UHosiya 10 - iBhayibhili Elingcwele 1978

¹ UIsrayeli ulivini elihle kakhulu elithelayo izithelo. Ngokwanda kwezithelo zakhe wandisa ama‐altare akhe; langokwanda kobuhle belizwe lakhe wenza insika zakhe zokukhonzela zibe zinhle.

² Inhliziyo yabo ikhohlakele, khathesi sebezakuthwala icala labo. INkosi izabhidliza ama‐altare abo, idilize lensika zabo ezingcwele.

³ Ngoba khathesi sebezakuthi: Kasilankosi thina, ngoba kasiyesabi iNkosi uNkulunkulu; inkosike ingasenzelani na?

⁴ Bakhuluma amazwi nje, benze izivumelwano ngezifungo zamanga; ukwahlulela sekunjengokhula olubulalayo olukhula emifolweni yensimu.

⁵ Abakhileyo eSamariya bayathuthumela ngethole laseBeti‐Aveni. Abantu balo bazalililela, labapristi bezithombe balikhalele, bekhalela ubuhle balo osebususiwe kulo.

⁶ Yebo, lona lizathwalelwa eAsiriya, libe ngumthelo enkosini enkulu. UEfrayimi uzayangeka, loIsrayeli abe lenhloni ngokungalaleli kwakhe.

⁷ ISamariya lenkosi yalo kuzanyamalala njengebazelo elindendayo emanzini.

⁸ Indawo eziphakemeyo zokukhonzela ezilize eziyisono sikaIsrayeli zizachithwa; ameva lokhula kuzamila emaaltareni abo. Bazakuthi ezintabeni: Sisibekeleni; bathi lasemaqaqeni: Welani phezu kwethu.

⁹ INkosi ithi: Kusukela ensukwini zaseGibeya wonile, Israyeli, kulokhu kusenjalo lalamhla. Impi kayiyikubafica eGibeya na?

¹⁰ Ngizakubasukela abantu abahlamukayo, ngibatshaye; izizwe zizakubabuthanela nxa betshayelwa izono zabo ezinengi.

¹¹ UEfrayimi ulithokazi elithambileyo elithanda ukubhula amabele; ngilibophele ejogweni; ngambophela uEfrayimi, ukuba alime, loJakobe wambulalela amagade.

¹² Zihlanyeleleni ukulunga, livune izithelo zothando olungapheliyo; qhathani ingqatho yenu, ngoba kuyisikhathi sokuyidinga iNkosi, ukuba ifike, ithele ukulunga phezu kwenu.

¹³ Lilime ububi, lavuna ukungalungi, lidlile izithelo zamanga. Ngoba lithembile inqola zenu zempi, lobunengi bamaqhawe enu;

¹⁴ ngalokho kuzakuba khona ukuxokozela kwempi phakathi kwabantu bakini, kudilizwe lenqaba zenu zonke, njengalokhu uShalimani wachitha iBeti‐Aribeli ngosuku lwempi, kwachotshozwa onina labantwana babo.

¹⁵ Kuzakuba njalo kuwe, Israyeli, ngenxa yobubi bakho obukhulu; njengoba ilanga lingaphuthi ukuphuma, kunjaloke lenkosi kuIsrayeli izachithwa.