ULevi 22 - iBhayibhili Elingcwele 1978

Ubungcwele beminikelo

¹ INkosi yathi kuMose:

² Mtshele uAroni lamadodana akhe ukuba bananzelele ngezinto ezingcwele zabakoIsrayeli abazinikela kimi, ukuze bangahlambazi ibizo lami elingcwele; ngiyiNkosi.

³ Tshono kibo uthi: Uba umuntu owenzalo yenu ezizukulwaneni zenu esondela esengcolile ezintweni ezingcwele, abantu bakoIsrayeli abazinikela eNkosini, lowo uzakukhutshwa phambi kwami. NgiyiNkosi.

⁴ Umuntu owenzalo kaAroni olobulephero, loba okuphuma kuye okungcolileyo, kayikudla izinto ezingcwele aze ahlambuluke. Othinta ulutho olungcoliswe yisidumbu, lalowo okuphuma kuye ubudoda,

⁵ lalowo othinta into ehuquzelayo engamngcolisa, loba othinta omunye umuntu ongamngcolisa ngoba elokungcola,

⁶ yebo, wonke umuntu othinta okunjalo uzakuba ngongcolileyo kuze kuhlwe, angadli izinto ezingcwele uba engagezi umzimba wakhe ngamanzi.

⁷ Nxa selitshonile ilanga uzakuhlambuluka; emva kwalokho angadla izinto ezingcwele, ngoba lezi ziyikudla kwakhe.

⁸ Lokho okuzifeleyo lalokho okubanjwe yizilo kangakudli ukuba angazingcolisi ngakho. NgiyiNkosi.

⁹ Ngakhoke kabagcine imilayezelo yami, bangabi lasono ngayo; uba beyihlambaza, bazakufa. NgiyiNkosi ebenzayo ukuba babe ngcwele.

¹⁰ Umuntu ongesumpristi kayikudla into engcwele. Umuntu ohlala lompristi loyisisebenzi esiqatshiweyo bangadli into engcwele.

¹¹ Kodwa uba umpristi ethenga isigqili ngemali, sona singayidla, labazelwe emzini wakhe bangadla ukudla kwakhe.

¹² Uba indodakazi yompristi ethethwe ngongesumpristi, kayingadli izinto ezingcwele ezinikelweyo.

¹³ Kodwa uba indodakazi yompristi ingumfelwakazi loba ingolahliweyo ingelabantwana, ibisibuyela emzini kayise njengasebutsheni bayo, ingadla ukudla kukayise; kanti ongesumpristi angakudli.

¹⁴ Uba umuntu esidla into engcwele engazi, uzakwengezelela kuyo okwesihlanu kwayo, amnike umpristi into engcwele.

¹⁵ Abapristi kabayikungcolisa izinto ezingcwele zabantu bakoIsrayeli abazinikela eNkosini,

¹⁶ bangabethwesi ububi lecala, lapho besidla izinto zabo ezingcwele; ngoba ngiyiNkosi ebenzayo babe ngcwele.

¹⁷ INkosi yathi kuMose:

¹⁸ Tshono kuAroni, lamadodana akhe, labantu bonke bakoIsrayeli, uthi: Lapho umuntu owendlu kaIsrayeli, loba owabezizweni abakoIsrayeli, enikela umnikelo wakhe owokugcwalisa isithembiso, loba owesihle, onikelwa eNkosini ube ngumnikelo wokutshiswa,

¹⁹ ukuze lamukeleke lina nikelani ngenduna engelasici, inkunzi loba imvu loba imbuzi.

²⁰ Linganikeli ngolutho olulesici, ngoba kaliyikwamukeleka ngalo.

²¹ Nxa umuntu enikela eNkosini umhlatshelo weminikelo yokuthula owokugcwalisa isithembiso loba owesihle, inkomo loba imvu enikelwayo ifanele ibe ngelungileyo ukuze yamukeleke, ingabi lasici.

²² Izifuyo eziyiziphofu, lezilimeleyo, leziyizilima, lezilamanxeba, lezilamathumba, leziloqweqwe, linganikeli ngazo eNkosini, futhi linganikeli ngazo zibe ngumnikelo owenzelwe iNkosi ngomlilo ealtareni.

²³ Inkunzi loba imvu elezitho ezingalinganiyo linganikela ngayo ibe ngumnikelo wesihle; kodwa kayiyikwamukeleka uba ingumnikelo wokugcwalisa isithembiso.

²⁴ Linganikeli eNkosini ngezifuyo ezitheniweyo ngokugxotshwa loba ngokuxholoswa loba ngokuqunywa; futhi lingazihlabi elizweni lakini.

²⁵ Linganikeli ngezifuyo ezinjalo ezivela kowezizweni zibe yikudla kukaNkulunkulu wenu. Zilesici, ngakho kaliyikwamukeleka ngazo.

²⁶ INkosi yathi kuMose:

²⁷ Nxa kuzalwa inkunzi loba imvu loba imbuzi, izakuhlala kunina insuku eziyisikhombisa. Kusukela osukwini lwesificaminwembili izakwamukeleka ibe ngumnikelo owenzelwe iNkosi ngomlilo.

²⁸ Kodwa inkomokazi loba imvukazi lingayihlabi kanye lomntwana wayo ngasuku lunye.

²⁹ Nxa lihlabela iNkosi umhlatshelo wokubonga, kwenzeni ukuba lamukeleke.

³⁰ Uzakudliwa ngalolosuku, lingatshiyi lutho kuze kube sekuseni. NgiyiNkosi.

³¹ Ngakhoke gcinani imilayo yami, liyenze. NgiyiNkosi.

³² Lingahlambazi ibizo lami elingcwele, kodwa ngizakuba ngcwele phakathi kwabantu bakoIsrayeli. NgiyiNkosi elenzayo libe ngcwele,

³³ eyalikhupha elizweni laseGibithe ukuba ngibe nguNkulunkulu wenu. NgiyiNkosi.