UMatewu 10 - iBhayibhili Elingcwele 1978

UJesu ubiza abaphostoli bakhe abalitshumi lambili

¹ Wasebiza abafundi bakhe abalitshumi lambili, wabanika amandla phezu komoya ababi ukuba babakhuphe, lamandla okusilisa izifo zonke lemikhuhlane yonke.

² Amabizo abaphostoli abalitshumi lambili yiwo la; owokuqala nguSimoni othiwa uPetro, loAndreya umfowabo, loJakobe kaZebediya, loJohane umfowabo,

³ loFiliphu, loBartolomewu, loTomasi, loMathewu umthelisi, loJakobe kaAlfewu, loTadewu,

⁴ loSimoni umKanani, loJudasi Iskariyothi owamnikelayo.

Ukuthunywa kwabaphostoli

⁵ Laba abalitshumi lambili uJesu wabathuma, wabalaya esithi: Lingahambi ngendlela yabezizwe, lingangeni emzini wamaSamariya,

⁶ kodwa yanini kakhulu kuzo izimvu ezilahlekileyo zendlu kaIsrayeli.

⁷ Ekuhambeni kwenu tshumayelani lithi: Umbuso wezulu ususondele.

⁸ Silisani abagulayo, livuse abafileyo, lihlambulule abalobulephero, likhuphe omoya ababi. Lamukelisiwe ngesihle, phanini ngesihle.

⁹ Lingaphathi igolide lesiliva, lethusi emixhakeni yenu,

¹⁰ lesikhwama sendlela, lengubo ezimbili, lamanyathelo, lodondolo; ngoba isisebenzi sifanele ukudla kwaso.

¹¹ Lakuwuphi umuzi ingabe umuzana elingena kuwo, buzani ukuba ngubani ofaneleyo kuwo, lihlale laye, lize lisuke.

¹² Ekungeneni kwenu endlini, liyibingelele.

¹³ Aluba indlu ifanele, ukuthula kwenu kakube phezu kwayo; kodwa uba ingafanele, ukuthula kwenu kakubuyele kini.

¹⁴ Lowo ongalamukeliyo, ongalaleli amazwi enu, kalibokuthi nxa liphuma kuleyondlu ingabe kulowomuzi, lithintithe uthuli enyaweni zenu.

¹⁵ Ngiqinisile ngithi kini: Kuzakuba ngcono elizweni laseSodoma lelaseGomora ngosuku lokulahlwa kulakulowomuzi.

Abaphostoli bazakuhlutshwa

¹⁶ Khangelani, ngiyalithuma linjengezimvu phakathi kwempisi; ngakho hlakaniphani njengezinyoka, libe ngabangoni lutho njengamajuba.

¹⁷ Limukani abantu, ngoba bazakulinikela emiphakathini, balitshaye emasinagogeni abo.

¹⁸ Lizakuholelwa phambi kwababusi lamakhosi ngenxa yami, kube yibufakazi kibo lakwabezizwe.

¹⁹ Nxa belinikela, lingakhathaleli ukuthi lizakukhuluma kanjani lokuthi lizakuthini, ngoba lizakunikwa ngalesosikhathi lokho elizakukukhuluma.

²⁰ Ngoba kakusini elikhulumayo, kodwa kunguMoya kaYihlo okhuluma kini.

²¹ Umuntu uzakunikela umfowabo ekufeni, loyise umntanakhe; abantwana bazakuvukela abazali bababulale.

²² Lizakuzondwa yibo bonke ngenxa yebizo lami; kodwa ophikelelayo kuze kube sekupheleni nguye ozakusiliswa.

²³ Nxa belizingela komunye umuzi, balekelani komunye; ngoba ngiqinisile ngithi kini: Kaliyikuqeda imizi yonke yakoIsrayeli ingakafiki iNdodana yomuntu.

²⁴ Umfundi kamkhulu kulomfundisi, lenceku kayinkulu kulenkosi yayo.

²⁵ Kwanele ukuba umfundi abe njengomfundisi wakhe, lenceku ibe njengenkosi yayo. Aluba bebizile umninindlu ngokuthi nguBelezebule, kakhulu labendlu yakhe njalo.

UJesu uxwayisa abafundi bakhe

²⁶ Ngakhoke lingabesabi; ngoba kakukho okufihliweyo okungayikubonakaliswa, lokuthukuziweyo okungayikwaziwa.

²⁷ Lokho engikutsho kini emnyameni, kukhulumeni ekukhanyeni; lalokho elikuzwa kunyenyezwa, kutshumayeleni phezu kwezindlu.

²⁸ Lingabesabi ababulala umzimba bengelamandla okubulala umphefumulo, kodwa mesabeni kakhulu olamandla okubhubhisa umphefumulo lomzimba esihogweni.

²⁹ Kazithengiswa yini intaka ezimbili ngendibilitshi na? Kodwa kakuyikuwa phansi lanye yazo ngaphandle kukaYihlo.

³⁰ Linake, lenwele zekhanda lenu zibaliwe zonke.

³¹ Ngakho lingesabi, ngoba liyazidlula intaka ezinengi.

³² Ilowo lalowo ongivuma phambi kwabantu, lami ngizakumvuma phambi kukaBaba osezulwini.

³³ Kodwa lowo ongiphika phambi kwabantu, lami ngizakumphika phambi kukaBaba osezulwini.

Izibonakaliso zezikhathi

³⁴ Lingathi ngize ukuletha ukuthula emhlabeni; angizanga ukuletha ukuthula kodwa umkhonto.

³⁵ Ngoba ngize ukuxabanisa umuntu loyise, lendodakazi lonina, lomalokazana loninazala.

³⁶ Lezitha zomuntu kuzakuba ngabendlu yakhe.

³⁷ Othanda uyise ingabe unina kulami kafanele mina; lothanda indodana ingabe indodakazi kulami kafanele mina:

³⁸ longathathi isiphambano sakhe, angilandele, kafanele mina.

³⁹ Ofumana ukusila kwakhe uzakulahlekelwa yikho: olahlekelwa yikusila kwakhe ngenxa yami uzakukufumana.

⁴⁰ Owamukela lina uyamukela mina; owamukela mina uyamukela ongithumileyo.

⁴¹ Owamukela umprofethi ngoba engumprofethi, uzakuzuza umvuzo womprofethi; lowamukela olungileyo ngoba engolungileyo, uzakuzuza umvuzo wolungileyo.

⁴² Ilowo lalowo ozakumnathisa omunye walababancinyane inkezo eyodwa nje yamanzi aqandayo, ngoba engumfundi, ngiqinisile ngithi kini: Kasoze alahlekelwa ngumvuzo wakhe.