UHosiya 5 - iBhayibhili Elingcwele 1978

INkosi izatshaya uIsrayeli ngenxa yobubi bakhe

¹ Zwanini lokhu, lina bapristi, lilalele, lina Israyeli, libeke indlebe, lani ndlu yenkosi. Ngoba isigwebo simayelana lani, ngoba belingumjibila eMizipa, lembule elendlalwe eTabori.

² Bahlamukile, batshona ebubini, ngakhoke ngizabatshaya bonke.

³ Ngiyamazi uEfrayimi, loIsrayeli kafihlakalanga kimi, ngoba khathesi, wena Efrayimi, ufebile, uIsrayeli ungcolisiwe.

⁴ Izenzo zabo kazibavumeli ukubuyela kuNkulunkulu wabo. Ngoba umoya wokuwula uphakathi kwabo, kabayazi iNkosi.

⁵ Ukuzigqaja kukaIsrayeli kuyafakaza phambi kwakhe; uEfrayimi uzakukhubeka ngokona kwakhe, loJuda akhubeke kanye laye.

⁶ Bazahamba lezimvu zabo lenkomo zabo ukuyahlabela iNkosi, kodwa kabayikuyifumana, ngoba isukile kibo.

⁷ Bayikhohlisile iNkosi, ngoba bazele abantwana bezizweni. Khathesike ohlaselayo uzabachitha lamazwe abo.

⁸ Khalisani uphondo eGibeya, lilukhalise eRama, lihlabe umkhosi eBeti‐Aveni, uthuthumele, wena Benjamini.

⁹ UEfrayimi uzachitheka osukwini lokutshaywa; phakathi kwezizwe zakoIsrayeli ngiyatshengisa okuliqiniso.

¹⁰ Ababusi bakoJuda sebenjengabantu abasiphula izikhonkwane zemingcele; ngizakwehlisela kibo ulaka lwami njengamanzi.

¹¹ UEfrayimi ungumcindezeli onyathela okufaneleyo, ngoba ezimisele ukulandela okulize.

¹² Ngakhoke mina ngizakuba njengenondo koEfrayimi, lanjengokubola koJuda.

¹³ Kwathi lapho uEfrayimi ebona umkhuhlane wakhe, loJuda ebona isilonda sakhe, uEfrayimi wasesiya eAsiriya, wathumela ilizwi enkosini enkulu. Kodwa kayilamandla ukulelapha, lokupholisa izilonda zenu.

¹⁴ Ngizakuba njengesilwane koEfrayimi, ngibe njengesilwane koJuda. Mina, uqobo lwami, ngizakubadabudabula, besengihamba, ngibathwale njengempango yami, kungabi khona ongamukayo.

¹⁵ Ngizabuyela futhi endaweni yami, baze bavume icala labo, bangidinge; osizini lwabo bangidingisise.