ULevi 3 - iBhayibhili Elingcwele 1978

Iminikelo yokuthula

¹ Uba umnikelo womuntu ungumhlatshelo womnikelo wokuthula, nxa enikela ngenkomo, enduna ingabe ensikazi, kawunikele phambi kweNkosi ungelasici.

² Uzakubeka isandla sakhe ekhanda lomnikelo wakhe, awuhlabe ngasemnyango wethente lokuhlangana; amadodana kaAroni angabapristi akhaphazele igazi ealtareni inxa zonke.

³ Uzakuthatha kuwo umhlatshelo womnikelo wokuthula, umnikelo owenzelwe iNkosi ngomlilo, idanga lemibilini, lamahwahwa wonke asemibilinini,

⁴ lezinso zombili lamahwahwa azo angasezinkalweni, lamahwahwa angaphezu kwesibindi ozakuwasusa lezinso.

⁵ Amadodana kaAroni azakukutshisa ealtareni kanye lomnikelo wokutshiswa phezu kwenkuni ezisemlilweni; kungumnikelo owenziwe ngomlilo olephunga elimnandi eNkosini.

⁶ Uba umnikelo wakhe ongumhlatshelo womnikelo wokuthula eNkosini ungowemihlambi, enduna ingabe ensikazi, kanikele ngawo ungelasici.

⁷ Uba enikela ngemvu, ibe ngumnikelo wakhe, kayinikele phambi kweNkosi,

⁸ abeke isandla sakhe enhlokweni yomnikelo wakhe, awuhlabe ngaphambi kwethente lokuhlangana; amadodana kaAroni akhaphazele igazi lawo ealtareni inxa zonke.

⁹ Uzakuthatha kuwo umhlatshelo womnikelo wokuthula, umnikelo owenzelwe iNkosi ngomlilo, amahwahwa awo, lomsila wonke ononileyo ewuquma eduze lomgogodla, ledanga lemibilini, lamahwahwa wonke asemibilinini,

¹⁰ lezinso zombili lamahwahwa azo angasezinkalweni, lamahwahwa angaphezu kwesibindi ozakuwasusa lezinso.

¹¹ Umpristi uzakukutshisa ealtareni kube yikudla, kube ngumnikelo owenzelwe iNkosi ngomlilo.

¹² Uba umnikelo wakhe uyimbuzi, kayinikele phambi kweNkosi,

¹³ abeke isandla sakhe enhlokweni yayo, ayihlabe ngaphambi kwethente lokuhlangana; amadodana kaAroni akhaphazele igazi layo ealtareni inxa zonke.

¹⁴ Uzakuthatha kiyo, anikele umnikelo owenzelwe iNkosi ngomlilo, idanga lemibilini, lamahwahwa wonke asemibilinini,

¹⁵ lezinso zombili lamahwahwa azo angasezinkalweni, lamahwahwa angaphezu kwesibindi azakuwasusa lezinso.

¹⁶ Umpristi uzakukutshisa ealtareni kube yikudla, kube ngumnikelo owenziwe ngomlilo olephunga elimnandi. Wonke amahwahwa ngaweNkosi.

¹⁷ Lokhu kuzakuba yisimiso esingelakuphela ezizukulwaneni zenu zonke, emizini yenu yonke, sokuthi lingadli amahwahwa legazi.