UHezekhiyeli 6 - iBhayibhili Elingcwele 1978

Ilizwi leNkosi ngezintaba zakoIsrayeli langezithombe

¹ Ilizwi leNkosi lafika kimi lathi:

² Ndoda, khangela ngasezintabeni zakoIsrayeli, utshumayele ngazo,

³ uthi: Lina zintaba zakoIsrayeli, zwanini ilizwi leNkosi uNkulunkulu. INkosi uNkulunkulu ithi ezintabeni lasemaqaqeni lasezifuleni lasezihotsheni: Mina uqobo ngizakwehlisela phezu kwenu umkhonto, ngivale indawo zenu eziphakemeyo zokukhonzela.

⁴ Ama‐altare enu azadilizwa, kubulawe lama‐altare okutshisela impepha; lababuleweyo bakini ngibaphosele phambi kwezithombe zenu.

⁵ Ngizabeka izidumbu zabakoIsrayeli phambi kwezithombe zabo, ngichithachithe amathambo enu kuma‐altare enu inxa zonke.

⁶ Kuzo zonke indawo lapho lihlala khona imizi yenu izachitheka, lendawo zenu eziphakemeyo zokukhonzela zivalwe, lama‐altare enu adilike aphele nya, lezithombe zenu zibulawe ziphele, lama‐altare enu okutshisela impepha adilizwe, lemisebenzi yenu ibhidlizwe.

⁷ Nxa abantu bebulawa phakathi kwenu, lizakwazi ukuba ngiyiNkosi.

⁸ Kanti ngizayekela abanye benu baphephe bahlakazeke phakathi kwezizwe.

⁹ Abaseleyo bakini bazangikhumbula phakathi kwezizwe abathunjelwe kizo; bazakhumbula ukudabuka kwami ngenxa yenhliziyo zabo ezasuka kimi ngenxa yobubi langenxa yamehlo abo ayelandele izithombe. Ng’khona bazanengwa yibo bonke ububi ababenzileyo langamanyala abo wonke.

¹⁰ Bazakwazi ukuba mina ngiyiNkosi. Kangikhulumanga ize nxa ngisithi ngizakwenza lokho okubi kibo.

¹¹ INkosi uNkulunkulu ithi: Qakeza izandla zakho, ugide ngenyawo zakho uthi: Maye! ngenxa yawo wonke amanyala amabi akoIsrayeli; ngoba bazabulawa yimpi, layindlala, layisifo.

¹² Okhatshana uzabulawa yisifo, oseduze abulawe yimpi, loseleyo abulawe yindlala. Kuzaphela ngokunjalo ukufutheka kwami phezu kwabo.

¹³ Lizakwazi ukuba ngiyiNkosi nxa ababuleweyo babo sebelele phakathi kwezithombe zabo, behanqe ama‐altare abo, phezu kwawo wonke amaqaqa amade, lasezingqongeni zonke zezintaba, langaphansi kwazo zonke izihlahla eziluhlaza, langaphansi kwazo zonke izihlahla ezinkulu ezilamahlamvu, loba kungaphi lapho bebenikela khona ngephunga elimnandi kuzo zonke izithombe zabo.

¹⁴ Ngizabaphakamisela isandla sami, ngilichithe ilizwe liphele, kuzo zonke indawo abahlala kuzo, kusukela enkangala kuze kufike eRibila. Ng’khonake bezakwazi ukuba ngiyiNkosi.