UJohane 1 - iBhayibhili Elingcwele 1978

UbuNkulunkulu lobuntu lomsebenzi kaJesu Kristu

¹ Ekuqaleni wayekhona uLizwi, uLizwi wayekuNkulunkulu, uLizwi wayenguNkulunkulu.

² Yena wayekuNkulunkulu ekuqaleni.

³ Zonke izinto zenziwa ngaye; langaphandle kwakhe kakwenziwanga lutho kukho konke okwenziweyo.

⁴ Ukuphila kwakukuye, ukuphila kwakuyikukhanya kwabantu.

⁵ Ukukhanya kukhanya emnyameni, kodwa umnyama kawukwahlulanga.

⁶ Kwavela umuntu ethunywe nguNkulunkulu, ibizo lakhe linguJohane.

⁷ Yena wezela ubufakazi ukuba afakaze ngokukhanya, ukuze bonke bakholwe ngaye.

⁸ Wayengesikho ukukhanya, kodwa wezela ukuba afakaze ngokukhanya.

⁹ Ukukhanya okuqinisileyo okukhanyisa wonke umuntu, kwasekusiza emhlabeni.

¹⁰ Wayekhona emhlabeni, umhlaba wenziwa ngaye; kodwa umhlaba kawumazanga.

¹¹ Weza kokwakhe, kodwa abakhe kabamamukelanga.

¹² Kodwa bonke abamamukelayo wabapha amandla okuba ngabantwana bakaNkulunkulu, labo abakholwa ebizweni lakhe,

¹³ ababengazalwanga ngegazi lomuntu, langokufisa kwendoda, kodwa bazalwa nguNkulunkulu.

¹⁴ ULizwi waba yinyama, wahlala phakathi kwethu, sabona inkazimulo yakhe injengeyozelwe yedwa kaYise, egcwele umusa leqiniso.

¹⁵ UJohane wafakaza ngaye, wamemeza wathi: Nguye lo ebengisitsho ngaye ukuthi: Lowo ozayo emva kwami uyangandulela ngobukhulu, ngoba wayekhona kuqala kulami.

¹⁶ Ngoba ekugcwaleni kwakhe samukele sonke umusa phezu komusa.

¹⁷ Ngoba umlayo wanikwa ngoMose, umusa leqiniso kweza ngoJesu Kristu.

¹⁸ Kakho owake wabona uNkulunkulu; iNdodana ezelwe yodwa esesifubeni sikaYise yiyo emvezileyo.

Ubufakazi bukaJohane

¹⁹ Lobu yibufakazi bukaJohane mhla abaJuda abavela eJerusalema bathuma abapristi labaLevi ukuba bambuze ukuthi: Wena ungubani na?

²⁰ Wavuma, kalandulanga, kodwa wavuma wathi: Kangisuye uKristu mina.

²¹ Bambuza futhi bathi: Uyini pho? UnguElija? Wathi: Kangisuye. UngumProfethi na? Waphendula wathi: Atshi.

²² Basebesithi kuye: Ungubani na? Kumele usitshele ukuze sibaphendule abasithumileyo; uzitsho ukuthi ungubani na?

²³ Wathi njengokutsho kukaIsaya umprofethi: Ngiyilizwi lomemezayo enkangala, esithi: Lungisani indlela yeNkosi.

²⁴ Labo ababethunyiwe babevela kubaFarisi.

²⁵ Bambuza bathi: Ubhaphathizelani pho, uba ungesuye uKristu, loElija, lomProfethi na?

²⁶ UJohane wabaphendula wathi: Mina ngibhaphathiza ngamanzi; kodwa phakathi kwenu umi elingamaziyo;

²⁷ nguye ozayo emva kwami, engingafanele ukuthukulula umchilo wamanyathelo akhe.

²⁸ Lokhu kwenzeka eBethani ngaphetsheya kweJordani, lapho uJohane wayebhaphathiza khona.

²⁹ Ngakusasa wabona uJesu esiza kuye, wathi: Khangelani, iWundlu likaNkulunkulu elisusayo isono somhlaba.

³⁰ Nguye lo ebengisitsho ngaye ukuthi: Emva kwami kuza umuntu ophambi kwami, ngoba wayekhona kuqala kulami.

³¹ Lami bengingamazi; kodwa ukuze abonakaliswe kuIsrayeli, ngizile ngibhaphathiza ngamanzi.

³² UJohane wafakaza wathi: Ngibonile uMoya esehla ezulwini njengejuba, wahlala phezu kwakhe.

³³ Lami bengingamazi, kodwa owangithumayo ukubhaphathiza ngamanzi wathi kimi: Lowo ozakubona uMoya esehlela phezu kwakhe, ehlala kuye, nguye obhaphathiza ngoMoya oNgcwele.

³⁴ Mina ngibonile, ngafakaza ukuthi: Lo uyiNdodana kaNkulunkulu.

Abafundi bokuqala

³⁵ Ngakusasa futhi uJohane wayemi lababili kubafundi bakhe.

³⁶ Wakhangela uJesu ehamba, wathi: Khangelani, iWundlu likaNkulunkulu.

³⁷ Abafundi ababili bezwa ekhuluma lokhu, bamlandela uJesu.

³⁸ Kwathi uJesu enyemukula, wababona bemlandela, wathi kubo: Lifunani na? Bathi kuye: Rabi, okuyikuthi Mfundisi, uhlalaphi na?

³⁹ Wathi kubo: Wozani libone. Beza babona lapho ayehlala khona; bahlala laye ngalolosuku. Laselithambeme.

⁴⁰ Omunye walaba ababili abamuzwayo uJohane ekhuluma, bamlandela uJesu, kwakunguAndreya umfowabo kaSimoni Petro.

⁴¹ Yena wafumana kuqala umfowabo uSimoni, wathi kuye: Sesimfumene uMesiya, okuyikuthi uKristu.

⁴² Yena wamletha kuJesu; uJesu emkhangela wathi: Wena unguSimoni indodana kaJohane; uzakuthiwa nguKefasi, okuyikuthi uPetro, okutsho idwala.

⁴³ Ngakusasa uJesu wayefuna ukuya eGalili, wafumana uFiliphu; wathi kuye: Ngilandela.

⁴⁴ UFiliphu wayengoweBetsayida, umuzi wakibo kaAndreya loPetro.

⁴⁵ UFiliphu wafumana uNathanyeli, wathi kuye: Simfumene lowo aloba ngaye uMose emlayweni kanye labaprofethi, uJesu waseNazaretha, indodana kaJosefa.

⁴⁶ UNathanyeli wathi kuye: Kambe kungavela okuhle eNazaretha na? UFiliphu wathi kuye: Woza ubone.

⁴⁷ UJesu wabona uNathanyeli esiza kuye, wathi ngaye: Khangelani, umIsrayeli uqobo okungekho inkohliso kuye.

⁴⁸ UNathanyeli wathi kuye: Ungazi njani na? UJesu wamphendula wathi: UFiliphu engakakubizi ungaphansi komkhiwa, bengikubona.

⁴⁹ UNathanyeli waphendula wathi: Mfundisi, uyiNdodana kaNkulunkulu; uyiNkosi kaIsrayeli.

⁵⁰ UJesu waphendula, wathi kuye: Uyakholwa ngoba ngithe kuwe bengikubona ungaphansi komkhiwa na? Uzakubona izinto ezinkulu kulalezi.

⁵¹ Wathi kuye: Ngiqinisile, ngiqinisile ngithi kini: Lizakubona izulu livulekile, lezithunywa zikaNkulunkulu zisenyuka, zisehlela phezu kweNdodana yomuntu.