UMatewu 13 - iBhayibhili Elingcwele 1978

Umfanekiso womhlanyeli

¹ Ngalolosuku uJesu waphuma endlini, wahlala phansi ngasolwandle.

² Kwabuthana kuye amaxuku amakhulu, waze wangena emkolweni, wahlala phansi; labantu bonke bema okhunjini.

³ Wakhuluma labo izinto ezinengi ngemifanekiso, wathi: Khangelani, kwaphuma umhlanyeli ukuyahlanyela.

⁴ Kwathi ekuhlanyeleni kwakhe enye inhlanyelo yawela endleleni; kwafika inyoni, zayidobha zayiqeda.

⁵ Enye inhlanyelo yawela edwaleni, lapho kwakungelamhlabathi omnengi khona; yamila masinyane ngoba kwakungelamhlabathi omnengi.

⁶ Kwathi ekuphumeni kwelanga, yahanguka; yabuna ngoba yayingelampande.

⁷ Enye inhlanyelo yawela emeveni; ameva akhula, ayiminyanisa.

⁸ Enye inhlanyelo yawela emhlabathini omuhle; yathela izithelo, enye ikhulu, enye amatshumi ayisithupha, enye amatshumi amathathu.

⁹ Olezindlebe akezwe.

Umsebenzi wemifanekiso

¹⁰ Kwasekufika abafundi, bathi kuye: Ukhulumelani kibo ngemifanekiso?

¹¹ Wabaphendula wathi: Lina linikiwe ukwazi imfihlakalo yombuso wezulu; kodwa bona kabakunikwanga.

¹² Ngoba lowo olakho uzakunikwa, kwande; kodwa lowo ongelakho uzakwamukwa lalokho alakho.

¹³ Ngakho ngikhuluma kibo ngemifanekiso, ngoba loba bebona kababonisisi, loba besizwa kabezwisisi, kabaqedisisi.

¹⁴ Kugcwaliseka kubo ukwazisa kukaIsaya kokuthi: Ukuzwa lizakuzwa, kodwa kaliyikuqedisisa; ukubona lizakubona, kodwa kaliyikubonisisa;

¹⁵ ngoba inhliziyo yalesisizwe seyaba lukhuni, lendlebe zabo zizwa kalukhuni, lamehlo abo bawacimezile, funa babone ngamehlo abo, bezwe ngendlebe zabo, baqedisise ngenhliziyo zabo, baphenduke, ngibasilise.

¹⁶ Kodwa abusisiwe amehlo enu ngoba ayabona, lendlebe zenu ngoba ziyezwa.

¹⁷ Ngiqinisile ngithi kini: Banengi abaprofethi labalungileyo ababethanda ukubona elikubonayo, kodwa kabakubonanga; lokuzwa elikuzwayo, kabakuzwanga.

Ukuchasiswa komfanekiso womhlanyeli

¹⁸ Ngakhoke zwanini lina umfanekiso womhlanyeli.

¹⁹ Kuthi umuntu esizwa ilizwi lombuso engaliqedisisi, kuze uSathane ahluthune okuhlanyelwe enhliziyweni yakhe. Yilo ohlanyelwe endleleni.

²⁰ Ohlanyelwe edwaleni nguye olizwayo ilizwi, alamukele masinyane ngokuthokoza;

²¹ kodwa kalampande phakathi kwakhe, ngakho uhlala isikhatshana, kuthi sekuvela inkathazo ingabe ukuzingelwa ngenxa yelizwi, akhubeke masinyane.

²² Ohlanyelwe emeveni nguye olizwayo ilizwi, kodwa ukuphisekela komhlaba lokukhohlisa kwenotho kuyaminyanisa ilizwi, lingatheli isithelo.

²³ Ohlanyelwe emhlabathini omuhle nguye olizwayo ilizwi, aliqedisise; athele izithelo impela, omunye aveze ikhulu, omunye amatshumi ayisithupha, lomunye amatshumi amathathu.

Umfanekiso womfaba, lowemastade, lowemvubelo

²⁴ Wabeka phambi kwabo omunye umfanekiso esithi: Umbuso wezulu ufaniswa lomuntu owahlanyela inhlanyelo enhle ensimini yakhe;

²⁵ kodwa kwathi abantu besalele, kwafika isitha sakhe, sahlanyela umfaba phakathi kwamabele, sahamba.

²⁶ Kwathi ukuba likhule ikhaba, lithele isithelo, umfaba lawo wabonakala njalo.

²⁷ Zasezisiza inceku zomnumzana zathi kuye: Nkosi, kawuhlanyelanga inhlanyelo enhle ensimini yakho na? Pho, iwuthethe ngaphi umfaba?

²⁸ Wathi kuzo: Lokhu kwenziwe yisitha. Inceku zathi kuye: Uthanda ukuba siye ukuwusiphuna na?

²⁹ Kodwa wathi: Atshi, funa ekusiphuneni kwenu umfaba lisiphune kanye lamabele.

³⁰ Yekelani kukhule kokubili ndawonye, kuze kuvunwe; ngesikhathi sokuvuna ngizakuthi kwabavunayo: Buthani kuqala umfaba liwubophe izinyanda ukuba utshiswe; kodwa amabele liwabuthele esihudlwini sami.

³¹ Wabatshela omunye umfanekiso esithi: Umbuso wezulu ufana lohlamvu lwemastade, aluthatha umuntu waluhlanyela ensimini yakhe;

³² lona kambe luncinyane kulazo zonke inhlamvu, kodwa nxa selukhulile lukhulu kulezihlahla zonke luba yisihlahla kuze kufike inyoni zaphezulu, zakhele engatsheni zaso.

³³ Wabatshela omunye umfanekiso, wathi: Umbuso wezulu unjengemvubelo ayithathayo owesifazana, wayihlanganisa lamagokoko amabili empuphu, kwaze kwabila konke.

³⁴ Lezizinto zonke uJesu wazikhuluma emaxukwini ngemifanekiso; ngaphandle kwemifanekiso kakhulumanga lutho kibo,

³⁵ ukuze kugcwaliseke okwakhulunywa ngumprofethi uIsaya ukuthi: Ngizakuvula umlomo wami ngemifanekiso, ngikhulume okufihlakeleyo kusukela ekudatshulweni komhlaba.

³⁶ Wasetshiya amaxuku wangena endlini. Basondela kuye abafundi bakhe, bathi: Sichasisele umfanekiso womfaba ensimini.

³⁷ Wabaphendula wathi: Ohlanyela inhlanyelo enhle yiNdodana yomuntu;

³⁸ insimu ngumhlaba; inhlanyelo enhle yibo abantwana bombuso; kodwa umfaba ungabantwana bakaSathane;

³⁹ lesitha esawuhlanyelayo nguSathane; ukuvuna kuyikuphela kwesikhathi; labavunayo bayizithunywa.

⁴⁰ Ngakhoke njengalokhu umfaba uyabuthwa, utshiswe emlilweni, kuzakuba njalo ekupheleni kwalesisikhathi.

⁴¹ INdodana yomuntu izakuthuma izithunywa zayo, zibuthe, zikhuphe embusweni wayo konke okukhubekisayo lalabo abenza okubi,

⁴² zibaphosele eziko lomlilo; lapho kuzakuba khona ukukhala lokugedla amazinyo.

⁴³ Kung’khonake abalungileyo bazakukhanya njengelanga embusweni kaYise wabo. Olendlebe akezwe.

Umfanekiso wenotho, lowamangqongqo aligugu lowembule

⁴⁴ Umbuso wezulu unjengenotho efihliweyo ensimini, eyafunyanwa ngumuntu, wayifihla; ekuthokozeni kwakhe ahambe, athengise konke alakho athenge leyonsimu.

⁴⁵ Futhi umbuso wezulu unjengomuntu ongumthengi ofuna amangqongqo aligugu elikhulu;

⁴⁶ esefumene amanye amangqongqo aligugu alenani elikhulu, wasuka wathengisa konke alakho, wawathenga.

⁴⁷ Futhi umbuso wezulu unjengembule elaphoswa olwandle, labutha zonke inhlobo zenhlanzi;

⁴⁸ lithe seligcwele, balidonsela okhunjini, bahlala phansi, babuthela ezilungileyo ezitsheni, kodwa ezimbi bazilahla.

⁴⁹ Kuzakuba njalo ekupheleni kwesikhathi; izithunywa zizakuphuma, zahlukanise ababi kwabalungileyo,

⁵⁰ zibaphosele ababi emlilweni obhebhayo; lapho kuzakuba khona ukukhala lokugedla amazinyo.

⁵¹ Seliziqedisisile zonke lezizinto na? Bathi kuye: Yebo.

⁵² Wathi kubo: Ngakhoke ilowo lalowombhali ofundiselwe umbuso wezulu unjengomuntu ongumnumzana okhupha enothweni yakhe okutsha lokudala.

UJesu udelelwa emzini wakibo

⁵³ Kwathi uJesu eseqedile limifanekiso wasuka lapho.

⁵⁴ Wafika emzini wakibo, wabafundisa esinagogeni labo, baze bamangala, bathi: Lo ukuthatha ngaphi lokhukuhlakanipha lalimisebenzi yamandla na?

⁵⁵ Lo kasiyo indodana yombazi na? Unina kathiwa nguMariya yini, labafowabo kayisibo oJakobe loJosefa loSimoni loJudasi na?

⁵⁶ Lodadewabo kabakho lapha bonke kithi na? Pho, lo uzithatha ngaphi zonke lezizinto na?

⁵⁷ Bakhubeka ngaye. UJesu wasesithi kubo: Umprofethi kasweli ukudunyiswa ngaphandle kwaselizweni lakibo lasendlini yakwabo.

⁵⁸ Kenzanga lapho imisebenzi eminengi yamandla ngenxa yokungakholwa kwabo.