UHosiya 1 - iBhayibhili Elingcwele 1978

UmkaHoseya labantwana bakhe

¹ Ilizwi leNkosi lafika kuHoseya indodana kaBeyeri ensukwini zaboUziya loJothamu loAhazi loHezekiya, amakhosi akoJuda, lasensukwini zikaJerobowamu indodana kaJowashi inkosi yakoIsrayeli.

² Lapho iNkosi iqalisa ukukhuluma ngoHoseya yathi kuye: Hamba uyethatha umfazi oliwule, uzale abantwana bokuwulwa; ngoba ilizwe leli liyawula kakhulu ngokudela iNkosi.

³ UHoseya wasehamba wathatha uGomeri indodakazi kaDibilayimi; wakhulelwa, wamzalela indodana.

⁴ INkosi yathi kuHoseya: Ithe ibizo uthi nguJezereli, ngoba emva kwesikhatshana ngizatshaya indlu kaJehu ngenxa yegazi alichitha eJezereli, ngiwuqede umbuso wakoIsrayeli.

⁵ Ngalolosuku ngizakuqeda amandla okulwa kaIsrayeli esigodini saseJezereli.

⁶ UGomeri wabuya wakhulelwa, wazala indodakazi. INkosi yathi kuHoseya: Ithe ibizo uthi nguLo‐Ruhama, ngoba kangisayikubahawukela abakoIsrayeli ukuba ngibathethelele.

⁷ Kodwa ngizahawukela abakoJuda, ngibakhulule mina Nkosi uNkulunkulu wabo; kangiyikubakhulula ngomtshoko, loba ngomkhonto, loba ngempi, loba ngamabhiza, langabagadi bamabhiza.

⁸ Esekhunyuliwe ebeleni uLo‐Ruhama, wabuya wakhulelwa uGomeri, wazala indodana.

⁹ INkosi yathi kuHoseya: Ithe ibizo uthi nguLo‐Ami, ngoba kalisibo abantu bami, lami kangisuye uNkulunkulu wenu.

¹⁰ Kanti ubunengi babantu bakoIsrayeli buzakuba ngangetshebetshebe lolwandle elingeke lilinganiswe loba libalwe. Endaweni yokuba kuthiwe kibo: Kalisibo abantu bami; kuzakuthiwa kibo: Lingamadodana kaNkulunkulu ophilayo.

¹¹ AbakoJuda labakoIsrayeli bazabuthana ndawonye, bazikhethele umkhokheli abe munye, bagcwale baze beqe imingcele yelizwe, ngoba luzakuba lukhulu usuku lwaseJezereli.