ULevi 5 - iBhayibhili Elingcwele 1978

¹ Umuntu nxa ebizwa ukufakaza ngendaba ethile, ngoba eyibonile loba eyazi, kodwa angakhulumi, uyona, futhi uzakuthwala ububi bakhe.

² Uba umuntu ethinta into engcolileyo, engakwazi, loba iyisidumbu senyamazana engcolileyo, loba isidumbu senkomo engcolileyo, ingabe isidumbu salokho okuhuquzelayo okungcolileyo, ungcolile, ngakho ulecala.

³ Uba ethinta okungcolileyo komuntu, loba kuyini okungcolisayo umuntu, engazi akwenzileyo, lapho esekwazi uzakuba lecala.

⁴ Uba umuntu efunga ngamawala ukwenza okubi loba okuhle, loba kuyini umuntu angafunga ngakho ngamawala, engakwazi, lapho esekwazi uzakuba lecala kulokho.

⁵ Kuzakuthi nxa umuntu elecala kwenye yalezizinto, avume isono sakhe,

⁶ alethe umnikelo wecala lakhe eNkosini ngesono asenzileyo, athathe ensikazi emhlambini, imvu loba imbuzi, ibe ngumnikelo wesono, umpristi amenzele indlela yokubuyisana ngesono sakhe.

⁷ Kodwa uba esehluleka ukuletha imvu, angaletha eNkosini ngesono asenzileyo amajuba amabili loba inkwilimba ezimbili, enye ibe ngumnikelo wesono lenye ibe ngumnikelo wokutshiswa;

⁸ azilethe kumpristi ozakunikela ngeyomnikelo wesono kuqala, ayitshile intamo, kodwa angahlukanisi ikhanda lentamo,

⁹ afafaze uhlangothi lwealtare ngegazi lomnikelo wesono, legazi eliseleyo lithululelwe phansi kwealtare; lokhu kungumnikelo wesono.

¹⁰ Eyesibili uzakuyilungisa ibe ngumnikelo wokutshiswa njengokwesimiso, umpristi amenzele indlela yokubuyisana ngesono sakhe, athethelelwe.

¹¹ Kodwa uba esehluleka ukuletha amajuba amabili loba inkwilimba ezimbili, angaletha ngesono asenzileyo ingxenye yehefa yempuphu ecolekileyo ibe ngumnikelo wesono; angatheli mafutha kuyo, angabeki nhlaka phezu kwayo, ngoba ingumnikelo wesono.

¹² Kayilethe kumpristi, umpristi acuphe kuyo kube yisikhumbuzo, akutshise ealtareni, phezu kweminikelo eyenzelwe iNkosi ngomlilo; lokhu kungumnikelo wesono.

¹³ Ngalokho umpristi uzamenzela indlela yokubuyisana ngesono asenzileyo lakuyiphi yalezizinto, athethelelwe. Okuseleyo kuzakuba ngokompristi, njengomnikelo wempuphu.

Iminikelo yecala

¹⁴ INkosi yathi kuMose:

¹⁵ Uba umuntu esenza isiphambeko mayelana lezinto ezingcwele afanele ukuba azinikele eNkosini, kodwa angoni ngabomu, kalethe umnikelo wakhe wecala, athathe emhlambini inqama engelasici, elentengo yamashekeli esiliva ngokweshekeli lendlu engcwele, ibe ngumnikelo wecala.

¹⁶ Futhi ahlawule ngesiphambeko sakhe esimayelana lezinto ezingcwele afanele ukuba azinikele, engezelele kukho okwesihlanu, akunike umpristi, umpristi amenzele indlela yokubuyisana ngenqama yomnikelo wecala, athethelelwe.

¹⁷ Uba umuntu esona, esenza lokho iNkosi elaye ngakho ukuthi umuntu angakwenzi lanxa engakwazi, ulecala, njalo uzathwala ububi bakhe.

¹⁸ Kalethe kumpristi inqama engelasici evela emhlambini, elentengo elingana lentengo yomnikelo wecala, umpristi amenzele indlela yokubuyisana ngesiphambeko sakhe asenzileyo angasenzanga ngabomu, athethelelwe.

¹⁹ Lokho kungumnikelo wecala; ulecala phambi kweNkosi.