UMatewu 12 - iBhayibhili Elingcwele 1978

UJesu uchasisa umlayo weSabatha

¹ Ngalesosikhathi uJesu wadabula emasimini ngeSabatha; abafundi bakhe babelambile, baqala ukukha izikhwebu, badla.

² Kodwa kwathi abaFarisi bekubona lokho bathi kuye: Khangela, abafundi bakho benza okungavunyelwayo ngeSabatha.

³ Wathi kibo: Kalifundanga yini okwenziwa nguDavida mhla elambile lababelaye

⁴ ukuthi wangena endlini kaNkulunkulu, wadla izinkwa ezahlukaniselwe uNkulunkulu ezingavunyelwe ukudliwa nguye lababelaye kodwa ngabapristi bodwa na?

⁵ Futhi kalifundanga yini emlayweni ukuthi ngeSabatha abapristi bayalona iSabatha ethempelini bangabi lacala na?

⁶ Kodwa ngithi kini: Kukhona lapha okukhulu kulethempeli.

⁷ Aluba belisazi ukuba kutsho ukuthini ukuthi: Ngifuna isihawu kulomhlatshelo; ngabe kalibalahlanga labo abangelacala.

⁸ Ngoba iNdodana yomuntu iyiNkosi yeSabatha.

UJesu usilisa ngeSabatha

⁹ Wasuka lapho, wangena esinagogeni labo.

¹⁰ Kwakukhona umuntu olesandla esitshwabheneyo. Bambuza bathi: Kuvunyelwe yini ukusilisa ngeSabatha? ukuze bammangalele.

¹¹ Wathi kibo: Nguwuphi umuntu wakini elemvu eyodwa, uba iwele emgodini ngeSabatha ongayikuyibamba ayikhuphe na?

¹² Phoke, umuntu udlula imvu kangakanani! Ngakhoke kuvunyelwe ukwenza okulungileyo ngeSabatha.

¹³ Wasesithi kulowomuntu: Yelula isandla sakho. Waselula, sasiliswa, saba njengesinye.

¹⁴ Basebephuma abaFarisi becebisana ngaye ukuba bangambulala kanjani.

Inceku ekhethiweyo

¹⁵ Kodwa uJesu esekwazi lokho wasuka lapho. Abantu abanengi bamlandela, wabasilisa bonke.

¹⁶ Wabalayisisa ukuba bangamvezi,

¹⁷ ukuze kugcwaliseke okwakhulunywa ngumprofethi uIsaya ukuthi:

¹⁸ Khangela, inceku yami engiyikhethileyo, othandekayo wami, othokoza ngaye umphefumulo wami. Ngizakubeka uMoya wami phezu kwakhe, uzakutshumayela ukulunga kubo abezizwe.

¹⁹ Kayikubangisa, kayikumemeza, kakho ozakulizwa ilizwi lakhe ezindleleni.

²⁰ Umhlanga ofecekileyo kayikuwaphula, lentambo yesibane ethunqayo kayikuyicitsha aze aphumelelise ukulunga, kunqobe.

²¹ Lezizwe zizakuthemba ebizweni lakhe.

Isono sokuhlambaza

²² Kwasekulethwa kuye umuntu olomoya omubi eyisiphofu lesimungulu. Wamsilisa, kwaze kwathi oyisimungulu wakhuluma, wabona.

²³ Amaxuku wonke amangala, athi: Lo angaba yiyo iNdodana kaDavida na?

²⁴ Kodwa abaFarisi sebezwile bathi: Lumuntu uyabakhupha omoya ababi ngoBelezebule, inkosi yomoya ababi, kuphela.

²⁵ Kodwa eseyazi imicabango yabo uJesu wathi kubo: Ilowo lalowo umbuso owahlukene phakathi, uyachitheka, lalowomuzi ingabe indlu eyahlukene phakathi, ingeme.

²⁶ Uba uSathane ekhupha uSathane, wahlukene phakathi kwakhe. Pho, umbuso wakhe uzakuma kanjani na?

²⁷ Uba mina ngikhupha omoya ababi ngoBelezebule, amadodana enu abakhupha ngobani na? Ngakhoke wona azakuba ngabathonisisi benu.

²⁸ Kodwa uba mina ngikhupha omoya ababi ngoMoya kaNkulunkulu, lembala umbuso kaNkulunkulu usufikile kini.

²⁹ Umuntu angangena kanjani endlini yesiqhwaga, aphange impahla yaso, uba engasibophi kuqala isiqhwaga na? Kung’khona ezakuphanga indlu yaso.

³⁰ Ongelami umelene lami; ongabuthi lami uyachitha.

³¹ Ngakho ngithi kini: Abantu bazakuthethelelwa izono zonke lokuhlambaza, kodwa ukuhlambaza uMoya kakuyikuthethelelwa.

³² Lowo okhuluma ilizwi elibi ngeNdodana yomuntu uzakuthethelelwa, kodwa lowo okhuluma ilizwi elibi ngoMoya oNgcwele kayikuthethelelwa kulesisikhathi lasesikhathini esizayo.

³³ Yenzani isihlahla sibe ngesilungileyo lezithelo zaso zibe ngezilungileyo; ingabe yenzani isihlahla sibe sibi lezithelo zaso zibe zimbi. Ngoba isihlahla saziwa ngezithelo zaso.

³⁴ Nzalo yezinyoka, lingakhuluma kanjani okuhle libabi na? Ngoba umlomo ukhuluma ngokugcwala kwenhliziyo.

³⁵ Umuntu olungileyo ukhupha izinto ezilungileyo enhliziyweni yakhe elungileyo; lomuntu omubi ukhupha izinto ezimbi enhliziyweni yakhe embi.

³⁶ Ngithi kini: Amazwi wonke ayize abawakhulumayo abantu, bazakuziphendulela ngawo ngosuku lokuthonisiswa.

³⁷ Ngoba ngamazwi akho uzakukhululwa, langamazwi akho uzakulahlwa.

Abafuna izibonakaliso

³⁸ Abanye bababhali labaFarisi basebesithi kuye: Mfundisi, sifuna ukubona isibonakaliso esenziwa nguwe.

³⁹ Wabaphendula wathi: Isizukulwana esibi lesifebayo sifuna isibonakaliso; kodwa kasiyikunikwa sibonakaliso, kuphela isibonakaliso sikaJona umprofethi.

⁴⁰ Ngoba njengalokhu uJona waba sesiswini sensikabayitshiye insuku ezintathu lobusuku obuthathu, ngokunjaloke iNdodana yomuntu izakuba semathunjini omhlaba insuku ezintathu lobusuku obuthathu.

⁴¹ Amadoda aseNinive azakuma ekuthonisisweni kanye lalesisizukulwana, asilahle; ngoba wona aphenduka ngokutshumayela kukaJona; khangelani, kukhona lapha okukhulu kuloJona.

⁴² Inkosikazi yaseningizimu izakuma ekuthonisisweni kanye lalesisizukulwana, isilahle; ngoba yona yavela emikhawulweni yomhlaba ukuba izekuzwa ukuhlakanipha kukaSolomoni; khangelani, kukhona lapha okukhulu kuloSolomoni.

Ukuphenduka okungaphelelanga

⁴³ Nxa umoya omubi esephumile emuntwini, uyadabula indawo ezomileyo efuna ukuphumula kodwa engakufumani.

⁴⁴ Ngakho uthi: Ngizakubuyela endlini yami engaphuma kuyo; afikeke ayifumane ize, ithanyelwe ilungisiwe.

⁴⁵ Abesehamba, abuye labanye omoya abayisikhombisa ababi kulaye, bangene bahlale khona; kuthi ukucina kwalowomuntu kube kubi kulokokuqala. Kuzakuba njalo kulesisizukulwana esibi.

Izihlobo zikaJesu eziyizo

⁴⁶ Kwathi esakhuluma emaxukwini, unina labafowabo bema ngaphandle befuna ukukhuluma laye.

⁴⁷ Omunye wathi kuye: Khangela, unyoko labafowenu bemi ngaphandle, bafuna ukukhuluma lawe.

⁴⁸ Kodwa waphendula wathi kuye omtshelileyo: Ngubani umama na? Labafowethu ngobani na?

⁴⁹ Waseselulela isandla sakhe ngakubafundi bakhe, wathi: Khangelani, nangu umama labafowethu.

⁵⁰ Ngoba ilowo lalowo owenza intando kaBaba osezulwini nguye ongumfowethu lodadewethu lomama.