ULevi 4 - iBhayibhili Elingcwele 1978

Iminikelo yesono

¹ INkosi yathi kuMose:

² Tshono ebantwini bakoIsrayeli uthi: Uba umuntu esona, engoni ngabomu, esenza lokho iNkosi elaye ngakho ukuthi umuntu angakwenzi,

³ uba kungumpristi ogcotshiweyo owona kanjalo, kuze kwehlele icala phezu kwabantu, kanikele eNkosini ngesono sakhe inkunzi engelasici ibe ngumnikelo wesono.

⁴ Kayise inkunzi eNkosini ngasemnyango wethente lokuhlangana, abeke isandla sakhe enhlokweni yenkunzi, ayihlabe phambi kweNkosi.

⁵ Umpristi ogcotshiweyo athathe igazi lenkunzi, alilethe ethenteni lokuhlangana,

⁶ acwilise umunwe wakhe egazini, afafaze ngalo kasikhombisa phambi kweNkosi, ngaphambi kweveli lendlu engcwele.

⁷ Umpristi aninde igazi empondweni zealtare lempepha elephunga elimnandi phambi kweNkosi, elisethenteni lokuhlangana, athululele lonke igazi eliseleyo phansi ngasealtareni lomnikelo wokutshiswa, elingasemnyango wethente lokuhlangana.

⁸ Uzakuthatha wonke amahwahwa enkunzi yomnikelo wesono, idanga lemibilini, lawo wonke amahwahwa asemibilinini,

⁹ lezinso zombili lamahwahwa azo angasezinkalweni, lamahwahwa angaphezu kwesibindi azakuwasusa lezinso —

¹⁰ njengalokhu kususwa kiyo inkabi yomhlatshelo womnikelo wokuthula — umpristi akutshise ealtareni lomnikelo wokutshiswa.

¹¹ Kodwa isikhumba senkunzi, lenyama yayo yonke, kanye lenhloko yayo, lemilenze yayo, lemibilini yayo, lomswane wayo,

¹² yonke inkunzi uzakuyikhuphela ngaphandle kwezihonqo, endaweni ehlambulukileyo, lapho kulahlwa khona umlotha, ayitshise ngezinkuni.

¹³ Uba lonke ibandla lakoIsrayeli lisona, lingoni ngabomu, lesono sifihlelwe abantu, benze lokho iNkosi elaye ngakho ukuthi bangakwenzi, babe lecala,

¹⁴ lapho isono abasenzileyo sesisaziwa, ibandla lizanikela ngenkunzi ibe ngumnikelo wesono, liyilethe phambi kwethente lokuhlangana.

¹⁵ Abalisa bebandla bazabeka izandla zabo enhlokweni yenkunzi phambi kweNkosi, inkunzi ihlatshwe phambi kwayo.

¹⁶ Umpristi ogcotshiweyo alethe igazi lenkunzi ethenteni lokuhlangana,

¹⁷ acwilise umunwe wakhe egazini, afafaze ngalo kasikhombisa phambi kweNkosi, ngaphambi kweveli,

¹⁸ aninde igazi empondweni zealtare elisethenteni lokuhlangana, phambi kweNkosi, athululele lonke igazi eliseleyo phansi kwealtare lomnikelo wokutshiswa, elingasemnyango wethente lokuhlangana.

¹⁹ Uzakuthatha kiyo wonke amahwahwa, awatshise ealtareni.

²⁰ Kenze njalo ngenkunzi le, njengalokhu enza ngenkunzi yomnikelo wesono. Umpristi abenzele indlela yokubuyisana ukuba bathethelelwe.

²¹ Uzakuyikhuphela inkunzi ngaphandle kwezihonqo, ayitshise njengalokho wayitshisa inkunzi yokuqala; lokhu kungumnikelo wesono webandla.

²² Nxa induna isona, ingoni ngabomu, isenza lokho iNkosi elaye ngakho ukuthi umuntu angakwenzi, loba kuyini, ibe lecala,

²³ uba yaziswa isono sayo esenzileyo, izakuletha imbuzi, impongo engelasici, ibe ngumnikelo wayo,

²⁴ ibeke isandla sayo enhlokweni yembuzi, iyihlabe endaweni lapho kuhlatshelwa khona umnikelo wokutshiswa phambi kweNkosi; kungumnikelo wesono.

²⁵ Umpristi athathe igazi lomnikelo wesono ngomunwe wakhe, alininde empondweni zealtare lomnikelo wokutshiswa, athululele lonke igazi lawo eliseleyo phansi kwealtare lomnikelo wokutshiswa.

²⁶ Wonke amahwahwa awo uzakuwatshisa ealtareni njengamahwahwa omhlatshelo weminikelo yokuthula. Ngalokho umpristi uzayenzela indlela yokubuyisana ngesono sayo, ithethelelwe.

²⁷ Uba umuntukazana esona, engoni ngabomu, esenza lokho iNkosi elaye ngakho ukuthi umuntu angakwenzi, abe lecala,

²⁸ nxa esaziswa isono sakhe asenzileyo, uzaletha imbuzi, isibhuzikazi esingelasici, sibe ngumnikelo wakhe ngesono sakhe asenzileyo.

²⁹ Uzabeka isandla sakhe enhlokweni yomnikelo wesono, awuhlabe endaweni yomnikelo wokutshiswa.

³⁰ Umpristi athathe igazi lawo ngomunwe wakhe, alininde empondweni zealtare lomnikelo wokutshiswa, athululele lonke igazi lawo eliseleyo phansi kwealtare.

³¹ Wonke amahwahwa awo uzakuwasusa, njengalokhu amahwahwa esuswa kuwo umhlatshelo weminikelo yokuthula, umpristi awatshise ealtareni abe liphunga elimnandi eNkosini. Ngalokho umpristi uzamenzela indlela yokubuyisana, athethelelwe.

³² Uba eletha iwundlu libe ngumnikelo wakhe wesono, kalethe elisikazi elingelasici,

³³ abeke isandla sakhe enhlokweni yomnikelo wesono, awuhlabe ube ngumnikelo wesono endaweni lapho kuhlatshelwa khona umnikelo wokutshiswa.

³⁴ Umpristi kathathe igazi lomnikelo wesono ngomunwe wakhe, alininde empondweni zealtare lomnikelo wokutshiswa, athululele lonke igazi lawo eliseleyo phansi ngasealtareni.

³⁵ Wonke amahwahwa awo uzakuwasusa njengalokhu amahwahwa emvu esuswa kuwo umhlatshelo weminikelo yokuthula, umpristi awatshise ealtareni phezu kweminikelo eyenzelwe iNkosi ngomlilo. Ngalokho umpristi uzamenzela indlela yokubuyisana ngesono asenzileyo, athethelelwe.