowo othanda ukusilisa ukuphila kwakhe kuzamlahlekela; kodwa olahlekelwa yikuphila kwakhe ngami uzakukufumana. 26 Ngoba kuzamsizani umuntu ukuzuza umhlaba wonke, alahlekelwe yikuphila kwakhe; ingabe anganikani umuntu kube yinhlawulo yokuphila kwakhe na? 27 Ngoba iNdodana yomuntu izakuza ngenkazimulo kaYise kanye lezithunywa; kung’khona izakuvuza ilowo lalowo njengokwenza kwakhe. 28 Ngiqinisile ngithi kini: Bakhona abanye kwabemiyo lapha abangayikuzwa ukufa baze bayibone iNdodana yomuntu isiza embusweni wayo. |
Bible Society of Zimbabwe 1978
Bible Society of Zimbabwe