UMatewu 15 - iBhayibhili Elingcwele 1978

AbaFarisi lababhali basolwa ngenxa yezimiso zabo

¹ Kwasekufika kuJesu abaFarisi lababhali bevela eJerusalema, bathi:

² Kungani ukuba abafundi bakho baphule isiko labadala na? Ngoba kabagezi izandla nxa besidla.

³ Wabaphendula wathi: Lanike kungani lisaphula umlayo kaNkulunkulu ngenxa yesiko lenu na?

⁴ Ngoba uNkulunkulu walaya wathi: Hlonipha uyihlo lonyoko; lokuthi: Okhuluma kubi ngoyise ingabe ngonina kafe lokufa.

⁵ Kodwa lina lithi: Aluba umuntu esithi kuyise ingabe kunina: Lokho obungasizwa yimi ngakho kungumnikelo; kakusaswelekanga ukuba ahloniphe uyise ingabe unina.

⁶ Ngalokho lenza ilizwi likaNkulunkulu libe yize ngenxa yesiko lenu.

⁷ Lina bazenzisi, uIsaya wazisa kuhle ngani esithi:

⁸ Lababantu bangidumisa ngemilomo yabo, kodwa inhliziyo yabo ikhatshana lami;

⁹ bangikhonza ngeze, befundisa izifundiso eziyimilayo yabantu.

¹⁰ Wasebiza abantu wathi kubo: Lalelani, liqedisise.

¹¹ Kakusikho okungena emlonyeni okungcolisa umuntu; kodwa okuphuma emlonyeni yikho okungcolisa umuntu.

¹² Abafundi bakhe basebesondela bathi kuye: Uyazi ukuthi abaFarisi bathe ukulizwa lelolizwi, bakhubeka na?

¹³ Waphendula wathi: Zonke izihlahlakazana ezingahlanyelwanga nguBaba wasezulwini zizakusitshunwa.

¹⁴ Bayekeleni; bangabakhokheli abayiziphofu. Alubana isiphofu sikhokhela isiphofu, zizakuwela emgodini zombili.

¹⁵ UPetro wasesithi kuye: Sichasisele lumfanekiso.

¹⁶ Wathi: Kanti lani lisengabangelakuqedisisa na?

¹⁷ Kaliboni ukuba konke okungena emlonyeni kuya esiswini kusuke kuphumele ngaphandle na?

¹⁸ Kodwa okuphuma emlonyeni kuvela enhliziyweni; lokhu kuyamngcolisa umuntu.

¹⁹ Ngoba enhliziyweni kuvela imicabango emibi, lokubulala, lobufebe, lokuphinga, lokweba, lokufakaza amanga, lokunyeya.

²⁰ Yizo lezozinto ezimngcolisayo umuntu; kodwa ukudla ngezandla ezingahlanjululwanga kakumngcolisi muntu.

Owesifazana waseKanani

²¹ UJesu wasuka lapho waya elizweni laseTire leSidoni.

²² Owesifazana waseKanani wakhala kuye wathi: Nkosi, Ndodana kaDavida, akungihawukele! Indodakazi yami ingenwe ngumoya omubi.

²³ Kodwa kamphendulanga ngitsho langelizwi nje. Basebesondela kuye abafundi bakhe, bamncenga bathi: Mxotshe, ngoba uyasilandela ekhala.

²⁴ Waphendula wathi: Kangithunywanga kwabanye, kuphela kuzo izimvu ezilahlekileyo zendlu yakoIsrayeli.

²⁵ Kodwa owesifazana wasondela, waguqa phambi kwakhe, wathi: Nkosi, ngisize.

²⁶ UJesu waphendula wathi: Kakukuhle ukuthatha ukudla kwabantwana, kuphoselwe ezinjeni.

²⁷ Yena wathi: Yebo, Nkosi, kodwa lezinja ziyadla imvuthuluka ewa etafuleni yabaninizo.

²⁸ UJesu wasemphendula esithi: O Mama, kukhulu ukukholwa kwakho! Kakube kuwe njengokufisa kwakho. Indodakazi yakhe yasila kusukela kulesosikhathi.

UJesu usilisa iziguli

²⁹ UJesu wasuka lapho wadlula ngasolwandle lwaseGalili; wenyukela entabeni, wahlala phansi khona.

³⁰ Kweza kuye amaxuku amakhulu eleziqhuli lezingini leziphofu lezimungulu, labanye abanengi; ababeka ngasenyaweni zakhe; wabasilisa,

³¹ baze bamangala abantu bebona izimungulu zikhuluma, lezingini zisilisiwe, leziqhuli zihamba, leziphofu zibona; bamdumisa uNkulunkulu kaIsrayeli.

UJesu usuthisa amadoda azinkulungwane ezine

³² UJesu wasebabiza abafundi bakhe, wathi: Ngiyalihawukela ixuku ngoba selilami insuku ezintathu, lingelalutho lokudla. Kangithandi ukuba ngibadabulele belambile, funa baphelelwe ngamandla endleleni.

³³ Abafundi bakhe bathi kuye: Sizakuzuza ngaphi lapha enkangala izinkwa ezinganela ukuba zisuthise ixuku elingaka na?

³⁴ UJesu wathi kubo: Lilezinkwa ezingaki na? Bathi: Eziyisikhombisa, lenhlanzana eziyingcosana.

³⁵ Walaya ixuku ukuba lihlale phansi.

³⁶ Wathatha izinkwa eziyisikhombisa lenhlanzi; esebongile wazihlephula wazinika abafundi bakhe, labafundi bazinika ixuku.

³⁷ Bonke badla, basutha; babutha imvuthuluka eseleyo, izitsha eziyisikhombisa zigcwele.

³⁸ Labo abadlayo babengamadoda azinkulungwane ezine ngaphandle kwabesifazana labantwana.

³⁹ Esedabulele ixuku wangena emkolweni waya emikhawulweni yaseMagadana.