UMatewu 11 - iBhayibhili Elingcwele 1978

¹ Wathi uJesu eseqedile ukulaya abafundi bakhe abalitshumi lambili, wasuka lapho ukuyafundisa lokutshumayela emizini yabo.

Ukufakaza kukaJesu kubafundi bakaJohane lakubantu

² Kwathi uJohane esentolongweni, esezwile ngemisebenzi kaKristu, wathumela ilizwi ngabafundi bakhe,

³ wathi kuye: Wena unguye ozayo, ingabe silindele omunye na?

⁴ UJesu wabaphendula wathi kibo: Hambani limtshele uJohane lokho elikuzwileyo lelikubonileyo ukuthi

⁵ iziphofu ziyabona, leziqhuli ziyahamba, labalobulephero bayahlanjululwa, labangezwayo bayezwa, labafileyo bayavuswa, labayanga bayatshunyayezwa ivangeli.

⁶ Ubusisiwe ongakhubekiyo ngami.

⁷ Kwathi labobantu sebehamba, uJesu waqala ukukhuluma emaxukwini ngoJohane, wathi: Laphuma laya enkangala ukuyabonani na? Umhlanga onyikinywa ngumoya na?

⁸ Kanti laphumela ukuyabonani na? Umuntu owambethe ingubo ezibuthakathaka na? Khangelani, abambethe ingubo ezibuthakathaka basezindlini zamakhosi.

⁹ Pho, laphumelani na? Ukubona umprofethi na? Yebo, ngithi kini: Odlula umprofethi.

¹⁰ Ngoba nguJohane okulotshwe ngaye ukuthi: Khangela, ngiyathuma isithunywa sami phambi kobuso bakho esizakulungisa indlela yakho phambi kwakho.

¹¹ Ngiqinisile ngithi kini: Kakuvelanga phakathi kwabazelwe ngabesifazana omkhulu kuloJohane uMbhaphathizi; kodwa omncinyane embusweni wezulu mkhulu kulaye.

¹² Kusukela ensukwini zikaJohane uMbhaphathizi kuze kube khathesi umbuso wezulu uyafohlelwa, labawufohlelayo bayawuphanga.

¹³ Ngoba abaprofethi bonke lomlayo bazisa kwaze kwafika uJohane.

¹⁴ Uba livuma ukukwamukela, lo unguElija obezakuza.

¹⁵ Olendlebe zokuzwa akezwe.

¹⁶ Kodwa ngizakusifanisa lani lesisizukulwana na? Sifana labantwana abahlezi emidangeni bememeza abanye besithi:

¹⁷ Salitshayela umhubhe, kalisinanga; salililela, kalikhalanga.

¹⁸ Ngoba uJohane wafika engadli, enganathi; bathi: Ulomoya omubi.

¹⁹ Kodwa iNdodana yomuntu yafika isidla, inatha; bathi: Khangelani umuntu oyisidli lesinathi, umngane wabathelisi lezoni. Kodwa ukuhlakanipha kubonakaliswa ukuthi kulungile ngabantwana bakho.

Ukusolwa kwemizi engaphendukanga

²⁰ Waseqala ukusola imizi okwakwenziwe phakathi kwayo ubunengi bemisebenzi yakhe yamandla, ngoba ingaphendukanga.

²¹ Wathi: Maye kuwe Korazini! Maye kuwe Betsayida! Ngoba uba kwakwenziwe eTire leSidoni imisebenzi yamandla eyenziwe kini, ngabe kade baphenduka bembatha amasaka bazithela ngomlotha.

²² Kodwa ngithi kini: Kuzakuba ngcono kulo iTire leSidoni ngosuku lokulahlwa kulakini.

²³ Wenake, Kapenawume, uzakuphakanyiselwa ezulwini na? Atshi! Uzakwehliselwa endaweni yabafileyo; ngoba uba yayenziwe eSodoma imisebenzi yamandla eyenziwe kuwe, ngabe lisekhona iSodoma kuze kube lamuhla.

²⁴ Kodwa ngithi kini: Kuzakuba ngcono kulo ilizwe laseSodoma ngosuku lokulahlwa kulakuwe.

UJesu udumisa uYise; umema abahluphekileyo beze kuye

²⁵ Ngalesosikhathi uJesu wakhuluma wathi: Ngiyakubonga, Baba, Nkosi yezulu lomhlaba, ngoba ukufihlile lokhu kwabahlakaniphileyo labaqedisisayo, wakwambulela izingane.

²⁶ Yebo, Baba, ngoba kwaba kuhle kuwe ukuba kube njalo.

²⁷ Konke ngikunikelwe nguBaba; kakho oyaziyo iNdodana, kuphela uYise; kakho futhi omaziyo uYise, kuphela iNdodana lalowo iNdodana ethanda ukumambulela yena.

²⁸ Wozani kimi lonke elikhatheleyo lelisindiweyo, mina ngizakuliphumuza.

²⁹ Thwalani ijokwe lami phezu kwenu, lifunde kimi, ngoba ngimnene ngithobekile; kung’khona imiphefumulo yenu izakufumana ukuphumula.

³⁰ Ngoba ijokwe lami lilula, lomthwalo wami ulula.