UHosiya 8 - iBhayibhili Elingcwele 1978

INkosi isola abakoIsrayeli ngezithombe zabo

¹ INkosi ithi: Khalisa uphondo, ngoba ukhozi luzula phezu kwendlu yeNkosi; abantu bami sebephule isivumelwano sami, baphambuka emlayweni wami.

² Bamemeza kimi bathi: Siyakwazi, Nkulunkulu kaIsrayeli.

³ UIsrayeli ulahlile okuhle, isitha sizaxotshana laye.

⁴ Bazibekela amakhosi ngaphandle kwemvumo yami. Bamisa ababusi ngingazi mina. Ngesiliva sabo langegolide labo bazenzela izithombe ezabalethela ukuchitheka.

⁵ Ngaleyisa ithole eladunyiswa nguwe, wena Samariya. Ukuthukuthela kwami kuyabavuthela. Koze kube nini uIsrayeli engahlanjululwanga na?

⁶ Umbazi walenza, kalisuye Nkulunkulu. Ithole laseSamariya lizaphahlazwa libe yizihlephu.

⁷ Ngoba behlanyela umoya, bazavuna isivunguzane. Amabele abo kawayikukhahlela, kawayikuba lanhlamvu; uba engaba lazo, zizadliwa ngabezizwe.

⁸ UIsrayeli useginyiwe, wanyamalala phakathi kwezizwe usenjengesitsha esingelamsebenzi.

⁹ Ngoba njengobabhemi oduhileyo bayile eAsiriya ukudinga usizo. UEfrayimi uqatshile izithandwa ukuba zimsize.

¹⁰ Lanxa beqatsha abasizi phakathi kwezizwe, sengizabaqoqa; ng’khona bezakhawula ukubeka amakhosi lababusi.

¹¹ Ngoba uEfrayimi akhile ama‐altare amanengi, asephenduke aba ngama‐altare okona.

¹² Loba bengingamlobela imilayo yami ibe zinkulungwane ezilitshumi, bebezakuyitshaya into engaziwayo.

¹³ Lanxa benikela inyama yemihlatshelo, babuye bayidle, mina Nkosi kangiyikuyamukela. Ngizakukhumbula ububi babo, ngibatshaye ngenxa yezono zabo, babuyele eGibithe.

¹⁴ UIsrayeli umkhohliwe uMenzi wakhe, wazakhela izindlu zamakhosi; uJuda wandisile imizi ebiyelweyo; kodwa ngizathumela umlilo phezu kwemizi yakhe, ozaqothula inqaba zakhe.